1 Nɩɩ fanɛ akɔɔlɛ‐gyipu mʋ tɔ ɔkʋ kɩkɔɔlɛ‐gyii kɩ man bʋlʋn mʋ, fan kɔɔlɛ mʋ, amaa fan man gyii mʋ ɩmɔɔrɛ. 2 A taa fɛɛ ɔkʋ kɩkɔɔlɛ‐gyii kɩ yɛgɛ nɩɩ ɛɛ taalɛ gyii kʋtɔ kʋmaa, amaa ɔkʋ mʋ nɩɩ mʋ kɩkɔɔlɛ‐gyii kɩ man bʋlʋn mʋ, ee gyii afatɛɛ ɩpʋ nkʋn. 3 Ɔsa mʋ nɩɩ ee gyii kʋtɔ kʋmaa nɩmʋ mʋ, ɔ man kɩɩ ɔsa mʋ nɩɩ o mee gyii ɩmʋ mʋ kɩyan. Nɩɩ ɔsa mʋ nɩɩ o mee gyii kanɩn atɔ mʋ, ɔ man pwɩɩ ɔsa mʋ nɩɩ ee gyii kanɩn atɔ mʋ, lɩɩ fɛɛ Ɩbwaarɛ kyula sa mʋ. 4 Ɩmʋ sʋ, fʋ ɩ gyɛ anɩmʋ nɩɩ fɩɩ pwɩɩ ɔkʋ kɩyaafɔlɛ? Mʋ‐Nyɩrɩpɛ Ɩbwaarɛ mʋ gbaa‐gbaa ɩ taalɛ wu fɛɛ ɔ yɩlɛ tɔ abɛɛ ɔ waa tɩyɛ. Nɩɩ ee biti ɔ taalɛ yɩlɛ, lɩɩ fɛɛ Ɔnyɩrɩpɛ Ɩbwaarɛ ii biti ɔ yɛgɛ ɔ taalɛ yɩlɛ.

5 Ɔkʋ sʋ nfɛɛrɛ fɛɛ kakɛ kʋ ki tiri kɩ kyɔ nkɛ nkʋ, nɩɩ ɔkʋ mɔɔ ɩ kɩɩ fɛɛ nkɛ mʋ kpini ɩ gyɛ kyɛɛkyɛɛ. Fanɛ ɔkʋmaa nɩmʋ nfɛɛrɛ mʋ nɩɩ ɔ fɛ yɛ ɩ bʋrɔn mʋ, ɔ yɩlɛ ɩmʋ tɔ. 6 Ɔmʋ nɩɩ ɛɛ kɩɩ fɛɛ kakɛ kʋ ki tiri mʋ, ɛɛ waa kanɩn ɛɛ sa Ɔnyɩrɩpɛ Ɩbwaarɛ. Nɩɩ ɔmʋ nɩɩ ee gyii kunun mʋ, ee gyii yɛgɛ ɛɛ taa bɛɛrɛɛ ɛɛ sa Ɔnyɩrɩpɛ Ɩbwaarɛ. Lɩɩ fɛɛ ɔ sʋ afwaala ɛɛ sa Ɩbwaarɛ. Nɩɩ ɔmʋ nɩɩ o mee gyii mɔɔ mʋ, ɛɛ waa kanɩn ɔ sʋ bɛɛrɛɛ ɛɛ sa Ɔnyɩrɩpɛ Ɩbwaarɛ, kɛ mʋ gbaa mʋ ɔ taa afwaala sa Ɩbwaarɛ. 7 Nɩɩ anɛ ɔkʋ man bʋ tɔ nɩɩ ɔ tɛ sa mʋ n‐yɩɩ, nɩɩ kanɩn gbaa nɩɩ fu wu mʋ, fʋ man wu sa fʋ n‐yɩɩ. 8 Nɩɩ an kan a tɛ nkpa tɔ, an tɛ sa Ɔnyɩrɩpɛ mʋ nɩn. Nɩɩ an kan wu gbaa mʋ, an san an gyɛ Ɔnyɩrɩpɛ mʋ lɛɛ. Ɩmʋ sʋ an tɛ nkpa tɔ nɩn oo, an wu nɩn oo, an gyɛ Ɔnyɩrɩpɛ mʋ lɛɛ.

9 Krisito wu nɩɩ o bwii kyiŋi ba nkpa tɔ, lɩɩ falɛ sʋ nɩɩ ɔ gyɛ Ɔnyɩrɩpɛ sa bamʋ nɩɩ ba tɛ nkpa tɔ yɛ alewupu. 10 Ɩmʋ sʋ mɩnɛ ɩ waa nɩɩ fii bun fʋ bɩrɩsa kʋpwɛ, abɛɛ nɩɩ fɩɩ kɩɩ fʋ bɩrɩsa kɩyan? Lɩɩ fɛɛ anɛ kpini an biti an naa yɩlɛ Ɩbwaarɛ ansi tɔ, kɛ o gyii anɛ asɩn.

11 Kpalɩ fɛɛ Ɔnyɩrɩpɛ Ɩbwaarɛ tɔwɛ Isaya Asɩnkyan yɩlasa ɔwʋlɛ mʋ tɔ yɛ,

13 Kanɩn sʋ, fan yɛgɛ kɛ a yɛgɛ abaa kʋpwɛ kubun. Amaa fan man waa atɔ mʋ nɩɩ ii biti ɩ yɛgɛ fanɛ bɩrɩsa ana ba siti abɛɛ ba waa alibi. 14 Ɔnyɩrɩpɛ Yesu maa lɛɛ kaapʋ mɛ, nɩɩ n kɔɔlɛ gyii fɛɛ kʋtɔ kʋ kɩ man bʋ tɔ nɩɩ kɩ gyɛ kʋtɔ kisisa kɩmʋ kɩbaa sʋ. Amaa nɩɩ ɔkʋ kan kɩɩ fɛɛ kʋtɔ kʋ kɩ gyɛ ikisii bɩrɛ, kɩ gyɛ ikisii sa mʋ. 15 Fɛɛ nɩɩ ɩ kan ɩ gyɛ fu agyitɔ gyisa sʋ, nɩɩ fʋ bɩrɩsa kɔkɔlɔ ki nyita mʋ mʋ, kanɩn bɩrɛ fʋ awaasa ɩ mɛɛ kaapʋ kebiti. Man taa fu agyitɔ gyisa nyita fʋ bɩrɩsa mʋ nɩɩ Krisito wu sa mʋ mʋ 16 Man yɛgɛ kʋtɔ mʋ nɩɩ fii nyi fɛɛ kɩ gyɛ kʋtɔ danbɩrasa mʋ, ki biliŋi kʋtɔ libi asa asɛ. 17 Lɩɩ fɛɛ Ɩbwaarɛ kuwura‐gyii tɔ kakyɩna mʋ tɔ mʋ, ɩ man gyɛ kegyi yɛ kunuu asɩn nɩn, amaa ɩ gyɛ awaasa danbɩrasa yɛ kayɩɩ yuuli yɛ kensi‐gyii mʋ nɩɩ Kayaayu Kyɩrɛkyɩrɛ mʋ kɩɩ sa mʋ. 18 Lɩɩ fɛɛ ɔkʋmaa mʋ nɩɩ ee sun Krisito falɛ ɔkpa sʋ mʋ, ɩɩ bɔla Ɩbwaarɛ ansi, nɩɩ asa gbaa bee wu yɛ ɩ bʋrɔn.

19 Ɩmʋ sʋ fan yɛgɛ a kpan anɛ n‐yɩɩ waa kʋtɔ mʋ nɩɩ kɩɩ bɩya kayɩɩ yuuli, kɛ a kyɛ abaa tɔ kɛ a dan anɛ kɩkɔɔlɛ‐gyii tɔ. 20 Fan man kpalɩ agyitɔ sʋ nyita Ɩbwaarɛ kusun. Agyitɔ kpini ɩ bʋrɔn, amaa ɩ man dɛ ɔkpa fɛɛ fu gyii agyitɔ kʋ kɛ ɩ yɛgɛ fʋ bɩrɩsa ɔ waa alibi. 21 Ɩ bʋrɔn fɛɛ fu man gyii kunun kɛ fu man nuu nta abɛɛ kʋtɔ kʋmaa mʋ nɩɩ kii biti kɩ yɛgɛ fʋ bɩrɩsa ɔ tɩyɛ.

22 Ɩmʋ sʋ kʋtɔ kʋmaa mʋ nɩɩ fʋ kɔɔlɛ gyii lɩɩ atɔ nɩmʋ sʋ mʋ, yɛgɛ ɩ baa ɩ bʋ faa Ɩbwaarɛ nsana. Kumu ɔkɔn wuya ɩ gyɛ ɔsa mʋ nɩɩ ɔ man bun mʋ n‐yɩɩ kʋpwɛ lɩɩ kʋtɔ mʋ nɩɩ ɔ kɩɩ fɛɛ kɩ bʋrɔn sa mʋ mʋ sʋ. 23 Amaa ɔsa mʋ nɩɩ mʋ nfɛɛrɛ i du sika‐sika lɩɩ kʋtɔ kigyii sʋ yɛgɛ nɩɩ ee gyii kɩmʋ mʋ, Ɩbwaarɛ ɩ wʋla bun mu kʋpwɛ. Lɩɩ fɛɛ mʋ kigyii mʋ man lɩɩ mʋ kɩkɔɔlɛ‐gyii tɔ. Nɩɩ awaasa kʋmaa mʋ nɩɩ ɩ man lɩɩ kɩkɔɔlɛ‐gyii tɔ mʋ gyɛ alibi nɩn.