Ŋwa wù ba gɛ̀ saŋ fɛ
Ba'ibulu le
Fiɛɛ fì le a Ŋwa wu Ibulu wunɛ le
Gɛ besabɛŋ kee muh wù gɛ̀ saŋ ŋwa wunɛ gɛ, geenɛ besabɛŋ kee lɛ ba gɛ̀ saŋ fɛ bamii ba Kletu ba le Ba'ibulu le. Ba'ibulu le jee chi Bajuu chimi. Ba gɛ̀ saŋ ki ba gê lɛ Bajuu ba gɛ̀ leesɛ wa muntele yi Kletu le mɛ̂ gɛh bo lɛ̂me yi fi le, mo no baŋgɛ gɛ̀ too fɛ bo le jé le jé le. Gɛ̀ bee tɛ ki bo gê bo kɛ̂ɛ lɛ maŋkaŋ mà manfɛŋ mà Jiso gɛ̀ to bɛ mo kɛme bvuŋga mo fede mà kege. Ba gɛ̀ saŋ tɛ ki ba têefɛ bo lɛ bo kêe lɛ fiɛɛ fì Nyo le wu ka bamii yu, le no fi gɛ fe kuu gɛ. Bo le bo dunyɛ lɛ mwɛɛ mù Kletu wù Mwa Nyo to bɛ mu fede mù bamii ba ntuŋ wu Nyo ba fweele, nje muboo gɛ̀ bee gɛh lo binjiinyi, Kletu le wu to wa bɛ mwɛɛ mù le mù nchiɛɛŋ.
Bikwɛɛ bi mwɛɛ mù le a Ŋwa wunɛ le
1:1-3 Kletu le bvushi bvu Nyo kibɛɛ
1:4–2:18 Kletu fede banchɛndaa ba Nyo
3:1–4:13 Kletu fede Musɛ bɛ Joshwa
4:14–7:28 Kletu le chiji kintanyɛ wù fede bachiji bintanyɛ bachii
8:1–9:28 Maŋkaŋ mà Kletu gɛ̀ to bɛ mo fede mà kege
10:1-39 Kintanyɛ kì Kletu gɛ̀ ge fede bintanyɛ bichii
11:1–12:29 Kune ki ba lêesɛ fitele yi Nyo le
13:1-25 Ntefɛ yi fɛkimɛsɛ
1
Nyo le wu jɛmɛ wa besabɛŋ le nyume jwe wu Mwa ye le
1 Gɛ̀ shee nyume fweele Nyo jɛme bachiji chiji besa le de yi bamii be ba ntuŋ le chikɛ le wesee yi jé le yeye yeye. 2 Geenɛ, doo tu aju kanɛ a kimɛsɛ le, wu jɛme besabɛŋ le nyume yi jwe wu Mwa ye le. Le Mwa ye wunɛ wù wu le wu baa lɛ wu le wu nyûme nji bvushɛ wu fiɛɛ fichii. Le wu wù Nyo gɛ̀ fɛ woŋ bɛ fiɛɛ fichii fede chiaaŋ ye le. 3 N'yulɛ wu Nyo lale yi ye ye le, nyume wu wù le bvushi bvu Nyo kibɛɛ. Le wu wù gɛ̀ ge kibvulɛ bɛ nshɛŋ fɛ mu nyume yu. Wu gɛ̀ ge nyume bɛ jɛ ye yì kɛme bvuŋga. Wu gɛ̀ maaŋ bimbefɛ biɛsa besabɛŋ. No wu gɛ̀ manɛ noo wu mo wu bɛɛŋ we wu shii a kibo kinchiɛɛŋ ki Nyo wu Bvukugɛ le.
Mwa Nyo kuge wu fede banchɛndaa ba Nyo
4 Fi mo fi nyume lɛ Nyo gɛ̀ fɛ Mwa ye wu kuge baaŋ wu fede banchɛndaa ba Nyo, gɛh yɛɛŋyɛɛŋ no jee chi Nyo gɛ̀ nya wu le kuge tɛ baaŋ chi fede chiboo. 5 Besabɛŋ kee lɛ wu kuge lo nje gɛ nchɛndaa wu Nyo wumu nyume yu wù Nyo gɛ̀ yu wa wu jɛme wu le lɛ,
“Wo le Mwa yaŋ,
abɛŋ nle Chijo.”
Gɛ muh nyume yu wù wu gɛ̀ yu wa wu jɛme kune wu lɛ,
“Nlé ŋgê nyûme Chijo,
wo nyûme Mwa yaŋ.”
6 Gɛ̀ bee kife kì Nyo gɛ̀ bee ki wu tûŋ Mwa ye wù ŋkuse wunɛ yi woŋ kfunɛ le, wu jɛmɛ lɛ,
“Banchɛndaa be bachii ŋgvûune wu.”
7 Fiɛɛ fì Nyo gɛ̀ jɛme kune banchɛndaa be le finɛ fì lɛ,
“Wu gee bo nyume njɛ fii,
wu gee tɛ bo bò nyu bamii be ba lɛme
bo nyume njɛ lɛmɛ chi ŋgu.”
8 Doo tu fɛ Mwa ye le, wu du lɛ,
“O Nyo, wo lé wo gê wo shîi yi kala wo le wo sâge segechii, kage gɛ.
Kinche kì chaaŋ lé ki gê ki nyûme kitoome ki bvunfoŋ bwuŋ.
9 Wo koŋe nyume fiɛɛ fì chaaŋ, wo bane fì befe.
Noo mɛ wù Nyo wù nle Nyo wo,
mɛ mo mbɛɛŋsɛ wo nfe ŋgoo yo,
no nle n'yefɛ wo bɛ bee wu bvunfoŋ wù le wu bvujoŋɛ le.”
10 Wu ka wu jɛmɛ tɛ Mwa ye le lɛ,
“Tada, le wo wù gɛ̀ fɛ nshɛŋ fɛŋkɛɛ,
mwɛɛ munchii mù le fɛwe le lɛme chi kibo kuŋ.
11 Mwɛɛ munɛ lé mu gê mu kâ, geenɛ shɛ̂ɛ gɛh wo.
Mu lé mu gê mu chvûufe njɛ nju.
12 Wo lé wo gê wo kɛ̂bɛ mu njɛ kiŋkuŋ.
Wo lé wo kûsɛ mu njɛ nju sege yi juŋ.
Geenɛ wo lé wo gê wo mɛ̂ gɛh wo nyûme no wo le.
Gɛ biluŋ biuŋ nyume bi yu bi kâ gɛ.”
13 Le nchɛndaa wu Nyo wù la wù Nyo gɛ̀ yu wa wu du wu le lɛ,
“Shîlɛ a kibo kaŋ kinchiɛɛŋ le,
gɛ̂ɛŋ bû kife kì nlé ŋgê ŋgîiŋsɛ
bamii buŋ ba kimbanɛ a wo jii
njɛ kitege ki bikaa,
wo tômɛ bikaa biuŋ yi bo le?”
14 Gɛ Banchɛndaa ba Nyo banɛ nyume gɛh lo biyo bì lɛne Nyo le, wu tune bi jiɛnyi bi fiih bamii ba lé bo gê bo kɛ̂me mbvusɛ gɛ?