16
Ibhokisi Lesivumelwano SikaThixo Libekwa Ethenteni
1 Balithwala ibhokisi lesivumelwano sikaNkulunkulu bayalingenisa ethenteni uDavida ayelilungiselele lona, banikela ngeminikelo yokutshiswa leyobudlelwano phambi kukaNkulunkulu. 2 UDavida eseqedile ukunikela ngeminikelo yokutshiswa langeyobudlelwano, wabusisa abantu ngebizo likaThixo. 3 Wababela bonke abako-Israyeli, abesilisa labesifazane, yilowo lalowo isinkwa, lekhekhe lezithelo kanye lekhekhe lamavini awonyisiweyo.
4 Wakhetha abanye abaLevi ukukhonza phambi kwebhokisi lesivumelwano sikaThixo bedumisa uThixo, bebonga uNkulunkulu ka-Israyeli: 5 Induna kwakungu-Asafi, uZakhariya engumsekeli, kulandela uJeyeli, loShemiramothi, loJehiyeli, loMathithiya, lo-Eliyabi, loBhenaya, lo-Obhedi-Edomi kanye loJeyiyeli. Babezatshaya amachacho lemihubhe, u-Asafi etshaya izigubhu, 6 abaphristi uBhenaya loJahaziyeli bengabokuvuthela amacilongo phambi kwebhokisi lesivumelwano sikaNkulunkulu.
Ihubo Lokubonga KukaDavida
7 Ngalolosuku uDavida wamisa ukuba u-Asafi labanye bakhe bahlabelele lelihubo bebonga uThixo:
8 Bongani uThixo, memezani ibizo lakhe,
lizazise phakathi kwabantu izenzo zakhe.
9 Hlabelelani kuye, hlabelelani indumiso kuye;
likhulume ngezenzo zakhe zonke ezimangalisayo.
10 Jabulani ebizweni lakhe elingcwele;
kazithokoze inhliziyo zabo abamdingayo uThixo.
11 Dingani uThixo lamandla akhe,
limdinge yena njalonjalo.
12 Khumbulani izenzo zakhe ezimangalisayo azenzayo,
izimangaliso azenzayo, lezahlulelo azikhulumayo,
13 lina zizukulwane zika-Israyeli inceku yakhe,
lina madodana kaJakhobe, abakhethiweyo bakhe.
14 Yena unguThixo uNkulunkulu wethu;
izahlulelo zakhe zigcwele wonke umhlaba.
15 Uyakhumbula isivumelwano sakhe nini lanini,
ilizwi lomlayo wakhe, okwezizukulwane ezizinkulungwane,
16 isivumelwano asenza lo-Abhrahama,
isifungo asenza lo-Isaka,
17 wasiqinisa kuJakhobe saba yisimiso,
laku-Israyeli saba yisivumelwano esingapheliyo,
18 wathi “Ngizalinika ilizwe laseKhenani
njengesabelo selifa lenu.”
19 Kwathi lisesebalutshwana,
bebalutshwana kakhulu, beyizihambi kulo,
20 bezula kuzizwe ngezizwe
besuka komunye umbuso besiya komunye.
21 Kavumelanga loba ngubani ukubancindezela;
wawakhuza amakhosi ngenxa yabo,
22 “Lingabathinti abagcotshiweyo bami;
lingahlukuluzi abaphrofethi bami.”
23 Hlabelani kuThixo lina, mhlaba wonke,
limemezele insindiso yakhe insuku ngezinsuku.
24 Fakazani ngobukhosi bakhe ezizweni zonke,
lemisebenzi yakhe emangalisayo phakathi kwabantu bonke.
25 Ngoba umkhulu uThixo, ufanele ukudunyiswa ngokuphindiweyo;
kumele esatshwe ngaphezu kwabonkulunkulu bonke.
26 Ngoba bonke onkulunkulu bezizwe bayizithombe;
kodwa uThixo wadala amazulu.
27 Inkazimulo lobukhosi kuphambi Kwakhe
Amandla lentokozo kusendaweni yakhe yokuhlala.
28 Mnikeni uThixo, lina zizukulwane zezizwe.
Mnikeni uThixo ubukhosi lamandla.
29 Mnikeni uThixo udumo olufanele ibizo lakhe.
Lethani umnikelo libuye phambi kwakhe.
Mkhonzeni uThixo enkazimulweni yobungcwele bakhe;
30 thuthumelani phambi kwakhe mhlaba wonke!
Umhlaba ugxilile, ngeke ugudluzwe.
31 Amazulu kawathokoze, lomhlaba ujabule,
kabathi phakathi kwabezizwe, “UThixo uyabusa.”
32 Ulwandle kaluhlokome lakho konke okukulo,
amasimu kawathakazelele lakho konke okukuwo.
33 Lapho-ke izihlahla zonke zeganga zizahlabela
ngentokozo phambi kukaThixo,
ngoba uyeza ukuzakwahlulela umhlaba.
34 Bongani uThixo ngoba ulungile.
Uthando lwakhe olungapheliyo lumi kokuphela.
35 Celani lithi: “Sisindise, Oh Nkulunkulu Mkhululi wethu,
usiqoqe usikhulule phakathi kwezizwe,
ukuze silibonge ibizo lakho elingcwele,
sijabule ekukudumiseni.”
36 Kabongwe uThixo, uNkulunkulu ka-Israyeli,
kusukela endulo kuze kube nininini.
Bonke abantu bathi: “Ameni. Kabongwe uThixo!”
37 UDavida wasetshiya o-Asafi labakhula bakhe ukuba bagcine ibhokisi lesivumelwano sikaThixo, bakhonze njalo benze konke okufanele kwenziwe lapho ngezinsuku zonke. 38 Abanye abatshiya lapho ukuze bakhonze labo ngo-Obhedi-Edomi labakhula bakhe, ababengamatshumi ayisithupha lasificaminwembili. U-Obhedi-Edomi indodana kaJeduthuni, kanye loHosa babengabalindi bamasango.
39 UDavida watshiya uZadokhi umphristi kanye labanye abaphristi phambi kwethabanikeli likaThixo endaweni ephakemeyo yokukhonzela eGibhiyoni 40 ukunikela kuThixo iminikelo yokutshiswa e-alithareni ngezikhathi zonke, ekuseni lantambama, njengokulotshiweyo eMthethweni kaThixo, awupha abako-Israyeli. 41 Abanye abasala labo babengoHemani loJeduthuni labanye bonke balabo ababekhethiwe beqanjwa ngamabizo ukuba badumise uThixo, “ngoba uthando lwakhe lumi kuze kube nininini.” 42 UHemani loJeduthuni babengabokuvuthela amacilongo lokutshaya izigubhu lamanye amachacho ezingoma ezingcwele. Amadodana kaJeduthuni ayehlala esangweni.
43 Abanye bonke basuka, ngulowo lalowo waqonda emzini wakhe, uDavida wabuyela emzini wakhe ukuyabusisa abendlu yakhe.