MAATIUꞌ
Bakaang Tampara Doorenang
Jiisuuꞌ Karistooꞌkoong
Kara Baavootunanka Aneꞌkooning
1:1 Jiisuuꞌ Kansiꞌkoo Pouꞌnaꞌ
4:17 Jiisuuꞌke Nantoong Kumponing-koo Tampaꞌ Doorevuruꞌnaꞌ Taare-antavurima
9:35 Jiisuuꞌke Bakaning Barevare-nupoong Mintoong-koo Botovuruꞌnaꞌ
11:1 Jiisuuꞌ Baa Masikung?
16:21 Jiisuuꞌke Bakaang Aarumo Bare-antavuruꞌnaꞌ Boainaꞌmung Dueꞌuko
21:1 Jiisuuꞌke Nantoong Asiꞌnooꞌ Nau-antavuruꞌnaꞌ Jerusalemaꞌ
26:1 Jiisuuꞌ Sisikeera Toraꞌantavai Dupisiꞌaako Napoꞌ Domamparuꞌnaꞌ
Jiisuuꞌ Kansiꞌkoo Pouꞌnaꞌ
1
(1:1–4:16)
Jiisuuꞌ Bakakatauro-koong Mirinanka
(Luk 3:23-38)
1 Aung aneꞌ tee Jiisuuꞌ Karistooꞌ bakanarempoꞌkoong mirinanka otoing, tee eeꞌnung Deevitaꞌ bakanaving-koong, tee Deevitaꞌ napoꞌ tee Eebaraamiꞌ bakanaving-koong.
2 Eebaraamiꞌ tee Aisakeꞌ bauma.
Aisakeꞌ napoꞌ tee Jeekopiꞌ bauma.
Jeekopiꞌ tee Juda bauma batatakaampi eeꞌnoko baaraꞌmainkaang ninka nariꞌ.
3 Juda tee Peeresi namainta Siira beuma. Beuko teni Teemaa.
Peeresi tee Eesirong bauma.
Eesirong napoꞌ tee Aramiꞌ bauma.
4 Aramiꞌ tee Aminadapiꞌ bauma.
Aminadapiꞌ tee Naasoni bauma.
Naasoni tee Salamong bauma.
5 Salamong tee Booasi bauma, bauko teni Reeap.
Booasi tee Oobeteꞌ bauma, teie bauko teni Rut.
Oobeteꞌ tee Jeeseꞌ bauma. Eeꞌnoko
6 Jeeseꞌ tee Deevitaꞌ bauma, tee daurarong˜. Napoꞌ
Deevitaꞌ tee Solomoniꞌ bauma, bauko teni eeꞌnani tutung Uraia baꞌaang.
7 Solomoniꞌ tee Reaboam bauma.
Reaboam tee Abaisiaꞌ bauma.
Abaisiaꞌ tee Eesa bauma.
8 Eesa tee Jeosapata bauma.
Jeosapata tee Jooram bauma.
Jooram tee Usaia bauma.
9 Usaia tee Jootam bauma.
Jootam tee Eeasi bauma.
Eeasi tee Esekaia bauma.
10 Esekaia tee Manase bauma.
Manase tee Aamon bauma.
Aamon tee Josaia bauma.
11 Josaia tee Jekonaia bauma, eeꞌnoko baaraꞌmainkaang. Tekang ninka nariꞌ mmauꞌ Juꞌnupoong Babiloniꞌnameensiꞌaape berouꞌ kiimata-koo. 12 Babiloniꞌaape berouꞌnooꞌketa
Jekonaia tee Sialeteale bauma deemparuꞌ.
Sialeteale tee Serababele bauma.
13 Serababele tee Abaiutuꞌ bauma.
Abaiutuꞌ tee Elaiakim bauma.
Elaiakim tee Eesoo bauma.
14 Eesoo tee Siedoko bauma.
Siedoko tee Eekim bauma.
Eekim tee Elaituꞌ bauma.
15 Elaituꞌ tee Eliesaꞌ bauma.
Eliesaꞌ tee Mataaniꞌ bauma.
Mataaniꞌ tee Jeekopiꞌ bauma.
16 Jeekopiꞌ tee Josepaꞌ bauma.
Josepaꞌ tee Meeriꞌ baꞌung, teni Jiisuuꞌ paravuuꞌnani, tee eeꞌnung Kumponinge Pakoꞌpariꞌniiꞌ tampaamaung, Karistooꞌ.
17 Aing teing avantevaranooꞌ kivora-ita karenaumo-koo basi Eebaraamiꞌketa Deevitaꞌkoo basinooꞌ, eeꞌnoko teketa napoꞌ kivora-ita karenaumo-navarantu otorouꞌ Babiloniꞌke kiimatavariri otorouꞌnooꞌ basinooꞌkoo. Eeꞌnoko teketa napoꞌ kivora-ita karenaumo-navarantu depeto tee Kumponinge Pakoꞌpariꞌniiꞌkoo basinooꞌkoo.
Jiisuuꞌ Meeriꞌke Paravuuꞌnaꞌ
(Luk 2:1-7)
18 Enang teeꞌ eeꞌ nkoarara Jiisuuꞌ Karistooꞌ pontoꞌaruꞌnaꞌ. Teni bauko Meeriꞌ teni Josepaꞌkoo miruꞌniiꞌnani, teka mmeꞌ nariꞌ otoreaꞌ teni tootoꞌpoꞌnani deemparuꞌ taꞌninaꞌ Tanuaang Meekung bakaang iriꞌke. 19 Teketa teie Josepaꞌke, teni-koo miruꞌniiꞌke teni tootoꞌpoꞌnani tasiꞌpura koontoꞌnaꞌ nko-koo noruꞌari beekaang navunavu totoꞌkoo mauꞌaruꞌ, teka makenge nko-koo piavouꞌ ookara-koo siraꞌpuko maiaꞌoꞌneeng-koo teni.
20 Teka teeꞌ noruꞌarara otoko koosinung˜ narung Ovoring bakaang noone-koo tee-ankoi oroꞌparuꞌ eeꞌnoko aaꞌpuuꞌ, “Josepaꞌ, Deevitaꞌ bauring, aroreaukaꞌ Meeriꞌ boku-koo daꞌaang deemparaaꞌnaang, aiꞌ tee tootoꞌ teni-koo poontoaring˜ tee Tanuaang Meekung-etaing. 21 Tenie tee tootoꞌ donkaani paravuaing, eeꞌnoko dake tee miring Jiisuuꞌ* Iiburu-nupoong biikaang kara-koo tee miring “Iesua” tee “Kumponing niikaang Domang-anta” miruꞌari otong; tee Jiisuuꞌ tampampimaung. tampeaing, aiꞌ teie tee bakaning nantoong biikaning orara aarumonanka-ita mooꞌuriaing.” 22 Aing ookara kapooꞌnanka nkoaruꞌnooꞌ tee kapooꞌ Ovoringe tero nakaronara˜ karantavuma˜ nauvuuꞌnung masikaꞌparaaꞌnaang, eeꞌ oroꞌ:
23 “Teni kuukuma˜ teni tootoꞌpoꞌnani deemparara narung donkaani paravuai, eeꞌnoko teinge eeꞌpinaꞌ tampaavaing, ‘Iimanuelaꞌ,’ miruꞌnooꞌ tee ‘Kumponing niiꞌ ninka nariꞌ otong.’ ” (Aisaiaꞌ 7:14)
24 Tenang Josepaꞌ tantearara teeꞌ nariꞌ teie koosinunge Ovoring bakaange botovuuꞌnaꞌ bera Meeriꞌ bokuvuuꞌ baꞌaang deemparaaꞌnaang. 25 Teka teie tamung tanatavuuꞌ bera tenie tee tootoꞌ donkaani paravuuꞌnooꞌketa damaꞌke nampuuꞌ. Eeꞌnoko tee tootoꞌ miring Jiisuuꞌ tampuuꞌ.
*1:21: Iiburu-nupoong biikaang kara-koo tee miring “Iesua” tee “Kumponing niikaang Domang-anta” miruꞌari otong; tee Jiisuuꞌ tampampimaung.