Saaka wù joŋe kune Jiso no
Macho
gɛ̀ saŋ
Fiɛɛ fì le a Ŋwa wu Macho wunɛ le
Saaka wù joŋe wù le a Ŋwa wu Macho wunɛ le, jɛme lɛ Jiso le Mbvusɛ wu Nyo. gɛ̀ ka. Saaka wù joŋe wunɛ le fɛ bamii bachii ba le yi kikwɛɛ ki nshɛŋ le. Ŋwa wunɛ duunyi lɛ Jiso le Muh wu N'yɛyɛ wù kooji wù kee ki wu nâjɛ chuule fiɛɛ fì banchi ba Nyo jɛme. N'yɛyɛ wu Jiso wuchii wu a ŋwa wunɛ le, le ba banyɛ yi bikwɛɛ le bitɛŋ. (1) No Jiso gɛ̀ bɛnɛ wu shii yi mbegɛ le wu yɛyi kune bamii ba bvunfoŋ bvù fɛwe le bvuboo. (2) No Jiso gɛ̀ nya nteefɛ booŋ be ba ŋgoo ba yuufe ncho bafɛɛ le kune lɛme chì wu gɛ̀ tuŋ bo yu. (3) Baŋgaŋ ba Jiso gɛ̀ ma kune bvunfoŋ bvù fɛwe. (4) N'yɛyɛ kune fiɛɛ fì le muh wu ŋgoo wu Jiso. (5) N'yɛyɛ kune no woŋ kfunɛ le wu to wu ka bɛ no bvunfoŋ bvu Nyo lé bvu gê bvu tô
Bikwɛɛ bi mwɛɛ mù le a Ŋwa wunɛ le
1:1–2:23 Kfuu chi Jiso Kletu bɛ no ba gɛ̀ boyɛ wu
3:1-12 Lɛme chi Joŋ Nlesɛajoo
3:13–4:11 No ba gɛ̀ leesɛ Jiso a joo bɛ no Sataŋ gɛ̀ moŋ wu
4:12–18:35 Lɛme chi Jiso gɛ̀ jiɛnyi wù gee Galalee
19:1–20:34 Jiso ja Galalee, wu gɛɛŋ Yɛlusalɛm
21:1–27:66 Kimaa ki Jiso ki fɛkimɛsɛ Yɛlusalɛm bɛ mbebe yo le
28:1-20 No Tada Jiso gɛ̀ bu yi kwe le, wu dunyɛ kikwɛɛ ke bamii be le
1
Kfuu chi Jiso Kletu
(Luka 3:23-38)
1 Manɛ le maŋkuŋ ma bachiji kfuu chi Jiso Kletu: Jiso gɛ̀ bee mwa wu a kfuu chi Nfoŋ Dabi wù gɛ̀ bee mwa wu a kfuu chi Ablaham le. 2 Ablaham gɛ̀ bee chiji Asik, Asik gɛ̀ bee chiji Yakob, Yakob gɛ̀ bee chiji Juda bɛ booŋ bachiji, 3 Juda gɛ̀ bee chiji Bɛlɛ bɛ Sɛla ba bwee bo gɛ̀ bee Tama. Bɛlɛ gɛ̀ bee chiji Ɛsloŋ, Ɛsloŋ gɛ̀ bee chiji Laŋ. 4 Laŋ gɛ̀ bee chiji Aminada, Aminada gɛ̀ bee chiji Nasoŋ, Nasoŋ gɛ̀ bee chiji Salimoŋ. 5 Salimoŋ gɛ̀ bee chiji Boa wù bwee gɛ̀ bee Lahab. Boa gɛ̀ bee chiji Obɛd wù bwee gɛ̀ bee Lu. Obɛd gɛ̀ bee chiji Jɛsi. 6 Jɛsi gɛ̀ bee chiji Nfoŋ Dabi.
Nfoŋ Dabi gɛ̀ bee chiji Salamoŋ wù bwee gɛ̀ bee kwɛ Ulia. 7 Salamoŋ gɛ̀ bee chiji Luhobwaŋ, Luhobwaŋ gɛ̀ bee chiji Abija, Abija gɛ̀ bee chiji Asa. 8 Asa gɛ̀ bee chiji Jɛhoshɛfat, Jɛhoshɛfat gɛ̀ bee chiji Jolaŋ, Jolaŋ gɛ̀ bee chiji Yosaya. 9 Yosaya gɛ̀ bee chiji Jotaŋ, Jotaŋ gɛ̀ bee chiji Aha, Aha gɛ̀ bee chiji Hɛsikaya, 10 Hɛsikaya gɛ̀ bee chiji Manase, Manase gɛ̀ bee chiji Amoŋ,*Baŋwa ba kege bamu kɛme jee chinɛ lɛ, “Amos”. Amoŋ gɛ̀ bee chiji Yosaya. 11 Yosaya gɛ̀ bee chiji Jɛkonia bɛ booŋ ba bwee. Ba gɛ̀ boyi bo shɛshi shige nyu kife kì bamii ba Babiloŋ gɛ̀ kooyɛ bamii ba Ishwala bo gɛɛŋ bɛ bo woŋ wuboo wù Babiloŋ le.
12 Ajiŋ ayu, no bo gɛ̀ kooyɛ bamii ba Ishwala bo gɛɛŋ bɛ bo Babiloŋ, Jɛkonia gɛ̀ bee chiji Shalta, Shalta gɛ̀ bee chiji Sɛlubabe, 13 Sɛlubabe gɛ̀ bee chiji Abiud, Abiud gɛ̀ bee chiji Ɛliakim, Ɛliakim gɛ̀ bee chiji Aso, 14 Aso gɛ̀ bee chiji Sadok, Sadok gɛ̀ bee chiji Akim, Akim gɛ̀ bee chiji Ɛliud, 15 Ɛliud gɛ̀ bee chiji Ɛlisa, Ɛlisa gɛ̀ bee chiji Mataŋ, Mataŋ gɛ̀ bee chiji Yakob. 16 Yakob gɛ̀ bee chiji Yosɛf wù juma Mɛɛle, Mɛɛle nyu wu wù gɛ̀ boyɛ Jiso wù ba tɛŋe lɛ Kletu.
17 Noo, bachiji kfuu chi Jiso banɛ le yuufe ncho banɛh kɛge yi Ablaham le, too bude yi Nfoŋ Dabi le, ka nyu yuufe ncho banɛh kɛge yi Nfoŋ Dabi le too bude sege ba gɛ̀ kooyɛ bamii ba Ishwala ba gɛɛŋ bɛ bo Babiloŋ. Kɛge sege ba gɛ̀ kooyɛ bamii ba Ishwala too bude sege ba gɛ̀ boyɛ Kletu, bachiji kfuu chiboo tɛ nyu yuufe ncho banɛh.
Kune no boyɛ chi Jiso gɛ̀ jiɛnyɛ
(Luka 2:1-7)
18 Boyɛ chi Jiso Kletu gɛ̀ jiɛnyi a je yinɛ le. Bwee wù Mɛɛle gɛ̀ bee ba seesɛ wa lɛ wu lé wu gê wu nyûme kwɛ Yosɛf. Fɛ bo taashɛ bvuguu, fi gɛ̀ ja fi bu lɛ wu le wa bɛ fwe a bvuŋga bvu Kiyo ki Yuude le. 19 No fi gɛ̀ kooshɛ noo, Yosɛf wù jwɛɛŋ, no wù gɛ̀ bee muh wù chaaŋ wu koŋe gɛ ki wu chôosɛ wu gɛ, wu mo wu yɛŋ lɛ wu lé wu gâsɛ bɛ wu nyu ajiŋ ajiŋ. 20 No wu gɛ̀ baaŋ wu kwaji ki wu gê noo, fi kooshɛ lɛ nchɛndaa wu Tada gɛ̀ ja wu to fɛ wu le a kifilɛ le sege wu gɛ̀ lefe wu jɛmɛ wu le lɛ, “Yosɛf, mwa wù a kfuu chi Nfoŋ Dabi le, keefɛ wo fâŋ ki wo jô Mɛɛle bwee yeh wo le gɛ, nje fwe chinɛ chi wu le bɛ chi wù kɛme chi a bvuŋga bvu Kiyo ki Yuude le. 21 Wu lé wu gê wu boo mwa wu jwɛŋsɛ wo chû jee che lɛ Jiso,†Jee chi Jiso chinɛ le lɛ, “Tada bvuuse lo” nje wu lé wu gê wu bvûsɛ bamii be yi bimbefɛ biboo le.” 22 Mwɛɛ munɛ munchii gɛ̀ kooshɛ ki fi to fi kojɛ no Tada gɛ̀ jɛmɛ wa jwe wu muh we wu tuŋ le lɛ, 23 “Bɛŋ yêgɛ bɛŋ yû, mwa wuchile wumu lé wu gê wu nyu bɛ fwe, wu boo mwa wu jwɛŋsɛ ba tɛ̂ŋe wu lɛ Ɛmaniwe.” Jee chinɛ le lɛ, “Nyo le bɛ bee.” 24 No kifilɛ kɛɛ gɛ̀ lanɛ Yosɛf noo, wu gɛ̀ kaŋsɛ wu mo wu ge gɛh no nchɛndaa wu Tada gɛ̀ jɛmɛ wu le. Wu gɛ̀ be wu jo Mɛɛle kwɛɛ le, 25 geenɛ gɛ wu gɛ chee bɛ wu njɛ no muh bɛ kwɛɛ to bo chee gɛ. Bɛ wu chee noo gɛɛŋ bu no Mɛɛle gɛ̀ jiɛnyɛ fɛ wu to wu boo. Yosɛf mo wu chu jee chi mwa wuyu lɛ Jiso.