40
Induduzo Ebantwini BakaNkulunkulu
1 Duduzani, libaduduze abantu bami,
kutsho uNkulunkulu wenu.
2 Khulumani ngomusa kulo iJerusalema,
limemezele kulo
ukuthi ukusebenza kwalo nzima sekuphelile,
ukuthi isono salo sihlawulwe,
ukuthi selamukele okuvela esandleni sikaThixo
kuphindwe kabili kuzozonke izono zalo.
3 Ilizwi lomemezayo lithi:
“Enkangala lungiselani
uThixo indlela,
lenzele uNkulunkulu wethu
umgwaqo oqondileyo enkangala.
4 Zonke izigodi zizaphakanyiswa,
izintaba zonke lamaqaqa kuzakwehliselwa phansi.
Umhlabathi ongamakhilikithi uzakwendlaleka,
izindawo ezimadundulu zizakuba yisigcawu.
5 Inkazimulo kaThixo izabonakaliswa,
abantu bonke bazambona kanyekanye,
ngoba umlomo kaThixo usukhulumile.”
6 Ilizwi lithi, “Memeza!”
Mina ngathi, “Ngimemeze ngisithini na?”
“Abantu bonke banjengotshani
njalo ubuhle babo bunjengamaluba eganga.
7 Utshani buyabuna amaluba ayakhithika,
ngoba umoya kaThixo uyakuphephetha.
Ngempela abantu babutshani.
8 Utshani buyabuna, amaluba ayakhithika,
kodwa ilizwi likaNkulunkulu limi kuze kube nininini.”
9 Wena oletha izindaba ezinhle eZiyoni,
khwela entabeni ende.
Wena oletha izindaba ezinhle eJerusalema,
phakamisa ilizwi lakho ngokumemeza;
liphakamise, ungesabi,
tshono emadolobheni akoJuda uthi:
“Nangu uNkulunkulu wenu!”
10 Khangelani, uThixo Wobukhosi uza elamandla,
isandla sakhe sizabusa.
Khangelani, umvuzo wakhe ulawo,
lenhlawulo yakhe uhamba elayo.
11 Welusa umhlambi wakhe njengomelusi:
ubuthelela amawundlu ezingalweni zakhe
awathwale eseduzane lenhliziyo yakhe;
awakhokhele kuhle lawo alamazinyane.
12 Ngubani olinganise amanzi entendeni yesandla sakhe,
loba walinganisa amazulu ngobubanzi besandla sakhe na?
Ngubani owaphatha uthuli lomhlabathi ngesitsha
loba walinganisa izintaba ezilinganisweni
lamaqaqa esikalini na?
13 Ngubani osewazwisisa imicabango kaThixo,
kumbe wamfundisa njengomeluleki wakhe na?
14 Ngubani owake wacelwa nguThixo ukuba ameluleke,
njalo ngubani owamfundisa indlela elungileyo na?
Ngubani lowo owamfundisa ukwazi,
loba owamtshengisa indlela yokuqedisisa na?
15 Ngeqiniso izizwe zinjengethonsi emgqonyeni;
zibalwa njengothuli ezilinganisweni;
uThixo ulinganisa izihlenge
angathi ziluthuli olucolekileyo.
16 ILebhanoni kalaneli imililo ye-alithare,
lezinyamazana zalo kazaneli iminikelo yokutshiswa.
17 Phambi kwakhe zonke izizwe zinjengeze;
yena uzikhangela njengento engasi yalutho
njalo zingaphansi kweze.
18 Pho ngubani elingamfanisa loNkulunkulu na?
Yisifanekiso bani elingasilinganisa laye na?
19 Isithombe sibunjwa yingcwethi,
umkhandi wegolide asinameke ngegolide
asenzele imigaxo yesiliva.
20 Umuntu ongumyanga onganelisiyo ukunikela ngomnikelo onjalo
ukhetha isigodo esingaboliyo.
Udinga ingcitshi elolwazi
ukuba imise isithombe esingayikubhidlika.
21 Kalazi yini?
Kalizwanga na?
Kalikutshelwanga kwasekuqaleni na?
Kalizwisisanga na selokhu umhlaba wadalwayo?
22 UThixo uhlezi ebukhosini ngaphezu kwendingiliza yomhlaba,
njalo abantu bakhe banjengezintethe.
Welula amazulu njengekhetheni,
awendlale njengethente lokuhlala kulo.
23 Udiliza amakhosana,
enze ababusi bomhlaba lo babe yize.
24 Banele ukugxunyekwa nje,
banele ukuhlanyelwa nje,
banele ukugxila impande emhlabathini
abe ephephetha phezu kwabo, babune,
isavunguzane sibakhukhulele khatshana njengamakhoba.
25 “Ngubani elizangilinganisa laye na?
Loba ngubani olingana lami na?” kutsho yena oNgcwele.
26 Phakamisani amehlo enu likhangele phezulu:
Ngubani owadala konke lokhu na?
Yena okhupha amaxuku ezinkanyezi ngalinye ngalinye,
awabize ngalinye ngamabizo awo.
Ngenxa yamandla akhe amakhulu lokuqina okulamandla,
akukho lalinye elingekho.
27 Kungani usithi, we Jakhobe,
usole usithi, we Israyeli,
“Indlela yami ifihlakele Thixo;
ilungelo lami kalinanzwa nguNkulunkulu wami na?”
28 Kalazi yini?
Kalizwanga na?
UThixo unguNkulunkulu waphakade,
uMdali wemikhawulo yomhlaba.
Kayikudinwa kumbe akhathale,
ukuqedisisa kwakhe kakho ongakulinganisa.
29 Abakhatheleyo uyabanika amandla,
andise amandla ababuthakathaka.
30 Labatsha baphelelwa ngamandla bakhathale,
lamajaha ayakhubeka awe,
31 kodwa labo abathemba uThixo
bazavuselelwa amandla abo.
Bazaqonga ngempiko njengezinkozi,
bazagijima kodwa bangadinwa,
bazahamba kodwa bangapheli amandla.