1 Ɩmʋ sʋ, nbɩɩnbɩɩ Ɩbwaarɛ kʋpwɛ kubun man bʋ tɔ sa anɛ mʋ nɩɩ anaa Yesu Krisito an waa kʋkʋlʋn mʋ. 2 Lɩɩ fɛɛ a maa bɔla Yesu Krisito sʋ mʋ, Ɩbwaarɛ Kayaayu nbara pʋpwɛ mʋ nɩɩ kɩɩ sa nyɩmɩsa nkpa mʋ, ɩ yɛgɛ nɩɩ n nyɛ mɛ n‐yɩɩ lɩɩ nbara mʋ nɩɩ ɩɩ tɔwɛ yɛ, nɩɩ n kan waa mʋ alibi n biti n wu mʋ. 3 Kʋtɔ mʋ nɩɩ Mosesi nbara mʋ ɩ man taalɛ waa, kpalɩ fɛɛ anɛ kayɩɩ‐wʋlɛ mʋ maa man bɩla kɩ bʋlʋn ki buu nbara mʋ, Ɩbwaarɛ taalɛ waa fɛɛ maa sun mʋ gbaa‐gbaa mu‐bii fɛɛ nyɩmɩsa alibi awaapʋ keduli. Nɩɩ ɔ taa mʋ n‐yɩɩ waa saraga sa anɛ alibi, ba bun alibi mʋ nɩɩ i gyii nyɩmɩsa kayɩɩ‐wʋlɛ sʋ mʋ kʋpwɛ. 4 Ɩbwaarɛ waa falɛ nɩn kɛ a taalɛ waa kesintin ɩkpa danbɩrasa mʋ nɩɩ nbara ii biti mʋ, lɩɩ fɛɛ an man bɩla an buu anɛ kayɩɩ‐wʋlɛ dɩdaa mʋ, amaa an buu Ɩbwaarɛ Kayaayu kebiti mʋ.

5 Nɩɩ bamʋ nɩɩ ba naa kayɩɩ‐wʋlɛ dɩdaa tɔ mʋ, bamʋ nfɛɛrɛ ɩ dɛ kayɩɩ‐wʋlɛ kebiti sʋ nɩn, amaa bamʋ nɩɩ ba naa Kayaayu tɔ mʋ, bamʋ nfɛɛrɛ ɩ dɛ Kayaayu kebiti tɔ nɩn. 6 Fɛɛ kayɩɩ‐wʋlɛ kebiti kan gyii ɔkʋ nfɛɛrɛ sʋ mʋ, ɩ bɩya mʋ lewu nɩn, amaa ɔmʋ nɩɩ Ɩbwaarɛ Kayaayu kebiti gyii mʋ nfɛɛrɛ sʋ mʋ, ɩ bɩya mʋ nkpa yɛ keyuula. 7 Lɩɩ fɛɛ nɩɩ ɔkʋ kan taa mʋ nfɛɛrɛ tʋʋ kayɩɩ‐wʋlɛ kebiti sʋ mʋ, ɔ gyɛ Ɩbwaarɛ okisipu. Nɩɩ o mee buu Ɩbwaarɛ nbara, nɩɩ ɔ mɛɛ taalɛ buu sʋ gbaa. 8 Nɩɩ bamʋ nɩɩ bɛɛ waa bamʋ kayɩɩ‐wʋlɛ kebiti mʋ, ba mɛɛ bɔla Ɩbwaarɛ ansi.

9 Amaa fanɛ bɩrɛ fɛn mɛɛ waa fanɛ kayɩɩ‐wʋlɛ kebiti, amaa Ɩbwaarɛ Kayaayu mʋ nɩɩ kɩ bʋ fanɛ tɔ mʋ kebiti nɩɩ fɛn waa. Nɩɩ ɔsa kʋmaa mʋ nɩɩ ɔ man sʋ Krisito Kayaayu mʋ, ɔ man gyɛ Krisito lɛɛ. 10 Amaa fanɛ mʋ nɩɩ Krisito bʋ fanɛ nkɔlɔ tɔ mʋ bɩrɛ, fanɛ n‐yaayu mʋ nɩɩ ɩ bʋ fanɛ tɔ mʋ ɩ sʋ nkpa. Lɩɩ fɛɛ Ɩbwaarɛ tɔwɛ yɛ fanɛ ɩkpa i kyiigi mʋ asɛ, amaa lɩɩ fanɛ alibi sʋ mʋ fanɛ kayɩɩ‐wʋlɛ kii biti ki wu. 11 Nɩɩ ɩ kan ɩ gyɛ fɛɛ Ɩbwaarɛ mʋ nɩɩ o kyiŋi Yesu lɩɩ lewu tɔ mʋ Kayaayu bʋ fanɛ tɔ bɩrɛ, kanɩn Ɩbwaarɛ mʋ nɩɩ o kyiŋi Yesu lɩɩ lewu tɔ mʋ, ii biti ɔ sa fanɛ kayɩɩ‐wʋlɛ nkpa, lɩɩ mʋ Kayaayu mʋ nɩɩ kɩ bʋ fanɛ tɔ falɛ sʋ.

12 Ɩmʋ sʋ mɛ‐daa ana yɛ mi‐supu ana, nbɩɩnbɩɩ kʋtɔ mʋ nɩɩ kɩ dagaa ɩ gyɛ fɛɛ a man taa anɛ kayɩɩ‐wʋlɛ kebiti waa anɛ kakyɩna tɔ. 13 Nɩɩ fan kan taa kayɩɩ‐wʋlɛ asun libi waa fanɛ kakyɩna tɔ bɩrɛ fen biti fen wu, amaa nɩɩ fan bɔla Kayaayu mʋ sʋ kina nɩɩ fan yɛgɛ kayɩɩ‐wʋlɛ asun libi mʋ bɩrɛ, fen biti fan nyɛ nkpa. 14 Bamʋ nɩɩ ba buu Ɩbwaarɛ Kayaayu ɔkpa kaapʋsa bamʋ mʋ, bamʋ ɩ gyɛ Ɩbwaarɛ mu‐bii ana. 15 Lɩɩ fɛɛ Kayaayu mʋ nɩɩ Ɩbwaarɛ sa fanɛ mʋ, mɛɛ waa fanɛ anyɛ kɛ fan baa fan sʋ kufuu. Amaa fan nyɛ Kayaayu mʋ nɩɩ kɩɩ waa fanɛ Ɩbwaarɛ mu‐bii ana. Ɩmʋ ɔlʋn tɔ nɩɩ an taalɛ tɩɩ Ɩbwaarɛ yɛ, “Abaa! Anɛ‐Sɛ.” 16 Ɩbwaarɛ Kayaayu mʋ gbaa‐gbaa ɩ lɛɛ ɩ kaapʋ anɛ nkɔlɔ tɔ kesintin fɛɛ an gyɛ Ɩbwaarɛ mu‐bii ana. 17 Nɩɩ a maa gyɛ mu‐bii ana falɛ sʋ mʋ, an biti a nyɛ kʋtɔ mʋ nɩɩ ɔ da mʋ kɔkɔlɔ sʋ yɛ ee biti ɔ sa anɛ mʋ. Nɩɩ anaa Krisito an biti a bʋga nyɛ kanɩn kʋtɔ maŋa. Amɔɔ ana mʋ an bʋga gyii mʋ awʋrʋfɔ mʋ, pɔyɩ kɛ ana mʋ a bʋga gyii mʋ bʋnyaa mʋ.

18 Nɩɩ n wu fɛɛ nbɩɩnbɩɩ awʋrʋfɔ mʋ nɩɩ an gyii falɛ mʋ, ɔkʋ mɛɛ taalɛ taa kaala bʋnyaa mʋ nɩɩ Ɩbwaarɛ ii biti ɔ lɛɛ kaapʋ anɛ mʋ. 19 Ɩbwaarɛ atɔ tʋʋsa mʋ kpini bɛɛ gyʋgyʋʋ ba gyoo Ɩbwaarɛ ɔ ba lɛɛ mu‐bii ana mʋ kaapʋ. 20 Nɩɩ atɔ tʋʋsa mʋ kpini ɩ ba waa atɔ kɩyan mʋ nɩɩ ɩ man gyɛ ɩmʋ kebiti sʋ, amaa Ɩbwaarɛ ɩ waa ɩmʋ kanɩn kɛ ɔ sa ɩmʋ tamaa. 21 Lɩɩ fɛɛ atɔ tʋʋsa mʋ kpini bee biti ba kɔɔlɛ bamʋ n‐yɩɩ lɩɩ lewu yɛ kinyita tɔ, kɛ ba ba nyɛ bamʋ n‐yɩɩ yɛ bʋnyaa mʋ nɩɩ ɩ dɛ sa Ɩbwaarɛ mu‐bii ana mʋ.

22 Nɩɩ an nyi fɛɛ atɔ tʋʋsa mʋ kpini bɛɛ yɩyɛɛ ba fʋʋ halɩɩ ndaga, fɛɛ kanan mʋ nɩɩ ɔkyɩɩ ii duŋi mʋ. 23 Nɩɩ ɩ man gyɛ ɩmʋ nkʋn ɩɩ yɩyɛɛ, amaa anɛ gbaa‐gbaa mʋ nɩɩ an nyɛ Kayaayu mʋ nɩɩ kɩ gyɛ Ɩbwaarɛ kakɛɛ gyankpaasa mʋ gbaa an yɩyɛɛ anɛ nkɔlɔ tɔ. An yɩyɛɛ an gyoo kakɛ mʋ nɩɩ Ɩbwaarɛ ii biti ɔ taa anɛ waa mu‐bii ana, kɛ ɔ kɔɔlɛ anɛ kayɩɩ‐wʋlɛ yɛgɛ mʋ. 24 Lɩɩ tamaa mʋ nɩɩ an sʋ mʋ sʋ mʋ, Ɩbwaarɛ mɔlɩgɛ anɛ. Amaa nɩɩ ɔkʋ sʋ tamaa lɩɩ kʋtɔ mʋ nɩɩ ɔ tɛɛ wʋla wu mʋ, man gyɛ tamaa kpini‐kpini. Nɩɩ anɩmʋ ɩ sʋ tamaa kʋtɔ mʋ nɩɩ ɔ tɛɛ wʋla ɔ sʋ mʋ sʋ? 25 Amaa kʋtɔ mʋ nɩɩ an man pɩɩta nyɛ nɩɩ an sʋ ɩmʋ sʋ tamaa mʋ an nyɛ kenyiita nɩn an gyoo kɩmʋ.

26 Kanɩn ɔkpa kʋlʋn sʋ nɩɩ Kayaayu mʋ ɩ kyɛ anɛ tɔ saŋa mʋ nɩɩ anɛ n‐yɩɩ ɩ yɔɔ anɛ mʋ. Kpalɩ fɛɛ a maa man nyi kʋtɔ mʋ nɩɩ a kʋlɛ, nɩɩ a man nyi kanan mʋ nɩɩ a tɔwɛ anɛ kabwaarɛ‐kʋlɛ tɔ mʋ, Kayaayu mʋ gbaa‐gbaa ii muusi ɛɛ tɔwɛ atɔwɛ‐bi mʋ nɩɩ ɔkʋ mɛɛ taalɛ taa kɔnɔ tɔwɛ nɩɩ ɔ yɩlɛ tɔ ɛɛ kʋlɛ ɛɛ kyɛ anɛ tɔ. 27 Nɩɩ Ɩbwaarɛ mʋ nɩɩ o nyi anɛ nkɔlɔ tɔ mʋ, nyi nfɛɛrɛ mʋ nɩɩ ɩ bʋ Kayaayu mʋ tɔ, lɩɩ fɛɛ Kayaayu mʋ ɩ yɩlɛ tɔ ɛɛ kʋlɛ ɛɛ sa akɔɔlɛ‐gyipu mʋ lɩɩ Ɩbwaarɛ kebiti sʋ.

28 Nɩɩ an nyi fɛɛ atɔ kʋmaa mʋ nɩɩ ɩ ba mʋ, Ɩbwaarɛ sʋ ɩmʋ kpini ɛɛ waa kusun, kɛ i kpee naa lʋwɛ danbɩrasa sa bamʋ nɩɩ bee biti mʋ asɩn mʋ. Bamʋ ɩ gyɛ asa mʋ nɩɩ Ɩbwaarɛ wʋla tɩɩ, fɛɛ kanan mʋ nɩɩ ɔ wʋla tɔwɛ yɩla mʋ. 29 Nɩɩ bamʋ nɩɩ Ɩbwaarɛ wʋla o nyi mʋ, nɩɩ ɔ lɛɛ bamʋ yɩla kɛ ba ba waa fɛɛ mu‐bii keduli mʋ, kɛ mu‐bii mʋ ɔ ba waa nbii damantɛ mʋ tɔ obii gyankpaasa. 30 Nɩɩ bamʋ nɩɩ ɔ lɛɛ yɩla mʋ, ɔ tɩɩ bamʋ, nɩɩ bamʋ nɩɩ ɔ tɩɩ mʋ, ɔ tɔwɛ yɛ bamʋ ɩkpa i kyiigi mʋ asɛ, nɩɩ bamʋ nɩɩ bamʋ ɩkpa i kyiigi mʋ asɛ mʋ, ɔ taa mʋ bʋnyaa mʋ sa bamʋ.

31 Ɩnɩmʋ kpini kamaa mʋ, mɩnɛ nɩɩ an biti a tɔwɛ? Fɛɛ nɩɩ Ɩbwaarɛ kan ɔ yɩlɛ anɛ kamaa mʋ, anɩmʋ ɩ taalɛ kɔ yɛ anɛ? 32 Nɩɩ Ɩbwaarɛ mʋ nɩɩ ɔ man kina mu‐bii kɩtaa sa, nɩɩ lɩɩ anɛ alibi sʋ mʋ, ɔ yɛgɛ nɩɩ o be wu sa anɛ mʋ, mɩnɛ sʋ nɩɩ ɔ mɛɛ yɛ ɔ taa atɔ kpini tii mʋ sʋ bwaala anɛ? 33 Nɩɩ Ɩbwaarɛ gbaa‐gbaa maa tɔwɛ yɛ an gyii asʋ mʋ, anɩmʋ ii biti ɔ taalɛ pwɩɩ anɛ mʋ nɩɩ Ɩbwaarɛ wʋla lɛɛ yɩla sa mʋ n‐yɩɩ mʋ? 34 Anɩmʋ ɩ gyɛ ɔmʋnɩ o bun anɛ kʋpwɛ? Yesu Krisito abɛɛ. Ayee! Mʋ i wu sa anɛ nɩɩ o kyiŋi lɩɩ lewu tɔ sa anɛ, nɩɩ ɔ tɛ Ɩbwaarɛ gyisa sʋ ɔ yɩlɛ tɔ ɛɛ kʋlɛ ɛɛ kyɛ anɛ tɔ. 35 Mɩnɛ ɩ taalɛ barɩgɛ anɛ lɩɩ Krisito kebiti mʋ tɔ? Kayɩyɛɛ, abɛɛ kɩkpɩnɛ, abɛɛ kanyanla, abɛɛ akʋn, abɛɛ kitiri, atɔ mʋ nɩɩ a sʋ kufuu, abɛɛ kɩmɔmɔ? Ɩnɩmʋ kpini ɩ mɛɛ taalɛ barɩgɛ anɛ lɩɩ Yesu kebiti mʋ tɔ. 36 N tɔwɛ kanɩn lɩɩ fɛɛ Asɩnkyan yɩlasa mʋ ɩ tɔwɛ yɛ,