KumaHebheru
1
ILizwi Lika Nkulunkulu Lokucina: INdodana Yakhe
1 Kudala uNkulunkulu wakhuluma kubokhokho kanenginengi ngabaphrofethi langezindlela ezehlukeneyo 2 kodwa ngalezizinsuku zokucina ukhulume kithi ngeNdodana yakhe, ayibeka ukuba yindlalifa yezinto zonke, yona adala ngayo izulu lomhlaba. 3 INdodana iyikubenyezela kwenkazimulo kaNkulunkulu kanye lomfanekiso wokuba nguye kwakhe uqobo, iqinisa izinto zonke ngelizwi layo elilamandla. Emva kokuba isikufezile ukuhlanjululwa kwezono, yahlala phansi esandleni sokunene sobukhosi ezulwini. 4 Ngakho yaba ngaphezu kwezingilosi ngoba ibizo eyalithola njengelifa lilikhulu kulelazo.
INdodana Ingaphezulu Kwezingilosi
5 Ngoba kukuyiphi ingilosi uNkulunkulu ake wathi kuyo:
“Wena uyiNdodana yami;
lamhla sengibe nguYihlo”*AmaHubo 2.7?
Kumbe njalo wathi,
“Ngizakuba nguYise,
yona izakuba yiNdodana yamiӠ2 USamuyeli 7.14; 1 ImiLando 17.13?
6 Njalo, lapho uNkulunkulu eletha izibulo lakhe emhlabeni, uthi:
“Zonke izingilosi zikaNkulunkulu kazimkhonze.”‡UDutheronomi 32.43
7 Lapho ekhuluma ngezingilosi uthi,
“Wenza izingilosi zakhe zibe yimimoya,
izinceku zakhe zibe ngamalangabi omlilo.ӤAmaHubo 104.4
8 Kodwa ngeNdodana uthi,
“Isihlalo sakho sobukhosi, Oh Nkulunkulu,
sizakuma nini lanini,
intonga yokwahlulela okulungileyo
izakuba yintonga yombuso wakho.
9 Ukuthandile ukulunga wazonda ububi;
ngakho uNkulunkulu,
uNkulunkulu wakho
usekubeke ngaphezu kwabakhula bakho
ngokukugcoba ngamafutha entokozo.”*AmaHubo 45.6-7
10 Njalo uthi,
“Ekuqaleni, Oh Nkosi, wabeka izisekelo zomhlaba,
lamazulu angumsebenzi wezandla zakho.
11 Kuzabhubha kodwa wena uzasala;
konke kuzaguga njengesigqoko.
12 Uzakugoqa njengesembatho;
kuzantshintshwa njengesigqoko.
Kodwa wena uhlala unjalo,
leminyaka yakho kayiyikuphela.ӠAmaHubo 102.25-27
13 Kukuyiphi ingilosi uNkulunkulu ake wathi kuyo:
“Hlala ngakwesokunene sami;
ngize ngenze izitha zakho
zibe yisinyathelo senyawo zakho”‡AmaHubo 110.1?
14 Izingilosi kazisimimoya esebenzayo yini, ethunywe ukukhonza labo abazakudla ilifa lokusindiswa na?