23
Itamiya camanal David
1 Ya ni itamiya camanal David:
“Na niDavid, niicone Isaí, nicamanalti.
Na cati Toteco Dios techhueyitalijtoc.
Na cati techtapejpeni huan techchijqui nitanahuatijquet,
Toteco Dios, yaya cati iDios tohuejcapan tata Jacob.
Na cati Toteco techmacac miyac huicat yejyectzitzi para tiisraelitame hueli ica tijpaquilismacase.
2 Itonal TOTECO quitequihuía nocamac para ma niquijto icamanal.
Toteco quichijqui para icamanal ma quisa nocamaco.
3 Yaya Toteco toDios tiisraelitame nechcamanalhuijtoc.
Yaya cati ipan tiisraelitame timochiyaj techilhui:
‘Hualas se cati tanahuatis xitahuac campa masehualme.
Yaya techimacasis huan tanahuatis quej monequi.
4 Yaya elis quej nopa taahuili cati quisa cualca.
Elis quej quema taahuijtihuala tonati yejyectzi ica ijnaloc quema amo onca yon quentzi mixti.
Yaya temacas paquilisti quej techmaca paquili para chamanis sacat ipan tali quema yancuic taquiyajtoc.’
5 Huan Toteco Dios quintapejpenijtoc nochaj ehuani cati teipa tacajtiyase para tanahuatise iixpa.
Huan nohuaya quichijtoc se camanal sencahuali para nochipa cati quipiya nochi cati mocajtoc ica na para techchihuilis teipa.
Nopa camanal sencahuali cati nohuaya quichijqui quipiya nochi tanahuatili cati monequi huan elis temachti para nochipa.
Temachti yaya quitamichijtiyas sesen tamanti cati techilhuijtoc quichihuas ica noixhuihua huan nochi quisas cuali para na.
Masque noja polihui para panos,
nijmati para se tonali panos nochi cati nijnequisquía ma onca pampa quej nopa noca mocajtoc.
6 Pero nochi cati amo quitepanitaj Toteco itztose quej huitzti cati tijcuatepehuaj huejca.
Amo aqui quinequis quinitzquis ica imax.
7 Huan sinta acajya quitzontequisnequis nopa huitzti,
monequi momapiquis huan quihuicas itepos cuatopil para amo quimachajcos.
Monequi quintatis ipan tit huan senquisa quitamiltis.”
Inintoca isoldados David cati más motemacayayaj.
(1 Cr. 11:10-47)
8 Ya ni inintoca nopa eyi tacame cati más tetique huan más motemacayayaj ten nochi isoldados David. Yaya cati más hueyi ten nopa eyi itoca Joseb Basebet cati ten Tacmon cati quinyacanqui nopa eyi. Ica icuatamin quinmicti 800 tacame ipan se tatehuilisti.
9 Nopa ompa hueyi soldado itoca Eleazar cati elqui icone Dodo huan iixhui Ahohi. Eleazar monexti para nelía motemacayaya quema san ni eyi tacame huan David mocajque para quintehuise nopa filisteos. Huan nochi sequinoc israelita soldados cholojque. 10 Huan Eleazar pejqui quinmictía filisteos ipan nopa tonali, huan quinmictijtiyajqui hasta tahuel siyajqui. Huan macuatiyaya hasta amo hueliyaya quimajcahua imacheta. Huan Toteco nelía quipalehui David huan nopa eyi soldados, huan yeca tahuel tatanque ipan nopa tonali. Huan teipa nopa sequinoc israelitame cati cholojtejtoyaj tacuepilijque san para quinquixtilise nopa filisteo soldados cati mictoyaj nochi cati ipati cati quihuicayayaj.
11 Huan nopa expa hueyi soldado itoca eliyaya Sama, icone Age, ten altepet Harar. Se tonali mosentilijque se hueyi pamit ten filisteo soldados para quintehuise israelitame campa itoca Lehi. Huan nochi sequinoc israelita soldados nopona cholojtejque. 12 Huan Sama moquetzqui tatajco se mili ten miyac lentejas huan iseli quintehui huan quimanahui nopa mili huan quinmicti miyac filisteos ipan nopa tonali. Tahuel quintanqui, pampa TOTECO quipalehui.
13 Se tonali quema pixquisti, nopa filisteo soldados mosentilijtoyaj ipan tamayamit Refaim huan campa hueli pixcayayaj. Nojquiya calactoyaj miyac filisteo soldados ipan altepet Belén, 14 huan huajca David mocahuayaya ipan nopa ostot nechca Adulam pampa más temachti. Huan nopona hualajque quipaxalocoj eyi soldados ten nopa 30 itayacanca soldados David cati más motemacayayaj. 15 Huan David quiijto: “¡Nelía cuali elisquía para niquis se quentzi ten nopa cuali at ten ne ameli cati eltoc iteno nopa caltemit para calaquis ipan Belén!”
16 Huajca nopa eyi tacame cati nelmotemacayayaj quisque huan quiixcotonque campa itztoyaj nopa filisteos huan quiquixtijque at ipan nopa ameli nechca altepet Belén huan quihuiquilijque David. Huan ya mocueso ica cati quiijtojtoya huan amo quiic. San quitoyajqui talchi iixpa TOTECO quej se tacajcahualisti. 17 Huan quiijto: “TOTECO, ¿quenicatza niquisquía ni at? Elisquía quej niquisquía inieso ni tacame cati motemacaque para techcuilitoj, pampa huelis mictosquíaj san por cati niquijto.”
Quej nopa motemacayayaj ni eyi tacame cati quipaxalotoj David.
18 Huan Abisai, iicni Joab huan icone Sarvia, quinnahuatiyaya nopa 30 tacame cati más motemacayayaj ipan tatehuilisti. Se tonali iseli moixnamijqui ica 300 icualancaitacahua huan quinmicti ica icuachoso. Yeca ya nojquiya hueyi quej nopa achtohui eyi cati niquintocaxti para más motemacayayaj ten isoldados David. 19 Abisai eliyaya más hueyi que nopa 30 huan yeca mochijqui inintayacanca. Huan nochi quiixmatque Abisai para hueyi, pero amo eliyaya se ten nopa eyi cati más taixmatilme.
20 Huan Benaía, icone Joiada, ten altepet Cabseel eliyaya se tacat cati tahuel motemacayaya. Ipan tali Moab quinmicti ome iconehua Ariel cati eliyayaj huejcapantique. Huan se tonali quema tasehuetziyaya quipanti se tecuani cati itoca león huan quimicti ipan se ostot. 21 Huan seyoc huelta Benaía quihuicayaya se cuahuit huan pejqui quitehuía se tacat huejcapantic ten tali Egipto huan nopa tacat quihuicayaya icuachoso huehueyac imaco. Huan Benaía quiquixtili icuachoso huan ica quimicti. 22 Tamanti quej ni quichijtihualayaya Benaía, huajca nojquiya nochi quiixmatque para hueyi quej nopa eyi tacame pampa tahuel motemacaque. 23 Pero amo eliyaya se ten inijuanti. Pero nopa 30 soldados cati tahuel motemacayayaj quitepanitaque miyac Benaía. Huan David quitequitali ma quinnahuati isoldados cati itztoyaj ihuaya ya para quimocuitahuise.
Nopa soldados cati más motemacayayaj
24 Ipan nopa 30 soldados cati más motemacayayaj itztoyaj ya ni:
Asael, iicni Joab,
Elhanán, icone Dodo, ten altepet Belén,
25 Sama ten altepet Harod,
Elica ten altepet Harod,
26 Heles ten altepet Palti,
Ira, icone Iques, ten altepet Tecoa,
27 Abiezer ten altepet Anatot,
Mebunai ten altepet Husah,
28 Salmón ten altepet Ahoh,
Maharai ten altepet Netofa,
29 Heleb, icone Baana, ten altepet Netofa,
Itai, icone Ribai, ten altepet Gabaa ipan inintal iixhuihua Benjamín,
30 Benaía ten altepet Piratón,
Hidai cati ehuayaya campa itaixtemolis Tepet Gaas,
31 Abi Albón ten altepet Arba,
Azmavet ten altepet Bahurim,
32 Eliaba ten altepet Saalbón,
Jonatán, se icone Jasén,
33 Sama ten altepet Arar,
Ahíam, icone Sarar, cati nojquiya hualajqui ten altepet Arar,
34 Elifelet, icone Ahasbai, ten altepet Maaca,
Eliam, icone Ahitofel, ten altepet Gilo,
35 Hezrai ten altepet Carmel,
Paarai ten altepet Arba,
36 Igal, icone Natán, ten altepet Soba,
Bani, ten altepet Gad,
37 Selec ten altepet Amón,
Naharai ten altepet Beerot (cati eliyaya itamocuitahuijca Joab, icone Sarvia),
38 Ira ten altepet Itra,
Gareb ten altepet Itra,
39 huan Urías, nopa heteo tacat.
Huajca ica nochi eliyayaj 37 isoldados David cati más motemacayayaj para tatehuise.