Nchane (Ncane) 2 Tɛsalonika 1

Ŋwa wù kiŋgane kinfɛɛ wù Bol gɛ̀ saŋ fɛ kintaashɛ ki

Tɛsalonika le

Fiɛɛ fì le a Ŋwa wu Tɛsalonika wù kiŋgane kinfɛɛ wunɛ le

No Bol gɛ̀ saŋ a ŋwa wù fwe le fɛ bamii ba mbɛmɛ ba a kilaantɛŋ kì Tɛsalonika le, kune lɛ bo chîɛɛne yi nyiɛgee le, kife kì Jiso lé wu gê wu kâasɛ wu tô, bvufee mɛ gɛh bvu laayi bo yi saaka wuyu le. Bol mo wu saŋ ŋwa wù kiŋgane kinfɛɛ wunɛ ki wu jɛ̂mɛ kune no bamii gɛ̀ kwaji lɛ juu chi nto wu Tada chiyu le chi jo wa kijusɛ. Wu gɛ̀ bee wu najɛ ŋkwajɛ wunɛ wu dunyɛ lɛ nto wu Kletu le wu jo kijusɛ nyume kimbefɛ bɛ mwɛɛ mù mbefe nyume mu ge mu duu mu fesɛ lo.

Bikwɛɛ bi mwɛɛ mù le a Ŋwa wunɛ le

1:1-2 Fɛŋkɛɛ

1:3-12 Bol bɛɛŋsɛ wu ka wu tooŋ kintaashɛ ki bamii ba mbɛmɛ

2:1-17 Nteefɛ kune nto wu Kletu

3:1-15 Nteefɛ kune kinche ki bamii ba le ba Kletu

3:16-18 Kimɛsɛ

1 Le mɛ wù Bol, nle besa Sila mo Timoti. Nsaŋe ŋwa wunɛ fɛ kintaashɛ ki bamii ba mbɛmɛ ba a kilaantɛŋ kì Tɛsalonika kì le ki taashɛ ki nyume bɛ Nyo wù Chiji wese besabɛŋ bɛ yi Tada Jiso Kletu le.

2 Nyo wù Chiji wese besabɛŋ bɛ Tada Jiso Kletu bo dûnyɛ fitele fì joŋe fɛ bɛŋ le bo ka bo nyâ bɛŋ bɛ nyiɛgee.

Nsa wù lé wu tô wu nyûme kife kì
Kletu le wu kaasɛ wu to le

3 Booŋ ba bwee wese, bee kɛme ki be nyâa kiyone Nyo le segechii kune bɛŋ. Fi kooji noo, nje fitele fì bɛŋ lese yi Kletu le kuu gɛh fi gɛɛne lo fwe fwe, kiŋkoŋɛ kì muh wu mumwaa wu mumwaa kɛme fɛ muh le, ki gɛɛne tɛ lo fwe fwe. 4 Noo, bee kibɛɛ to be chiaase ye bɛ bɛŋ a bintaashɛ bi bamii ba mbɛmɛ bi Nyo bimi le. Bee to be chiaase ye kune no bɛŋ lɛme bɛŋ tɛɛme bɛ kune no bamii boone bikaa a bɛŋ jiŋ bɛŋ jiji gɛh fitele fì bɛŋ lese yi Kletu le, mo kune baŋgɛ ba bɛŋ yɛnɛ bɛŋ kaane gɛh shɛ́ŋ. 5 Finɛ le fiɛɛ fì duunyi lɛ Nyo lé wu gê wu sâ bamii a je yì chaaŋ le, wu lɛ bɛŋ to bɛŋ yɛnɛ bɛŋ nyume bɛŋ kojɛ bamii ba bvunfoŋ bvu Nyo bvù bɛŋ yɛnɛ wa baŋgɛ banɛ nje bvu. 6 No Nyo le muh wù chaaŋ, wu lé wu gê wu chvûu ŋgɛ wù bamii nyaa bɛŋ le bɛ ŋgɛ, 7 wu nya njiɛɛsɛ bɛŋ ba yɛnɛ ŋgɛ le mo bee tɛ. Finɛ fiɛɛ lé fi gê fi kôoshɛ sege Tada Jiso lé wu gê wu bûnɛ fɛwe wu tôo bɛ lɛmɛ chi ŋgu chi lale. Wu lé wu gê wu tôo noo bɛ banchɛndaa be ba tɛɛme. 8 Wu lé wu gê wu chvûu kichvusɛ bamii ba faŋe lo Nyo le mo bamii ba baaŋ bɛɛŋ gɛ̀ saaka wù joŋe wù kune Tada Jiso wese besabɛŋ le gɛ. 9 Ba lé ba gê ba lɛ̂ɛshɛ bo, bo kɛmɛ ŋgɛ wù kage gɛ, ba gasɛ bo bɛ ba Tada lɛ keefɛ bo tô a wu fwe gɛ mo fɛ bvukugɛ bwe bvù baaŋ le gɛ. 10 Finɛ fiɛɛ lé fi gê fi kôoshɛ abvu bvù wu lé wu gê wu tô, wu lɛ bamii ba le be tûme maŋkuŋ mɛ, bamii bachii ba le bo leesɛ fitele yi wu le bo kɛme lo ŋgha bɛ wu. Bɛŋ tɛ lé bɛŋ gê bɛŋ nyûme bo le, nje bɛŋ gɛ̀ bɛɛŋ saaka we wù bee gɛ̀ jɛmɛ bɛŋ le. 11 Nɛ fiɛɛ fì bee buune fɛ bɛŋ le segechii lɛ Nyo wese ge bɛŋ nyume lɛ bɛŋ le bɛŋ kojɛ kfuu chi bamii ba wu tɛŋe lɛ bɛŋ nyume. Bee buune tɛ lɛ wu fîh bɛŋ yi bvuŋga bwe le, lɛ bɛŋ ge fiɛɛ fì joŋe fichii fì bɛŋ goone mo lɛme chichii chì bɛŋ gee nje fitele fì bɛŋ le bɛŋ leesɛ yi Kletu le. 12 Bee buune tɛ noo wu lɛ jee chi Tada wese wù Jiso kɛ̂mɛ mbɛɛŋsɛ a bɛŋ ntɛnɛɛ, lɛ bɛŋ tɛ kɛ̂mɛ mbɛɛŋsɛ yi wu le. Finɛ fiɛɛ le nje fitele fì joŋe fì Nyo wese besabɛŋ bɛ Tada Jiso Kletu kɛme fɛ bɛŋ le.