118
Ma tijtascamatica Toteco
1 ¡Xijpaquilismacaca TOTECO pampa yaya nelía cuali!
Itaicnelijcayo amo quema tamis.
2 Nochi anisraelitame xijhueyimatica Toteco huan xiquijtoca:
“Itaicnelijcayo Toteco amo quema tamis.”
3 Nochi antotajtzitzi cati aniixhuihua Aarón nojquiya xiquijtoca:
“TOTECO itaicnelijcayo amo quema tamis.”
4 Nochi amojuanti cati anquitepanitaj TOTECO xiquijtoca:
“TOTECO itaicnelijcayo amo quema tamis.”
5 Quema nimotequipachohuayaya,
nijtzajtzili TOTECO,
huan yaya nechnanquili huan nechmanahui.
6 TOTECO itztoc nohuaya para nechpalehuis,
yeca ayecmo nimajmahui,
yon amo niquimacasi cati huelis nechchihuilise masehualme.
7 TOTECO itztoc nonechca.
Yaya nechpalehuis.
¡Huan temachti niquitas cati nijnequi ma ininpanti nocualancaitacahua!
8 Más cuali nimotemachis ipan TOTECO huan amo ipan se tacat.
9 Más cuali nimomanahuis ipan TOTECO huan amo ipan se hueyi tanahuatijquet.
10 Masque nochi masehualme ten nochi talme ma nechyahualoca para nechtehuise,
na niquintzontamiltis ica ichicahualis TOTECO.
11 Quena, masque nechyahualose huan nechtehuise,
na niquintanis pampa nijhuica itequiticayo TOTECO.
12 Nocualancaitacahua hualajque ipan na quej sayolime,
huan cualanque chicahuac quej tit cati quitatía nochi huitzti.
Pero na niquintzontamilti ica itequiticayo TOTECO.
13 Nocualancaitacahua quichijque campeca para nechmictise,
pero TOTECO yaya nechpalehui.
14 TOTECO nechpixtoc imaco,
huan yeca nihuica para ya pampa nechchijtoc ma nitatani.
15 Ipan ininchajchaj cati monejnemiltíaj xitahuac iixpa TOTECO tahuejchihuaj huan huicaj ica paquilisti,
pampa TOTECO quinmaquixtía huan quichihua huejhueyi tamanti.
16 Ichicahualis TOTECO nelía hueyi huan quichihua huejhueyi tamanti.
17 Amo nimiquis.
Pero niitztos para nitepohuilis nochi cati TOTECO quichijtoc.
18 Toteco nechtatzacuilti chicahuac,
pero amo nechtemactili para ma nimiqui.
19 Xijtapoca icaltenyo itiopa TOTECO,
pampa nijnequi nicalaquis para nijtascamatis TOTECO.
20 Ipan ni caltemit calaquij para yahuij hasta iixpa TOTECO,
huan nopona calaquise nochi cati tatzejtzeloltique iixpa.
21 Nijhueyimatis noTeco Dios, huan nijtascamatilis miyac,
pampa nechtacaquili huan nechmaquixti ten nocualancaitacahua.
22 Calchihuani quicuamajcajque se hueyi tet cati amo quinejque quitequihuise,
pero ama nopa hueyi tet eltoc cati más monequi para yas calesquina huan ipan quiquetzase nopa cali.
23 Nochi ya ni quichijtoc TOTECO huan cuajcualtzi nesi.
24 Inin nopa tonali cati TOTECO quichijqui.
Ma tipactoca ipan ni tonali.
25 Nijtajtanía TOTECO ama ma techmaquixti tojuanti ten tocualancaitacahua.
Techpalehui ama para tiquisase cuali.
26 ¡Ma TOTECO mitztiochihua ta cati tihuala ipan itoca*118:26 O ica itequiticayo.!
Timitztiochihuaj hasta campa ichaj TOTECO.
27 TOTECO yaya Dios, huan yaya techtaahuilía.
Nijhualiquilis notacajcahualis huan nijtalis ipan itaixpa para nijmacas.
28 Pampa yaya noTeco Dios, yeca nijtascamati huan nijhueyimati.
29 ¡Xijtascamatica TOTECO pampa yaya nelía cuali!
Itaicnelijcayo amo quema tamis.