19
Impendulo KaJobe
1 Wasephendula uJobe wathi:
2 “Koze kube nini lilokhu lingichukuluza,
lingicobodisa ngamazwi na?
3 Selingithethise amahlandla alitshumi manje;
lingihlasela lingelanhloni.
4 Nxa kuliqiniso ukuthi ngiphambukile,
isiphambeko sami ngumlandu wami ngedwa.
5 Nxa isibili liziphakamisa ngaphezulu kwami,
lingincindezele ngokuyangeka kwami,
6 yazini ukuthi uNkulunkulu ungonile
wangithandela ngomambule wakhe.
7 Loba ngingaze ngikhale ngithi, ‘Ngiyahlukuluzwa bo!’
angitholi mpendulo;
loba ngicela uncedo,
kangahlulelwa ngokulunga.
8 Uyivalile indlela yami akudluleki;
izindlela zami uzembese ngomnyama.
9 Usengiphucile konke ukuhlonitshwa
wangethula umqhele ekhanda lami.
10 Ungidabula inxa zonke ngize ngiphele du;
usiphuna ithemba lami njengesihlahla.
11 Ulaka lwakhe luyavutha kimi;
ungibalela phakathi kwezitha zakhe.
12 Amabutho akhe eza ngamandla;
angakhela isihonqo sokungivimbezela
amise egqagqele ithente lami.
13 Usenze abafowethu bangihlamuka;
abangane bami sebemelana lami.
14 Izihlobo zami sezihambile;
abangane bami sebekhohliwe ngami.
15 Izethekeli zami lezincekukazi zami zithi ngingowemzini;
zingikhangela njengowezizweni.
16 Ngithi nxa ngibiza isisebenzi sami singasabeli,
lokuba ngisincenga ngomlomo wami.
17 Ukuphefumula kwami kuyamnukela umkami;
ngiyenyanyeka kubafowethu.
18 Labafanyana bayangiklolodela;
ngithi nxa ngiqhamuka bangihoze.
19 Bonke abangane bami abasekhwapheni bayanengeka ngami;
labo engibathandayo sebengifulathele.
20 Angiselalutho ngaphandle kwesikhumba lamathambo kuphela;
ngiphephe manayinayi.
21 Ngizwelani usizi, bangane bami, wobani losizi,
ngoba isandla sikaNkulunkulu singitshayile.
22 Lingilandelelani njengoNkulunkulu na?
Lizakufa lasutha ngenyama yami na?
23 Oh, uthi ngabe amazwi ami ayalotshwa,
ngabe abhaliwe emqulwini,
24 ngabe athwetshulwe ngensimbi phezu komnuso,
loba agujwe edwaleni lanininini!
25 Ngiyazi ukuthi uMhlengi wami uyaphila,
lokuthi ekupheleni uzakuma emhlabeni.
26 Kuzakuthi nxa isikhumba sami sesibhujisiwe,
kodwa ngikuyo inyama yami ngizambona uNkulunkulu;
27 mina ngokwami ngizambona ngawami amehlo,
mina hatshi omunye.
Inhliziyo yami iyagubhazela ngokulangatha!
28 Lingaze lithi, ‘Sizamzingela qho
ngoba nguye ozilethele ukuhlupheka,’
29 yini okumele liyesabe inkemba;
ngoba intukuthelo izaletha isijeziso ngenkemba,
lapho-ke lizakwazi ukuthi kulokwahlulela.”