1 Nkɛ nsa kamaa mʋ, ba kpɩɩ ɔkyɩɩfɔ Kena kadɛ tɔ Galile Ɔsʋwʋlɛ sʋ. Yesu mu‐nyi bʋ tʋtɔ. 2 Nɩɩ ba da kɩbaa tɔ tɩɩ Yesu maa mʋ abɩɩlapʋ gbaa kɩkyɩɩfɔ mʋ tɔ. 3 Saŋa mʋ nɩɩ nta ɩ pwagɛ bamʋ mʋ, Yesu mu‐nyi tɔwɛ mʋ yɛ, “Bamʋ nta ɩ lʋwɛ.”

4 Nɩɩ Yesu lɛɛ kɔnɔ yɛ, “Ɔkyɩɩ, man tɔwɛ mɛ kʋtɔ mʋ nɩɩ n waa. Mɛ saŋa*2:4 Ɩnɩmʋ ɩɩ kaapʋ saŋa mʋ nɩɩ Yesu bʋnyaa mʋ ii biti ɔ lɩɩ ofuli, kɛ asa ba bɩɩ fɛɛ mʋ ɩ gyɛ Ɩbwaarɛ mu‐bii mʋ. man pɩɩ fʋʋ.”

5 Nɩɩ mu‐nyi tɔwɛ nta ayɛpʋ mʋ yɛ, “Kʋtɔ kʋmaa mʋ nɩɩ ɔ tɔwɛ fanɛ yɛ fan waa mʋ, fan waa.”

6 Nɩɩ nkyu afʋlɛ alan asiye ɩ yɩlɛ tʋtɔ, ɩmʋ nɩɩ ba sʋ bɛɛ waa Gyiwu abi anaana‐tɔ ineesi kɩfwɩɩ. Nɩɩ kʋfʋlɛ kɩlan kʋmaa kɩ taalɛ gyii ɩgalɔn adʋnyɔ abɛɛ adɩsa.

7 Nɩɩ Yesu tɔwɛ nta ayɛpʋ mʋ yɛ, “Fan saa nkyu bɔla alan mʋ kpini.” Ɩmʋ sʋ ba saa nkyu bɔla alan mʋ kpini bɩlɩbɩlɩ.

8 Nɩɩ ɔ tɔwɛ ba mʋ yɛ, “Fan nyɛ ɩmʋ ɩkʋ naa sa nta ayɛpʋ ɔbɩlɩsa mʋ.”

Nɩɩ ba waa kanɩn. 9 Nta ayɛpʋ ɔbɩlɩsa mʋ maa daa nuu nkyu mʋ nɩɩ i biliŋi nta mʋ kɩɩ mʋ, o wu fɛɛ ɩ bʋrɔn. Ɔ man nyi katɩn mʋ nɩɩ ɩ lɩɩ, amaa ayɛpʋ mʋ nɩɩ ba saa nkyu mʋ bɩrɛ be nyi. Nɩɩ ɔ tɩɩ ɔkyɩɩfɔ mu‐kuli mʋ lɩɩ ɩkaa sʋ. 10 Nɩɩ ɔ tɔwɛ mʋ yɛ, “Ɔkʋmaa nɩmʋ ɩ daa kɩlɛɛ nta danbɩrasa pɔyɩ. Nɩɩ saŋa mʋ nɩɩ ɔkʋmaa nɩmʋ nuu bʋʋ mʋ, kɛ ɔ lan bɩya nta mʋ nɩɩ ɩ man bʋrɔn mʋ. Amaa fʋ taa ɩmʋ nɩɩ ɩ bʋrɔn yɩla ba fʋʋ saŋa nɩmʋ.”

11 Ɩnɩmʋ ɩ gyɛ asɩn kyinkyinsa gyankpaasa mʋ nɩɩ Yesu waa. Ɔ waa ɩmʋ Kena kadɛ tɔ Galile ɔsʋwʋlɛ sʋ. Tʋtɔ nɩɩ ɔ lɛɛ mʋ bʋnyaa mʋ kaapʋ. Nɩɩ mʋ abɩɩlapʋ mʋ ba kɔɔlɛ mʋ gyii.

12 Ɩnɩmʋ kamaa mʋ maa mu‐nyi yɛ mu‐supu ana yɛ mʋ abɩɩlapʋ ba lɩɩ tʋtɔ kpee Kapanum kadɛ tɔ. Nɩɩ ba kyɩna tʋtɔ nkɛ nkʋ.

13 Saŋa mʋ nɩɩ Gyiwu abi Kesu kɔnɔ Kanyaŋɛ nbunɔ kɩ san gbɛrɛɛ kɩ fʋʋ mʋ, Yesu kpee Gyerusalem kadɛ tɔ. 14 Maa fʋʋ tʋtɔ mʋ, nɩɩ o kpee kabwaarɛ‐sunkpa opula mʋ tɔ. Nɩɩ o wu anyɩn akʋ ba maa fɛ ɩnaatɛ, yɛ nbʋlʋpʋ yɛ awura‐lɔpɔ yɛgɛ akʋ mɔɔ ba tɛ iteeburu asɛ bɛɛ kyɛrɛ afulee.†2:14 Gyiwu abi ba sʋ bamʋ afulee bɛɛ kyɛrɛ Roma abi afulee. 15 Nɩɩ ɔ taa ɔfɛ waa kʋkyʋkyʋʋ gyan bamaa bamʋ ɩnaatɛ yɛ nbʋlʋpʋ lɩɩ kabwaarɛ‐sunkpa opula. Nɩɩ ɔ yasɛ bamʋ afulee abi tɔ, nɩɩ ɔ bala bamʋ iteeburu bun. 16 Nɩɩ ɔ tɔwɛ bamʋ nɩɩ bɛɛ fɛ awura‐lɔpɔ mʋ yɛ, “Fan lɛɛ bamʋ lɩɩ nfɩɩ. Fan man taa Mɛ‐Sɛ ayɛ biliŋi kɩgya ogyikpa.”

17 Nɩɩ mʋ abɩɩlapʋ mʋ ba nyiŋi Asɩnkyan yɩlasa mʋ nɩɩ ɩɩ tɔwɛ yɛ, “Kebiti mʋ nɩɩ n sʋ sa kabwaarɛ‐sunkpa ayɛ mʋ kii gyii mi kumu.”

18 Nɩɩ Gyiwu abɩlɩsa mʋ ba taasɛ mʋ yɛ, “Mɩnɛ asɩn kyinkyinsa nɩɩ fɩɩ taalɛ waa kaapʋ anɛ, kɛ ɩ kaapʋ fɛɛ fʋ sʋ ɔkpa fʋ waa ɩnɩmʋ?”

19 Nɩɩ Yesu lɛɛ kɔnɔ kɩŋasan tɔ yɛ “Fan boyi kabwaarɛ‐sunkpa ayɛ nɩmʋ, kɛ n taa nkɛ nsa kʋsaa kɩmʋ yii.” 20 Nɩɩ Gyiwu abi mʋ ba taasɛ mʋ yɛ, “Nsu adɩna yɛ asiye nɩɩ ba taa pɔyɩ Kabwaarɛ‐sunkpa ayɛ nɩmʋ, nɩɩ fɛɛ fʋ fʋ yɛ fɩɩ taalɛ taa nkɛ nsa kʋsaa kɩmʋ yii?” 21 Kabwaarɛ‐sunkpa ayɛ mʋ nɩɩ Yesu tɔwɛ kɩmʋ asɩn falɛ, ɩ gyɛ mʋ gbaa‐gbaa mʋ kayɩɩ‐wʋlɛ nɩn, man gyɛ kabwaarɛ‐sunkpa ayɛ mʋ gbaa‐gbaa. 22 Ɩmʋ sʋ saŋa mʋ nɩɩ Ɩbwaarɛ kyiŋi mʋ lɩɩ lewu tɔ mʋ, mʋ abɩɩlapʋ mʋ ba nyiŋi yɛ ɔ wʋla tɔwɛ bamʋ ɩnɩmʋ. Nɩɩ ba kɔɔlɛ Asɩnkyan yɩlasa mʋ yɛ asɩn mʋ nɩɩ Yesu tɔwɛ bamʋ mʋ gyii.

23 Asɩn kyinkyinsa kʋkyɔ mʋ nɩɩ ɔ waa Gyerusalem kadɛ tɔ saŋa mʋ nɩɩ Gyiwu abi bee gyii bamʋ Kesu kɔnɔ Kanyaŋɛ nbunɔ mʋ, asa gaalaagaa ba wu nɩɩ ba kɔɔlɛ mʋ gyii. 24 Amaa Yesu bɩrɛ, ɔ man taa mʋ n‐yɩɩ tʋʋ bamʋ sʋ, lɩɩ fɛɛ o nyi kanan mʋ nɩɩ asa kpini ba du. 25 Nɩɩ ɩ man tiri mʋ fɛɛ ɔkʋ ɔ tɔwɛ mʋ kanan mʋ nɩɩ asa ba du, lɩɩ fɛɛ o nyi kʋtɔ mʋ nɩɩ kɩ bʋ asa nkɔlɔ tɔ.