Ŋwa wù fwe wu
Joŋ
Fiɛɛ fì le a Ŋwa wu Joŋ wù fwe wunɛ le
Ŋwa wù fwe wu Joŋ wunɛ wvù wvu gɛ̀ saŋ fɛ bintaashɛ bi bamii ba mbɛmɛ, le wu kɛme bikwɛɛ bi mwɛɛ bifɛɛ. Wvu gɛ̀ saŋ ki wu yûfɛ muntele mu bamii ba wù gɛ̀ saŋ fɛ bo le, lɛ bo chêe yi kintaashɛ le bɛ Nyo mo Mwa ye wù Jiso Kletu, bɛ ki wu têfɛ bo lɛ bo yɛ̂ne lɛ keefɛ bo bîi n'yɛyɛ wu chimbiaŋ le gɛ. Muh wù saŋ ŋwa wunɛ le wu moŋ wu chiisɛ lo lɛ, nɛ muh chee antɛnɛɛ a n'yuu, wu gɛ ka wu gêe gee chi kijibɛ gɛ. Wu ka wu saŋ tɛ lɛ Jiso Kletu gɛ̀ bee muh wu wuŋ, muh wuchii wù le wu leesɛ fitele yi ye ye le wu koŋe Nyo, wu kɛ̂me tɛ ki wu kôŋe mwa bwee.
Bikwɛɛ bi mwɛɛ mù le a Ŋwa wunɛ le
1:1-4 Fɛŋkɛɛ
1:5–2:29 Saaka wù kune n'yuu bɛ kijibɛ
3:1-24 Booŋ ba le ba Nyo bɛ ba le ba debele
4:1-6 Fiɛɛ fì nchiɛɛŋ bɛ fì le chimbiaŋ
4:7-21 Kune kiŋkoŋɛ
5:1-21 Fitele fì muh leese yi Kletu le fi soo lo fiɛɛ fichii
1
Jɛ yì nyaa kinche
1 Fiɛɛ fì bee saŋe finɛ le kune Jɛ yì nyaa kinche yì gɛ̀ bee wa fɛŋkɛɛ. Jɛ yinɛ, bee gɛ̀ yu mwɛɛ mù yi gɛ̀ duu, bee yɛŋ yi le bɛ ajii awese, bee bijɛ no yi nyume, bee kuŋ yi le bɛ chiaaŋ yese. 2 Kinche kinɛ ba gɛ̀ chunyɛ bee yɛŋ ki le, bee mo be jɛme kune ki, bee feeji bɛŋ le kune kinche kì kage gɛ kinɛ kì gɛ̀ bee bɛ Chii, wu gɛ̀ to wu chunyɛ bee le. 3 Fifiɛɛ fì bee gɛ̀ yɛŋ bee ka be yu, le fi fì bee feeji bɛŋ le tɛ wu lɛ bee kɛ̂me kintaashɛ besabɛŋ. Kintaashɛ kesa kinɛ le besa Nyo wù Chii bɛ Mwa ye wù Jiso Kletu. 4 Bee mo be saŋe finɛ wu lɛ njoŋ wese besabɛŋ yîsɛ chuule.
Ki besabɛŋ chêe yi n'yuu le
5 Wunɛ le saaka wù bee gɛ̀ yu a wu le, bee mo be sɛŋe bɛŋ le lɛ, Nyo le n'yuu, kijibɛ nyume gɛ ye ye le gɛ mbɛŋ. 6 Noo, nɛ besabɛŋ duu lɛ besabɛŋ le yi kintaashɛ le bɛ wu, geenɛ besabɛŋ ka jiɛnyi nyu yi kijibɛ le, tu besabɛŋ mbiane lo, bee chee gɛ bee bii nchiɛɛŋ le gɛ. 7 Geenɛ, nɛ besabɛŋ jiɛnyi yi n'yuu le no wu le yi n'yuu le, tu besabɛŋ le be nyûme yi kintaashɛ le muh no muh, kilɛmɛ ki Jiso wù Mwa ye le ki chuge besabɛŋ be yuude yi bimbefɛ biɛsa besabɛŋ le bichii. 8 Nɛ besabɛŋ duu lɛ gɛ besabɛŋ kɛme bimbefɛ gɛ, tu besabɛŋ lɛɛde lo bɛ bikwɛɛ biɛsa, gɛ nchiɛɛŋ nyu yi ye yese besabɛŋ le gɛ. 9 Geenɛ, nɛ besabɛŋ sɛŋe lo bimbefɛ biɛsa wu le, no wu le muh wù to wu lɛme yi jɛ ye le wu ka gee mwɛɛ mù kooji, tu wu lé wu lɛ̂ɛshɛ bimbefɛ biɛsa wu chûgɛ besabɛŋ be yuude yi gee chesa besabɛŋ le chichii chì le gɛ chaaŋ gɛ. 10 Nɛ besabɛŋ jɛme lɛ besabɛŋ baaŋ ge gɛ kimbefɛ gɛ, tu besabɛŋ jode wu lɛ wu le muh wu chimbiaŋ, jɛ ye ya kɛme gɛ kijusɛ yi ye yese besabɛŋ le gɛ.