22
Ukwahlulelwa Kwamakhosi Angalunganga
1 Nanku akutshoyo uThixo: “Hamba wehlele endlini yenkosi yakoJuda umemezele khona ilizwi leli uthi, 2 ‘Zwana ilizwi likaThixo, we nkosi yakoJuda, wena ohlala esihlalweni sobukhosi sikaDavida, wena lezikhulu zakho kanye labantu bakho abangena ngamasango la. 3 UThixo uthi: Yenzani okulungileyo lokuqondileyo. Mhlenge esandleni somncindezeli wakhe lowo ophangiweyo. Lingenzi okubi loba udlakela kowezizweni, intandane loba umfelokazi, njalo lingachithi igazi elingelacala kule indawo. 4 Ngoba nxa linanzelela ukulandela imilayo le, amakhosi ahlala esihlalweni sobukhosi sikaDavida azangena ngamasango ale indawo, egade izinqola zempi lamabhiza, elezikhulu zawo kanye labantu bawo. 5 Kodwa nxa imilayo le lingayilaleli, kutsho uThixo, ngifunga ngami ukuthi indawo le izakuba lunxiwa.’ ”
6 Ngoba mayelana lendawo yenkosi yakoJuda uThixo uthi:
“Lanxa unjengeGiliyadi kimi,
lanjengengqongo yeLebhanoni,
ngeqiniso ngizakwenza ufane lenkangala,
lanjengamadolobho angahlali muntu.
7 Ngizakuthumela abachithi,
indoda nganye ilezikhali zayo,
njalo bazaquma imijabo yenu emihle yemisedari
bayiphosele emlilweni.
8 Abantu abavela ezizweni ezinengi bazadlula kulelidolobho babuzane besithi, ‘Kungani uThixo enze into enje kulelidolobho elikhulu na?’ 9 Impendulo izakuthi: ‘Ngoba basidelile isivumelwano sikaThixo uNkulunkulu wabo bakhonza abanye onkulunkulu njalo babasebenzela.’ ”
10 Lingayikhaleli inkosi efileyo loba lililele ukulilahlekela kwayo;
kodwa, khalelani kakhulu othunjiweyo,
ngoba kasayikubuya
njalo loba abone ilizwe lakibo futhi.
11 Ngoba mayelana loShalumi indodana kaJosiya, owangena esikhundleni sikayise esiba yinkosi yakoJuda kodwa osesukile kule indawo: UThixo uthi, “Kasoze abuye futhi. 12 Uzafela kuleyondawo asiwa kuyo ethunjiwe; ilizwe leli kasoze alibone futhi.”
13 “Maye kuye owakha indlu yakhe yobukhosi ngokungalungi,
lezindlu zakhe zangaphezulu ngokungafanelanga,
esenza abantu bakibo basebenzele ize,
engabaholisi lutho ngokusebenza kwabo.
14 Uthi, ‘Ngizazakhela indlu enkulu yobukhosi
elezitezi ezibanzi.’
Ngakho uyenza ibe lamawindi amakhulu,
ayinameke ngemisidari,
ayicombe ngokubomvu.
15 Ukuba lemisedari eminenginengi
kukwenza ube yinkosi na?
Uyihlo kazange abe lokudla lokunathwayo na?
Wenza okuqondileyo lokulungileyo,
ngakho konke kwamlungela.
16 Wavikela amalungelo abayanga labaswelayo,
ngakho konke kwamlungela.
Lokho akusikho okutsho ukungazi na?”
kutsho uThixo.
17 “Kodwa amehlo akho lenhliziyo yakho
kukhangele inzuzo yenkohliso,
lokuchitha igazi elingelacala,
ukuncindezela kanye lodlakela.”
18 Ngakho mayelana loJehoyakhimi indodana kaJosiya, inkosi yakoJuda, uThixo uthi:
“Kabayikumkhalela besithi:
‘Maye ngomfowethu!
Maye ngodadewethu!’
Kabayikumkhalela besithi:
‘Maye ngenkosi yami!
Maye ngobuhle bayo obukhulu!’
19 Uzangcwatshwa njengobabhemi,
ahudulwe aphoselwe
ngaphandle kwamasango aseJerusalema.”
20 “Qansa uye eLebhanoni umemeze,
wenze ilizwi lakho lizwakale eBhashani;
memeza use-Abharimi,
ngoba bonke abamanyane lawe banqotshiwe.
21 Ngakuxwayisa uzibona uvikelekile,
kodwa wena wathi, ‘Angiyikulalela!’
Le ibe iyindlela yakho kusukela ebutsheni bakho;
kawungilalelanga.
22 Umoya uzabaxotshela khatshana bonke abelusi bakho,
labamanyene lawe bazathunjwa.
Lapho-ke uzayangeka ube lenhloni
ngenxa yobubi bakho bonke.
23 Lina abahlala ‘eLebhanoni,’
eligcineke kuhle ezindlini zemisedari,
lizabubula kakhulu lapho inhlungu zilehlela,
ubuhlungu obunjengowesifazane ehelelwa!”
24 UThixo uthi, “Ngeqiniso njengoba ngikhona, lanxa ngabe wena, Jehoyakhini ndodana kaJehoyakhimi inkosi yakoJuda, wawuyindandatho ebukekayo esandleni sami sokunene, ngangizakukhupha. 25 Ngizakunikela kulabo abafuna ukukubulala, labo obesabayo, uNebhukhadineza inkosi yaseBhabhiloni lakumaKhaladiya. 26 Wena kanye lonyoko owakuzalayo ngizaliphosela kwelinye ilizwe, lapho elingazalelwanga khona, lapho elizafela khona lobabili. 27 Kaliyikuphinda libuye elizweni elifisa ukuza kulo.”
28 Umuntu lo, uJehoyakhini, uyimbiza efileyo,
edelelwayo, into engafunwa muntu na?
Kungani yena labantwabakhe bezaphoselwa ngaphandle,
balahlelwe elizweni abangalaziyo na?
29 Wena lizwe, lizwe, lizwe,
zwana ilizwi likaThixo!
30 UThixo uthi:
“Bhalani umuntu lo njengongelabantwana,
umuntu ongayikuphumelela empilweni yakhe,
ngoba kakho owenzalo yakhe ozaphumelela,
kakho ozahlala esihlalweni sobukhosi sikaDavida
loba abuse futhi koJuda.”