11
Isinkwa Emanzini
1 Phosela isinkwa sakho phezu kwamanzi,
ngoba ngemva kwensuku ezinengi uzasifumana futhi.
2 Yabela abayisikhombisa, yebo abayisificaminwembili,
ngoba kawuwazi umonakalo ongehlela elizweni.
3 Nxa amayezi ethwele, anisa izulu emhlabathini.
Aluba isihlahla singawela eningizimu loba enhla,
silala khonapho esiwele khona.
4 Lowo onanzelela umoya kayikuhlanyela;
lowo okhangela amayezi akazukuvuna.
5 Njengoba ungayazi indlela yomoya,
loba ukubunjwa komzimba esiswini sikanina,
yikho ungeke uzwisise umsebenzi kaNkulunkulu,
uMenzi wezinto zonke.
6 Hlanyela inhlanyelo yakho ekuseni,
kuthi ntambama uphumuze izandla zakho,
ngoba kawukwazi okuzaphumelela,
kumbe yilokhu loba yilokhuyana,
langabe kokubili kuzalunga ngokufananayo.
Khumbula UMenzi Wakho UseseMutsha
7 Ukukhanya kumnandi,
njalo kuhle emehlweni ukubona ilanga.
8 Umuntu angaze aphile iminyaka emingaki,
kayikholise yonke.
Kodwa makakhumbule insuku zobumnyama,
ngoba zizabe zizinengi.
Konke okuzakuza kuyize.
9 Jabula nsizwa usesemutsha,
uvumele inhliziyo yakho ikuthokozise ensukwini zobutsha bakho.
Landela izindlela zenhliziyo yakho
lakho konke amehlo akho akubonayo,
kodwa yazi ukuthi ngenxa yazo zonke lezizinto
uNkulunkulu uzakumisa ekwahlulelweni.
10 Ngakho-ke, susa ukukhathazeka enhliziyweni yakho
ulahlele kude inhlupheko zomzimba wakho,
ngoba ubutsha lamadlabuzane kuyize.