3
Konke Kulesikhathi Sakho
1 Zonke izinto zilesikhathi sazo,
konke okwenziwayo ngaphansi kwelanga kulesibanga sakho:
2 isikhathi sokuzalwa lesikhathi sokufa,
isikhathi sokuhlanyela lesikhathi sokusiphuna,
3 isikhathi sokubulala lesikhathi sokuphilisa,
isikhathi sokubhidliza lesikhathi sokwakha,
4 isikhathi sokukhala lesikhathi sokuhleka,
isikhathi sokulila lesikhathi sokugida,
5 isikhathi sokuchithiza amatshe lesikhathi sokuwabutha,
isikhathi sokugona lesikhathi sokunina,
6 isikhathi sokudinga lesikhathi sokukhalala,
isikhathi sokugcina lesikhathi sokulahla,
7 isikhathi sokudabula lesikhathi sokuthunga,
isikhathi sokuthula lesikhathi sokukhuluma,
8 isikhathi sokuthanda lesikhathi sokuzonda,
isikhathi sempi lesikhathi sokuthula.
9 Umuntu osebenzayo uzuzani na ngokusadalala kwakhe? 10 Sengiwubonile umthwalo uNkulunkulu awethese abantu. 11 Yonke into uyenze yabanhle ngesikhathi sayo. Wamupha umuntu iphakade enhliziyweni yakhe; kodwa abantu bangeke bafinyelele kulokho uNkulunkulu asakwenzayo kwasekuqaleni kusiya ekupheleni. 12 Ngiyakwazi ukuthi kakukho okungcono ebantwini kulokuthi bajabule njalo benze okuhle besaphila. 13 Ukuthi wonke umuntu adle, anathe asuthiseke ekusebenzeni kwakhe gadalala, lokhu kuyisipho sikaNkulunkulu. 14 Ngiyazi yonke into eyenziwa nguNkulunkulu izakuba khona kokuphela; akulalutho olungengezwa kukho loba kususwe kukho. UNkulunkulu uyenza lokho ukuze abantu bamkhonze.
15 Loba yini ekhona seyake yaba khona,
kulalokho okuzakuba khona sekwaba khona ngaphambili;
njalo uNkulunkulu uzakubalisa okwedlulayo.
16 Njalo ngabona okunye ngaphansi kwelanga:
endaweni yokwahlulela, ububi babukhona,
endaweni yokulungisa, ububi babukhona.
17 Ngacabanga ngenhliziyo yami,
“UNkulunkulu uzabehlulela
bonke abalungileyo lababi,
ngoba sizaba khona isikhathi sezenzakalo zonke,
isikhathi sawo wonke umsebenzi.”
18 Ngacabanga njalo ngathi, “UNkulunkulu uyabahlola abantu ukuze babone ukuthi banjengezinyamazana. 19 Isiphetho somuntu siyafana lesezinyamazana; isiphetho sinye sibalindele bonke: njengoba lokhu kuyafa, kanjalo lokunye kuyafa. Konke kokubili kulomphefumulo munye; umuntu kangcono kulenyamazana. Konke kuyize. 20 Konke kuya ndawo yinye; konke kuvela othulini, yikho konke kubuyela othulini. 21 Ngubani owaziyo ingabe umphefumulo womuntu uyakhwela uye phezulu kuthi owenyamazana wehlele phansi phakathi emhlabathini?”
22 Yikho ngabona ukuthi kakukho okungcono emuntwini ngaphandle kokuthi akholise umsebenzi wakhe ngoba leso yiso isabelo sakhe. Ngoba kambe ngubani ongamenza ukuthi abone lokho okuzakwenzakala yena esedlule?