12
Huicat ten tascamatili para TOTECO
1 Hualas se tonali quema masehualme huicase:
“Nimitzhueyitalía, TOTECO.
Masque tahuel ticualaniyaya ica na,
ama timoyoltalijtoc huan techtasojtatoc.
2 Xiquitaca anmasehualme, Toteco Dios yaya notemaquixtijca.
Huajca nimotemachis ipan ya huan ayecmo nimajmahuis.
TOTECO itztoc cati techmaca nochicahualis huan yeca san para ya nihuicas.
San yaya notemaquixtijca.
3 Quej se ajhuiyac at quinmaca paquilisti cati amiquij,
quej nopa tipaquij tojuanti, tiimasehualhua TOTECO cati yaya techmaquixtijtoc.”
4 Huan ipan nopa tonali quiijtose:
“¡Xijtascamatica TOTECO!
¡Xijhueyitalica ya!
¡Xitepohuilica ipan nochi talme nopa huejhueyi tamanti cati yaya quichijtoc!
¡Xiteilhuica para TOTECO yaya nelía hueyi!
5 Xihuicaca tiohuicat para TOTECO pampa yaya quichijtoc huejhueyi tamanti.
Ma quimatica taya quichijtoc nochi ipan taltipacti.
6 Huan ma huicaca huan ma tzajtzica ica paquilisti,
nochi cati itztoque ipan altepet Jerusalén.
Pampa tatajco ten tojuanti itztoc TOTECO cati nelía hueyi,
Quena, yaya nopa Dios cati Tatzejtzeloltic huan itztoc tohuaya tiisraelitame.”