10
Jiisuuꞌke Naruaape-ita Kenaiꞌka Kara Nka-koo Botovuuruꞌnaꞌ
Teketa Jerusalemaꞌaape deto nariꞌ nanaavaꞌnaang piavora Jiisuuꞌke naruaape-ita kenaiꞌka miruꞌurira kenaankanaꞌ botovuruꞌ osinanka beeroꞌaari nanaavaꞌnaang uroꞌke. Eeꞌnoko teie aaꞌpuruꞌ, “Sinang tee bakei aaꞌnaꞌ meuraꞌpuing, teka kavuꞌnupoong okiꞌning, teeꞌkoo kunsirariaing sinang kavuꞌkoo Ovoringe kavuꞌnupoong botovuriainaꞌ tee-koo bakaang mintoong-koo. Aiaꞌ beriai naurampirinaꞌ. Aing ee, ninge tee diiꞌ sipisipiꞌkoo kampianu-pinaꞌ botorampimang nkaunanka-koo meuꞌke botorampipeuꞌnaꞌ. Kereka dovang siirauꞌ nkaveriaukaꞌ, boonamante˜ nkaveriaukaꞌ. Nantoong ninka taunge minkurariaukaꞌ.
“Areva pava diiꞌ tuntariainava tutung aaꞌperiai: Tampara! Mooa diiꞌkoo ava-koo otoaing. Eeꞌnoko naning mooa bauko teke otoko deekoꞌ diikaang mooa tee-koo keemparavaing. Teka diiꞌ taara-koo kasiaavaruko deekoꞌ tee diikaang biraanke napoꞌ diiꞌkoo toroaravaing. Eeꞌnoko teva nava-koo otoriai taamanirima tuaantarima kapooꞌ teinge araariaining ninka, aiꞌ teie naninge mintoomparamaunge tee teeꞌ bakaang mooꞌ nka-koo makosi. Pava paareveriaukaꞌ.
“Arenang tenang diiꞌ osi navuntuꞌkoo duꞌdariko onkeonkeꞌdaarima taamang araariaing naieriai. Siipa-nupoong taare-antaverererima teing ookara aaꞌpereriai, ‘Tee muuꞌ Kumponing Bakaang diiꞌkoo dueꞌ poing.’
10 “Teka arenang diiꞌ duꞌdariko osinamono-koo onkeonkeꞌdaariaukaꞌnung deekoꞌ osi-koo meuꞌ berira aaꞌperiai, 11 ‘Aung diikaang daꞌmong niiꞌkoo peꞌnaaꞌkoo naꞌnampuing tankamarimang amono Kumponing-koo maarekusiꞌnamono taaꞌniꞌanta-koo. Bane taaramerereriaꞌ teka diiꞌke noruꞌeriaing Kumponing bakaang muuꞌ diiꞌkoo dueꞌ poing.’ 12 Ninge naurampimang diiꞌ, teing enang onkeonkeꞌdaariaukaꞌning teing doong asiꞌnaꞌmung kiimata toraꞌpaavaining, Sodom-navuntuꞌ ntaꞌke paning-eta pora taivuruꞌnung-koo dau basinooꞌ.”
Piaaruꞌnanka Bakei Teing Osi Pankeng Bereꞌariaing.
(Mat 11:20-24)
13 “Bakaꞌe piaaruꞌnuka diiꞌ Korasin-nupoong, toraꞌkiriaining. Piaaruꞌnuka diiꞌ Besaida-nupoong, diiꞌ toraꞌkiriaininge, aiꞌ diiꞌ teing kapooꞌnanka iriꞌpoꞌning taꞌnimpaariiꞌnanka diiꞌkoo nkoaruꞌning ooverima bereꞌdariaruuꞌ. Teinge Juꞌdeeaing Saidoniꞌnupoong eeꞌnoko Taiaꞌnupoonge ooaara dei namuꞌke bereꞌaripeuꞌ, sipunge pooꞌarima mononopaꞌ orarunsi-koong kurumparipeuꞌ bereꞌariruꞌnung-koo taaꞌniꞌantavarima. 14 Teka aaꞌdampimang, teꞌmung Kumponinge nantoong kiimatavuriainaꞌmung diiꞌke dau basinooꞌ toraꞌperiaing Taiaꞌ naankai eeꞌnoko Saidoniꞌ toraꞌpureainooꞌketa. 15 Eeꞌnoko diiꞌ Kapaneumeꞌnupoong deto paning-koo basirariaining-pinaꞌ daang noruꞌdarimaing. Diiꞌ aaꞌ doonko nekipaꞌnooꞌkoo sing-antaruriaining.”
16 Eeꞌnoko teing bakaning naruaape-ita kenaiꞌka nanaavaꞌnaang botovurima napoꞌ aaꞌpuruꞌ, “Baa tee naning diiꞌ taararurimaatoainge tee ning nariꞌ taaramumatoaing. Eeꞌnoko tee naning diikaang kara dimpaꞌumaatoainge teie tee ning nkaang kara dimpaꞌumaatoaing. Eeꞌnoko tee ning nkaang kara dimpaꞌumaatoainge tee ning botomuuꞌnung bakaang kara teeꞌ nariꞌ dimpaꞌumaatoaing.”
Jiisuuꞌke Iriꞌ Kompauꞌnung-koo Biivimpariarooꞌnaang Nauvuruꞌnaꞌ
17 Teketa tee Jiisuuꞌke teing naruaape-ita kenaiꞌka tee botovurioꞌ nanaakotaaꞌ doturotu narung ninka toroariruꞌnung aaꞌpaama, “Ovoring ee, siipa narung deeaꞌ maꞌnarinanka apooꞌarampirieenge dakaang miring ninka.” 18 Eeꞌnoko teie aaꞌpuruꞌ teing, “Ninge ooansioꞌ Sietaniꞌ paning-eta depeto piping-pinaꞌ duaꞌaruꞌnung. 19 Aing ee, ninge tee diiꞌ purintoꞌ arompiring boruꞌnanka eeꞌnoko munkeitananka mmeꞌkoong eeꞌnoko ookara iriꞌ Sietaniꞌnung puruꞌkoong, eeꞌnoko diiꞌ teing kapooꞌke baikeruriaukaꞌnung. 20 Teka tee diiꞌ baruꞌ doturariaukaꞌnung tee-koo, aaꞌnoko maꞌnarinanka diiꞌkoo boong otoroinooꞌkoo, teka doturariaing diikaang miring paning-koo daariari otoinooꞌkoo.”
Jiisuuꞌ Dotuaruꞌnaꞌ Kumponinge Tamunsiꞌnupoong Sirakaꞌantavurioꞌ
(Mat 11:25-27; 13:16-17)
21 Tenang teing naruaape-ita kenaiꞌka toroarira minkuaako tee-koo batei-koo Tanuaang Meekunge Jiisuuꞌ dotu-antavuioꞌ aaꞌpuuꞌ, “Mmaꞌ ee, tampara tantamang daꞌ Ovoring paning-koong eeꞌnoko kansiꞌkoonge, Dake aaꞌnouꞌnung-koo: Dake tee doorenang tampara bakuꞌeuꞌnung-koo teing-koo aaꞌning-koo matau-poꞌnupoong eeꞌnoko noruꞌpoꞌnupoong eeꞌnoko siraꞌpeuꞌ teing-koo tootoia-koo. Teing nantoong piaaveri piarouꞌnaꞌ teeꞌ. Eeꞌ, Mmaꞌ.”
22 Eeꞌnoko nantoong karavurima aaꞌpuruꞌ, “Ookutunung kapooꞌnanka tee Mmaꞌke pareꞌmuuꞌnung eeꞌnoko naning otoaꞌ ning Tee Bauring noruꞌmui otoing, Mmaꞌke deekoꞌ noruꞌmui otong. Eeꞌnoko napoꞌ naning otoaꞌ Mmaꞌ noruꞌui otoing, teka ninge Bauringe deekoꞌ noruꞌansi oꞌnong. Eeꞌnoko nantoong teing naing ninge Bauringe miruꞌarampaining-koo oroꞌantavanko noruꞌaavaing tee.”
23 Tenang barevare-nupoong-anko bereꞌarara biiꞌkamaiꞌ otoroi aaꞌpuruꞌ, “Biraanke-nupoong teing nantoong ookaavaining diiꞌke ooverimaing-koo. 24 Aiꞌ ninge tee naurampimang, karingai-nakaro-nupoong eeꞌnoko dauraronuka-oo-koo piavorokoꞌ ninge kapooꞌ nkoanko enang ooverimanaꞌ, eeꞌnoko tee ooaavarukoꞌ. Eeꞌnoko taara-koo piavorokoꞌ kapooꞌ daankianko diiꞌke taaraverimaing, eeꞌnoko tee taaravaavarukoꞌ.”
Naning Sameriaꞌnung Tampara-koong Minkunaa
25 Eeꞌnoko narunge boto-naue donkonura paaravuma aaꞌpuuꞌ, “Nau-anta, ninge aming nkoamira domaang oparavaung okomuaing?” 26 Jiisuuꞌke aaꞌpuuꞌ, “Aming tee Moosesi-nung boto-koo daariari otong? Arekeeꞌ deeruemaunge?” 27 Eeꞌnoko teie makuꞌuma aaꞌpuuꞌ,
“Dake pankaruntoompeaing Ovoring dakaang Kumponing ootukunung dakaang domang-eta eeꞌnoko ootukunung dakaang uraang˜eta eeꞌnoko ootukunung dakaang purintoꞌketa eeꞌnoko ootukunung dakaang onou-eta, eeꞌnoko tee naning daꞌkoo dueꞌnung daka nariꞌ.” (Boto 6:5)
28 Eeꞌnoko Jiisuuꞌke aaꞌpuuꞌ tee, “Dake tampaꞌ bariꞌmeing. Teeꞌ nkovera daꞌ domantaravaing.”
29 Teka teie maiaꞌ dakaꞌkoo piavoma aaꞌpuuꞌ tee Jiisuuꞌ, “Eeꞌnoko baie tee naning ning-koo dueꞌnung miruꞌari otoing?” 30 Jiisuuꞌke makuꞌuma aaꞌpuuꞌnung, “Naning Juꞌkoo narung Jerusalemaꞌketa Jerikooꞌnavuntuꞌaape doonko bekoꞌnung eeꞌnoko bakisipunuka-koo maamunooraꞌkoo dau basiaruꞌnung. Teinge muraꞌaama ookara kapooꞌ teka kiruꞌaara tenkenauꞌnung okiꞌnaruuꞌkuioꞌ. 31 Teketa tee narung piristiꞌ tevunge doonko bema tee oovura baariꞌui niiꞌnamenge beuꞌ. 32 Teeꞌ nariꞌ napoꞌ narunge Liivaiꞌke bakanamuiaang-koonge pora teka oovura tee, teie napoꞌ baariꞌuuꞌ niiꞌnamenge.
33 “Teka narung diiꞌke munteꞌererimaing-koong, Sameriaꞌkoong, nanuma teꞌ pouꞌnung tee otouꞌnooꞌ, eeꞌnoko teie oovura piaavuuꞌnung tee. 34 Eeꞌnoko tee-anko bera tekaꞌpauꞌnairu daiꞌuuꞌ, duunie eeꞌnoko uaini dovange sisiꞌuma, teketa bakanavoroꞌ doonkiiꞌnavoroꞌkoo baꞌnang-antavura poꞌnupoꞌnuka biikanava-koo beꞌantavuuꞌ eeꞌnoko teka tarevuuꞌ. 35 Eeꞌnoko daunaꞌmung poꞌnupoꞌnuka biikanavaꞌ tarenara keura kiinaꞌning avuma aaꞌpuuꞌ, ‘Aung tareveaing dake, eeꞌnoko arekeeꞌning aing-koo daua duaꞌeaining aung tarevema damaꞌke mora makuꞌdampaing.’ 36 Emuꞌ baa teing-koo aing-koo beenaumo-koo dake noruꞌei, naning tee-koo dueꞌnung-pinaꞌ tasiꞌparing maamunooraꞌkoo tavauꞌnung-koo?”
37 Eeꞌnoko teie boto naunuka-koonge aaꞌpuuꞌ, “Tee narung tee piaa oroꞌantavuuꞌnung tee-koo.” Eeꞌnoko Jiisuuꞌke tee aaꞌpuuꞌ, “Bera teeꞌ nariꞌ nkoveaing.”
Jiisuuꞌke Meeriꞌ Biivimpuuꞌnaꞌ Tee-koo Baroromparioꞌ
38 Enang tee teketa taunge nanaama niiꞌnamono-koo osi basiariko nanie manikumai miring Maataꞌke Jiisuuꞌ onkeonkeꞌura bokuvuuꞌnung bakanava-koo. 39 Eeꞌnoko anie tee baaraꞌmaꞌnaang nani otokoꞌnung bakaang miring Meeriꞌ, teni Jiisuuꞌkoo kauꞌkanooꞌ baꞌnanura baroromparakoꞌnani bakaang nau-anta-koo. 40 Teka Maataꞌke taamang avutevuꞌ maamu-antavuma tapotapoarama noruꞌ baavaꞌaruꞌ, eeꞌnoko tenie Jiisuuꞌanko bera aaꞌpuuꞌ, “Ovoring ee, daꞌ ee taraꞌdoaꞌ otong ani ntaraꞌmaꞌnaang ning siꞌmuinani? Ning ninka poreꞌmomaang. Dake naueko pakumuai.”
41 Teka Ovoringe makuꞌuma aaꞌpuuꞌ teni, “Maataꞌ, Maataꞌ, daꞌ poreꞌdomaang avitoitoi noruꞌdarama avutevuꞌkoo. 42 Kapooꞌ narung masikung daꞌ piaropeuꞌnung otong. Meeriꞌ teni tee kapooꞌ tampara bamparinani pariꞌkoo makosinamuriiꞌ deeaꞌ.”