Ŋwa wù fwe wù Bol gɛ̀ saŋ fɛ kintaashɛ ki
Kolɛŋ le
Fiɛɛ fì le a Ŋwa wu Kolɛŋ wù fwe wunɛ le
Kintaashɛ ki bamii ba mbɛmɛ ki Kolɛŋ gɛ̀ kɛ Bol. Wu gɛ̀ saŋ ŋwa wù fwe wunɛ ki wu têfɛ bo kune fitele fì bo leese yi Kletu le mo mwɛɛ mumu kune Kletu. Kolɛŋ yanɛ gɛ̀ bee kijusɛ ki waaŋ gɛ̀ juune lo yo, bamii ba yo chiaase ye kune kinche ki woŋ wuboo, fiɛɛ fì kune nyiɛŋ yi kinjaŋ nyume tɛ yo baaŋ, bo tɛ buune banyo ba duude. Bol jɛme wu chiise a ŋwa wunɛ le kune mwɛɛ mù mbefe mù gɛ̀ kooshi antɛnɛɛ a bamii ba mbɛmɛ. Baŋwa ba 13 a ŋwa wunɛ le duunyi lɛ kiŋkoŋɛ le nnya yi Nyo yì fede lo nnya yichii. Baŋwa ba 13 bayu duunyi lɛ le kimbe ki bamii kee ki baaŋ a ŋwa wuyu wunɛ le.
Bikwɛɛ bi mwɛɛ mù le a Ŋwa wunɛ le
1:1-9 Fɛŋkɛɛ
1:10–4:21 Kiŋgaye antɛnɛɛ a kintaashɛ ki bamii ba mbɛmɛ
5:1–7:40 Kune kinche ki nyiɛŋ yi kinjaŋ mo ki kwɛse bɛ jwɛŋsɛ
8:1–11:1 Kune bamii ba Kletu bɛ ba le gɛ bamii ba Kletu gɛ
11:2–14:40 No taŋlo kintaashɛ ki bamii ba mbɛmɛ gêe mwɛɛ bɛ je yì bo bûune yu
15:1-58 Bamii ba mbɛmɛ lé bo gê bo bû yi kwe le no Jiso gɛ̀ bu
16:1-4 Nnya yi bo gɛ̀ nyaa ki bo fî bamii ba Kletu ba Judia yu
16:5-24 Nseesɛ wù Bol gɛ̀ gee mo kimɛsɛ ki mwɛɛ
1
1 Le mɛ wù Bol wù Nyo gɛ̀ balɛ no wu gɛ̀ goone, lɛ mɛ nyûme mwa ntuŋ wu Kletu Jiso. Nle bɛ Sostɛne wù mwa bwe wese besabɛŋ. 2 Ŋwa wunɛ gɛɛne fɛ kintaashɛ ki bamii ba Nyo ba Kolɛŋ ba wu le wu baa wu taashɛ wu gɛɛ yeye bɛ Kletu Jiso. Nyo gɛ̀ bee wu baa bɛŋ lɛ bɛŋ nyûme bamii be ba mbɛmɛ, mo bamii bachii ba tɛŋe jee chi Tada Jiso Kletu manjuu le manchii. Wu le Tada wuboo yɛɛŋyɛɛŋ no wu le wese besabɛŋ. 3 Nyo wù Chiji wese besabɛŋ bɛ Tada Jiso Kletu dûnyɛ fitele fì joŋe fɛ bɛŋ le, bo ka bo nyâ bɛŋ bɛ muntele mù nyiɛgee.
Bol nya kiyone no Nyo le wu buu bamii ba Kolɛŋ
4 Nto nnyaa kiyone Nyo waŋ le segechii nje bɛŋ, nje nfii wù Nyo nya fɛ bɛŋ le, no bɛŋ le bɛŋ taashɛ bena ba Kletu Jiso. 5 No bɛŋ le bɛŋ taashɛ bena ba wu noo, Nyo mo wu chvu lo nnya ye yi bɛŋ le jé le yichii, bɛŋ ka kee ki bɛŋ jɛ̂me fiɛɛ fichii chuule bɛ ki bɛŋ kêe fiɛɛ fichii. 6 Nnya yinɛ fɛ bɛŋ le, yi toone saaka wù bɛŋ gɛ̀ yu wa kune Kletu no bɛŋ gɛ fi. 7 Noo, mɛɛse gɛ bɛŋ fuge nnya yi Nyo yimi gɛ, no bɛŋ chiɛɛne kife kì Tada wese besabɛŋ wù Jiso Kletu lé wu gê wu kâasɛ wu to bɛŋ yɛ̂ŋ wu le. 8 Wu wù Tada wese besabɛŋ wù Jiso Kletu, lé wu gê bɛŋ lɛ̂me bɛŋ tɛ̂ɛme gɛɛne mɛɛse, bɛŋ gɛ to bɛŋ kɛme jialɛ yi juu che chiyu le gɛ. 9 Nyo le Nyo wù to wu lɛme gɛh yi jɛ ye le. Le wu wù gɛ̀ balɛ bɛŋ, bɛŋ bɛ Mwa ye wù Jiso Kletu wù le Tada wese besabɛŋ le bɛŋ taashɛ bɛŋ tu yi fiɛɛ le fimimia.
Nteefɛ kune kiŋgaye
10 Booŋ ba bwɛɛŋ, nlɛge bɛŋ a jee chi Tada wese besabɛŋ wù Jiso Kletu le lɛ bɛŋ bachii tâashɛ bɛŋ nyûme jwe wu mumwaa. Keefɛ kiŋgaye nyûme a bɛŋ ntɛnɛɛ gɛ. Bɛŋ nyûme yi muh le wu mumwaa, bɛŋ kɛ̂me ŋkwajɛ wu mumwaa, bɛŋ lɛ̂ne yi fiɛɛ le fimimia. 11 Njɛme nɛ booŋ ba bwɛɛŋ, nje bamii ba a Kloy yeh le bo sɛɛŋ wa mɛ lɛ bɛŋ kɛme waa a bɛŋ ntɛnɛɛ. 12 Fiɛɛ fì njɛme le lɛ, muh jade wu mo wu duu lɛ wu bii fie nyu Bol le, muh mu duu lɛ wu bii nyume Abolo le, muh mu lɛ wu bii Sɛfa le,*Jee chi Sɛfa chinɛ le tɛ lɛ Bita. muh mu lɛ wu bii gɛh fie nyume Kletu le. 13 Fi le lɛ ba le ba ga wa Kletu bimbe le bimbe le? Le Bol wu ba gɛ̀ ta yi kintaaŋ le nje bɛŋ? Noo ba gɛ̀ leese bɛŋ a joo a jee chi Bol le le? 14 Nnyaa kiyone Nyo le baaŋ lɛ ŋgɛ̀ mbaaŋ nleesɛ gɛ muh mu bɛŋ le a joo gɛ fede Klisbu bɛ Gayu gɛ, 15 wu lɛ keefɛ muh ja wu dûu lɛ ba gɛ leese wu a joo a jee chaŋ le gɛ. 16 Ɛhɛɛŋ, ŋgɛ nleesɛ tɛ Tɛfina bɛ bamii ba a wu yeh a joo. Fede noo sɛŋ, mbaaŋ ka kɛɛ gɛ muh mu wù ŋgɛ̀ nleesɛ a joo gɛ. 17 Bɛŋ kêe lɛ gɛ Kletu gɛ ntuŋ mɛ lɛ ntô nlêese bamii a joo gɛ. Wu gɛ ntuŋ lɛ ntô nfêeji nyume saaka we wù joŋe. Gɛ nfeeji bɛ jɛ yi bvufee bvu muh wu wuŋ lɛ gɛ, wu lɛ keefɛ bvuŋga bvu kwe yi Kletu gɛ̀ kwe yi kintaaŋ le ja tû fiɛɛ fì achiji gɛ.
Kletu le bvuŋga bɛ bvufee bvu Nyo
18 Fi le lɛ saaka wù lɛ Kletu gɛ̀ kwe yi kintaaŋ le, le kiyuŋ fɛ bamii ba lɛɛse achiji le. Geenɛ, saaka wunɛ le bvuŋga bvu Nyo fɛ besabɛŋ ba wu bvuuse le. 19 Fi le ba gɛ̀ saŋ lɛ,
“Nlé ŋgê nchîijɛ bvufee bvu bamii ba duunyi bvufee,
nchɛ̂ŋɛ bɛ baŋkwajɛ ba bamii ba feefe.”
20 No fi le noo, bamii ba taŋlo bo ka bo dûunyi bvufee mɛɛse le faaŋ? Bamii ba duunyi banchi ba Nyo le faaŋ? Bamii ba tɛɛnyi kintɛɛnyi kife kinɛ le, le faaŋ? Gɛ Nyo nyu wu dunyɛ wa lɛ bvufee bvu fɛkuu fɛnɛ le kiyuŋ gɛ? 21 Le fiɛɛ fì Nyo wù kɛme bvufee bvuchii gɛ̀ ge lɛ gɛ taŋlo bamii ba yi woŋ kfunɛ le kɛɛ wu bɛ bvuboo bvufee gɛ. Wu gɛ̀ seesɛ lɛ wu taŋlo wu bvusɛ nyume bamii ba bɛɛŋ saaka wù bee feeji wunɛ bamii yɛde lɛ le kiyuŋ. 22 Bajuu goone ki bo yɛ̂ŋ fiɛɛ fì duunyi bvuŋga bvu Nyo le fɛ bo bɛ̂ɛŋ, Baglek goone bvufee bvu fiɛɛ lɛ fɛ bo bɛ̂ɛŋ. 23 Geenɛ, bee feeji fiesa kune no ba gɛ̀ ta Kletu yi kintaaŋ le, fi ka fi nyu lo kinjeesɛ fɛ Bajuu le. Bamii ba le gɛ Bajuu gɛ yɛde lɛ le kiyuŋ. 24 Geenɛ, fɛ bamii ba Nyo le wu cha le, kɛnɛ le Bajuu, kɛnɛ le Baglek, le saaka wù kune Kletu wunɛ le bvuŋga bvu Nyo bɛ bvufee bvu Nyo bvù baaŋ. 25 Fi le noo, nje fiɛɛ fì yɛne lɛ le kiyuŋ ki Nyo, le bvufee bvù fede lo bvu muh wu wuŋ lɛ bvuchii. Fiɛɛ fi yɛne lɛ le kiwɛɛyɛ ki Nyo, le bvuŋga bvù fede lo bvu muh wu wuŋ bvuchii.
26 Booŋ ba bwɛɛŋ, bɛŋ ka bɛŋ kwâjɛ kfuu chi bamii ba bɛŋ gɛ̀ shee bɛŋ nyume sege Nyo gɛ̀ cha bɛŋ. Gɛ bɛŋ ba duude gɛ̀ bee bamii ba bvufee no bamii ba fɛkuu fɛnɛ goone gɛ. Gɛ bɛŋ ba duude gɛ̀ bee bako gɛ. Gɛ bɛŋ ba duude gɛ̀ bu a chikfuu chi bamii ba baaŋ baaŋ le gɛ. 27 Geenɛ, Nyo gɛ̀ cha biyuŋ bi yi nshɛŋ le fɛnɛ ki wu gê lɛ ba bvufee nyûme bɛ bvuya, wu cha ba wɛɛyi yi nshɛŋ le fɛnɛ ki wu gê lɛ ba tɛ̂ɛme nyu bɛ bvuya. 28 Nyo gɛ̀ bee wu cha mwɛɛ mù bamii jode fɛkuu yi woŋ kfunɛ le, mo mwɛɛ mù bamii nyiɛŋse, wu cha mo mwɛɛ mù ya le gɛ mwɛɛ gɛ, ki wu gê lɛ mwɛɛ mù bamii yɛde lɛ le mwɛɛ tû mù achiji. 29 Wu gɛ̀ ge noo, wu lɛ keefɛ muh wu wuŋ chîaase ye a Nyo jii gɛ. 30 Le wu wù Nyo wu gɛ̀ taashɛ bɛŋ bɛ Kletu Jiso. Wu gɛ̀ ge Kletu nyu je yì bvufee bvu baaŋ fɛ besabɛŋ le, wu gɛ̀ leesɛ tɛ besabɛŋ chaaŋ a wu jii, wu seesɛ besabɛŋ wu gɛɛ bamii be le, wu suuŋ besabɛŋ chiaaŋ yi ŋgɛ le. 31 Fi mo fi nyume no ba saŋ a Ŋwa wu Nyo le lɛ,
“Muh doo wu chiaase ye,
wu chiaase nyume yi fiɛɛ fì ge Tada le.”