1 Tero maatanang teing piristiꞌnuka-koo ovontung pankeuꞌkoo urantanuka, boto naunuka eeꞌnoko ookara koompaaraꞌnavitu naroꞌke mumunsiariruꞌ. Eeꞌnoko teketa Jiisuuꞌ daiꞌaara tavoꞌauꞌ Pailatiꞌanko. 2 Pailatiꞌke tanaꞌuma aaꞌpuuꞌ, “Daꞌ ee Daurarong˜ Juꞌnupoong Biikaang?” Jiisuuꞌke bariꞌuma aaꞌpuuꞌ, “Masikung minkuemaang.” 3 Eeꞌnoko ookara piristiꞌnukai kapooꞌ avutevuꞌkoo tuutuauꞌ. 4 Tuutuaako Pailatiꞌke napoꞌ tanaꞌuma aaꞌpuuꞌ, “Arekeeꞌ, bariꞌearooꞌnaang? Taaraveko mmauꞌ kapooꞌkoo tuumpiraamaang.” 5 Eeꞌnoko Jiisuuꞌke napoꞌ kara-koo niiꞌnaare makuꞌevuaꞌ. Eeꞌnoko teeꞌkoo Pailatiꞌ aaꞌnaꞌ taꞌnimparuꞌ.

6 Ookara mareꞌ kante-koo Taamang Baariꞌkoong-koo˜ Pailatiꞌke kiimata-ita narung simpiriꞌantaevurikoꞌ nantoonge tanaꞌaako. 7 Eeꞌnoko teꞌmung batei-koo naning miring Barabasi kiimata-koo otoko nariong ninka ovoꞌmaꞌ turampaakoꞌning ninka, turampeema naning dupisiꞌauꞌning. 8 Eeꞌnoko nantoong naroꞌariruꞌ Pailatiꞌke tanaꞌkoo mareꞌ kante nkovukoꞌnaꞌ nkovuaꞌnaang. 9 Eeꞌnoko Pailatiꞌke tanaꞌurima aaꞌpuruꞌ, “Teka diiꞌke aung Juꞌnupoong Biikaang Daurarong ninge simpiriꞌanta-koo ee piarorimang?” 10 Tampaꞌ noruꞌuitaaꞌ aiꞌ piristiꞌnuka-koo ovontunge Jiisuuꞌ tee mamairo-ita tee-anko tavoꞌauꞌnung. 11 Eeꞌnoko pankeng piristiꞌnukai nantoong tukoaaruꞌ Pailatiꞌanko bokiaako, Barabasi narung simpiriꞌantavuko teing-anko poꞌkoo. 12 Eeꞌnoko Pailatiꞌke napoꞌ nantoong niaꞌurima aaꞌpuruꞌ, “Teka ninge arekeeꞌ nkoamaꞌnaang piarorimaang aung Juꞌnupoong Biikaang Daurarong?” 13 Eeꞌnoko teinge bokiaama aaꞌpauꞌ, “Aaꞌbarataꞌkoo taakaveaing.” 14 Eeꞌnoko Pailatiꞌke aaꞌpuruꞌ, “Teka aming orara nkovuing-koo?” Eeꞌnoko teeꞌ minkuvuioꞌ napoꞌ baruꞌ aaꞌnaꞌ bokiaama aaꞌpauꞌ, “Aaꞌbarataꞌkoo taakaveaing tee.” 15 Eeꞌnoko Pailatiꞌke nantoong pinau-anta-koo piavora Barabasi simpiriꞌantavuuꞌ teing-anko poꞌkoo. Eeꞌnoko Jiisuuꞌ muraꞌkoo botovuruꞌ Pailatiꞌke, eeꞌnoko avuruꞌ aaꞌbarataꞌkoo taaka-koo.

16 Eeꞌnoko piatooronukai Jiisuuꞌ ovoꞌmaꞌ bakanavaꞌkoo kuung tung-antavauꞌ. Eeꞌnoko ookara biiꞌmarang naroꞌ poꞌkoo bokuaaruꞌ tee akapeuꞌaavaꞌnaang. 17 Eeꞌnoko mononopaꞌ isikung dauraronuka biikaang-pinaꞌ iiraampumaung kurumpauꞌ, eeꞌnoko baakopo moꞌming kunikunisi-koo nkoaara tee-koo boreꞌkoo kurumpauꞌ dauraronuka kurumpaarimanaꞌ. 18 Eeꞌnoko tenang atataiꞌaakoꞌ aaꞌpaama, “Tampara masikung, Daurarong Juꞌnupoong Biikaang!” 19 Eeꞌnoko boreꞌkoo muraꞌauꞌ banaꞌke tutupaaꞌaama, eeꞌnoko miinge keemparima kinkinaakoꞌ Jiisuuꞌkoo. 20 Eeꞌnoko akapeuꞌaakotaaꞌ mononopaꞌ iiraampumaung kiruꞌauꞌ, eeꞌnoko bakaang mononopaꞌ napoꞌ kurumpauꞌ tee-koo. Eeꞌnoko tenkeng-antavauꞌ aaꞌbarataꞌkoo taaka-koo.

21 Eeꞌnoko beroma taunga naning miring Saimoniꞌ kuneꞌauꞌ tamung poraꞌketa pora tankinuko, eeꞌnoko botoauꞌ Jiisuuꞌ bakaang aaꞌbarataꞌ poruꞌkoo. Aung Saimoniꞌ Sairini-nung, Aleksandaꞌ namainta Ruupasi beuma. 22 Eeꞌnoko teketa Jiisuuꞌ tavoꞌauꞌ Kolokataꞌ tampaamanooꞌ, miruꞌnooꞌ Makupiꞌnooꞌ. 23 Eeꞌnoko teka teꞌ basiarira, teinge Jiisuuꞌ uaini bankinie pitunisi miring maaraꞌ ninka Jiisuuꞌ avuꞌkoo paaravauꞌ. Eeꞌnoko nai-koo kupiꞌouꞌ. 24 Eeꞌnoko tenang Jiisuuꞌ aaꞌbarataꞌkoo taakavauꞌ. Baaronanka bakaang biiꞌka-koo tankeeꞌeera kapooꞌ deikooꞌkoong nkoaama, eeꞌ noruꞌaitaaꞌ baie pa aung mononopaꞌ nkavuuꞌnaang? 25 Eꞌmoo duaaꞌ sirang poioꞌ biꞌauꞌ aaꞌbarataꞌkoo. 26 Eeꞌnoko daua aung kara tuumpiauꞌnaare daariauꞌ, JUꞌNUPOONG BIIKAANG DAURARONG. 27 Eeꞌnoko Jiisuuꞌ ninka nariꞌ niiꞌnaanka mutaaꞌo nkora aaꞌbarataꞌkoo taakavaaretuꞌ, narung tee-koo tampavine-aape, eeꞌnoko narung mareꞌaanavine-aape. 28 Eeꞌnoko enang Daari Meekunge minkuvuma aaꞌpuuꞌnaꞌ dupearuꞌ,

33 Eeꞌnoko duaakiꞌnang mutaanange ookara kansiꞌ tunumparavaruuꞌ bera kamunooꞌke basi. 34 Eeꞌnoko kamunooꞌuioꞌ Jiisuuꞌ aaꞌnaꞌ karoma osinung karai aaꞌpuma, “Eloi, Eloi, Lama Sabakatani.” Kuunooꞌ aaꞌpuitaaꞌ, “Nkaang Kumponing, nkaang Kumponing, ning dake aming-koo siꞌmeing?” 35 Eeꞌnoko niiꞌninge nantoonge teke donkonai otorouꞌninge teeꞌ taravaara aaꞌpauꞌ, “Taaraveriai. Eliasi bokuvumaang.” 36 Eeꞌnoko narung kuaꞌparara kapooꞌ uaini kaaveeriiꞌkoo duꞌmumpura banaꞌkoo daiꞌantavura Jiisuuꞌke musiꞌkoo toong-antavuuꞌ aaꞌpuma, “Iroꞌ ooampiai, Eliasie pora aaꞌbarataꞌketa sing-antavuaing deekoꞌ.” 37 Eeꞌnoko Jiisuuꞌ tenang aaꞌnaꞌ bokuma asiꞌnamuꞌ domaang oparuꞌ. 38 Eeꞌnoko tee baarong pava dootuuꞌnava pankava-koong, meekavaro kuꞌnung, meuꞌ keꞌmeꞌaruꞌ aꞌdeiꞌketa depeto dereꞌarama bera aꞌdoong kainuꞌ. 39 Eeꞌnoko tenang teie piatooro daakuꞌ tarenarai Jiisuuꞌaape bereꞌarama donkonui teeꞌpuko taaravura eeꞌnoko teeꞌ booꞌparuꞌnaꞌ oovura aaꞌpuuꞌ, “Aung bakei masikaꞌ Kumponing Bauring!” 40 Eeꞌnoko niiꞌning manikuꞌke isipoꞌketa ooai otorouꞌ. 41 Teing-koo niiꞌnani Meeriꞌ Maꞌdala-nani, eeꞌnoko niiꞌnani napoꞌ Saalomeꞌ, eeꞌnoko napoꞌ Meeriꞌ nemakara Jeemisi namainta Joosesi beuko. Aing teing manikuꞌ tenang Jiisuuꞌ Kaaleliꞌke otoko siompaama pakuaakoꞌning kapooꞌ apukaꞌparakoꞌning-koo.

42 Teꞌmung Doong Uaanaꞌmung-koo maamunaꞌmung, muung-aapevuioꞌ*Tenang duaaꞌ tumparako doong maamunaꞌmung-koo tee Doong Uaanaꞌmung tutumparakoꞌnung. Josepaꞌ Arimateaꞌnung eeꞌnoko Nikodemasi iriꞌnarumpuresi dakoꞌuretuꞌ tee Jiisuuꞌ, Doong Uaanaꞌmung orarivureꞌneeng-koo. Doong Uaanaꞌmung dueꞌuko, naning miring Josepaꞌ Arimateaꞌnung tavoꞌaruꞌ. Josepaꞌ tee narung koompaaraꞌnavitu-koong pankaing Kumponing bakaang muuꞌ donkonuko oovuuꞌnaang nempukoꞌnung; 43 Avoroaꞌ Pailatiꞌanko bera tanaꞌuuꞌ Jiisuuꞌnung mono nka-koo. 44 Eeꞌnoko Pailatiꞌke taaravura Jiisuuꞌ bouꞌnaꞌ aaꞌpuuꞌ, “Teka ee booꞌparing, aiꞌ booꞌparavaꞌ?” Teketa komandaꞌ bokuvura tanaꞌuma aaꞌpuuꞌ, “Jiisuuꞌ ee masikung booꞌparing?” 45 Eeꞌnoko Pailatiꞌke komandaꞌnung kara taaravura Jiisuuꞌ masikung bouꞌnaꞌ tauraꞌpuuꞌ Josepaꞌke mono nka-koo. 46 Eeꞌnoko Josepaꞌke pankaing baarong kakaara mooꞌuuꞌ Jiisuuꞌnung mono nopaꞌkoo, eeꞌnoko aaꞌbarataꞌketa sing-antavura teie baaronge kakaarai nopaꞌuuꞌ. Eeꞌnoko kuvi dakoꞌdoma boiaꞌkoong nenkeꞌauꞌnung-koo kuung sipura karanaang kapang kaavororiiꞌ kovempura kuꞌnumpuuꞌ. 47 Eeꞌnoko Meeriꞌ Maꞌdalanani, Meeriꞌ Joosesi bauko tenaankai tampaꞌ keperuuꞌ uresi Jiisuuꞌ bempauꞌnooꞌ oovuretuꞌ.