33
Usizi Losizo
1 Maye kuwe, wena mchithi,
wena ongachithwanga!
Maye kuwe, wena mthengisi,
wena ongacetshwanga!
Lapho uyekela ukuthengisa,
lawe uzacetshwa.
2 Awu Thixo, woba lomusa kithi;
siyakulangazelela.
Woba ngamandla ethu ekuseni konke,
ube yinsindiso yethu esikhathini sosizi.
3 Ekukhwazeni kwelizwi lakho, izizwe ziyabaleka;
lapho uphakama izizwe ziyahlakazeka.
4 Elakuthumbayo, lina zizwe, kubuthwa sengangathi kuqoqwa yisikhongwane,
abantu beqela kukho njengomtshitshi wentethe.
5 UThixo uphakeme ngoba uhlala phezulu,
uzagcwalisa iZiyoni ngokufaneleyo langokulunga.
6 Uzakuba yisisekelo esithembekileyo sesikhathi senu,
isiphala esigcwele usindiso, ukuhlakanipha lokwazi;
ukumesaba uThixo kuyisiqokoqela sokuzuza ingcebo le.
7 Khangelani, amaqhawe akibo ahlaba umkhosi emigwaqweni!
Izithunywa zokuthula ziyakhala kakhulu.
8 Imigwaqo emikhulu ibetha umoya,
akulazihambi kuyo.
Isivumelwano sephulwe,
ofakazi baso beyisiwe,
kakho ohlonitshwayo.
9 Ilizwe liyalila njalo liyachitheka.
ILebhanoni iyangekile njalo iyabuna;
iSharoni injengenkangala,
iBhashani leKhameli akhithizwa amahlamvu awo.
10 UThixo uthi, “Khathesi sengizavuka,
khathesi sengizadunyiswa,
khathesi sengizaphakanyiswa.
11 Liqukethe ngamakhoba,
lizale izibi;
umoya wenu eliwuphefumulayo ungumlilo oliqedayo.
12 Abantu bazatshiswa bafane lekalaga;
bazathungelwa ngomlilo njengamahlahla ameva aganyuliweyo.”
13 Lina elikhatshana, zwanini engikwenzileyo;
lina abaseduze, vumani amandla ami!
14 Izoni zaseZiyoni ziyathuthumela;
abangamesabiyo uNkulunkulu bayaqhaqhazela:
“Ngubani owakithi ongahlala lomlilo oqothulayo na?
Ngubani owakithi ongahlala lokutshisa okungapheliyo na?”
15 Ngulowo owenza okulungileyo,
ekhuluma okuqotho
oyalayo inzuzo yokuncindezelwa,
ale ukwamukela isivalamlomo,
owalayo ukulalela amaqhinga okubulala,
avale amehlo akhe ukuze angaboni okubi,
16 lo nguye umuntu ozahlala ekuphakameni,
osiphephelo sakhe sizakuba yinqaba yasentabeni.
Uzalethelwa isinkwa sakhe,
lamanzi kayikuwaswela.
17 Amehlo enu azayibona inkosi ebuhleni bayo,
abuke lelizwe elibanzi.
18 Ezingqondweni zenu lizakhumbula ukwesaba kwakuqala lithi:
“Ingaphi induna yezikhulu leyana?
Ungaphi owayethatha imali yemithelo?
Singaphi isikhulu esigcina imiphotshongo na?”
19 Abantu labayana abaklolodayo kalisayikubabona futhi,
abantu labayana abolimi olungazwakaliyo,
abolimi olungaziwayo, olungaqondakaliyo.
20 Khangelani iZiyoni, idolobho lemikhosi yethu;
amehlo enu azabona iJerusalema
indawo yokuhlala elokuthula, ithente elingeke lisuswe;
izikhonkwane zalo kaziyikusitshunwa
lezintambo zalo kaziyikuqamuka.
21 Khonapho uThixo uzakuba ngolaMandla wethu.
Kuzafana lendawo elemifula ebanzi kanye lezifula.
Akukho mkhumbi wempi ozagwedlwa khona,
akukho mkhumbi olamandla ozahamba khona.
22 Ngoba uThixo ungumahluleli wethu,
uThixo usinika imithetho,
uThixo yinkosi yethu;
nguye ozasikhulula.
23 Izintambo zakho zeseyili ziyaxega.
Insika kayiqiniswanga;
iseyili kayivulekanga.
Lapho-ke impango enengi izakwabiwa
kuthi labaqhulayo labo bazazuza impango.
24 Akulamuntu ohlala eZiyoni ozakuthi, “Mina ngiyagula”;
labantu abahlala khona bazathethelelwa izono zabo.