23
Ukwambulelwa Kwakuqala KukaBhalamu
1 UBhalamu wathi, “Ngakhela ama-alithare ayisikhombisa lapha, ube usungilungisela inkunzi eziyisikhombisa kanye lenqama eziyisikhombisa.” 2 UBhalaki wenza njengokutshiwo nguBhalamu, kwathi bobabili babo banikela ngenkunzi langenqama eyodwa e-alithareni linye ngalinye.
3 Ngakho uBhalamu wasesithi kuBhalaki, “Hlala lapha eceleni lomnikelo wakho mina ngisaya eceleni. Mhlawumbe uThixo uzabuya azohlangana lami. Lokho azakuveza kimi ngizakutshela.” Wasesuka waya endaweni ephakemeyo eligceke.
4 UNkulunkulu wahlangana laye, njalo uBhalamu wathi, “Sengakhe ama-alithare ayisikhombisa njalo e-alithareni linye ngalinye nginikele ngenkunzi langenqama eyodwa.”
5 Ngakho uThixo watshela uBhalamu wathi, “Buyela kuBhalaki uyemupha umbiko lo.”
6 Ngakho wabuyela kuBhalaki wamfica emi eceleni komnikelo wakhe, kanye lawo wonke amakhosana amaMowabi. 7 Ngakho uBhalamu wasesitsho umbiko wakhe:
“UBhalaki ungilethe ngivela e-Aramu,
inkosi yamaMowabi evela ezintabeni zasempumalanga.
‘Woza,’ watsho njalo, ‘ngiqalekisela uJakhobe;
woza, mchothoze u-Israyeli.’
8 Ngingabaqalekisa njani
labo abangaqalekiswanga nguNkulunkulu?
Ngingachothoza njani
labo abangazange bachothozwe nguThixo?
9 Eziqongweni zamatshe ngiyababona,
khonale phezulu bayangikhanyela.
Ngibona abantu abahlezi ngokwehluka,
njalo kabaziboni bengabalezizizwe.
10 Ngubani ongabala uthuli lukaJakhobe
loba ingxenye yesine yabako-Israyeli na?
Yekela ngife ukufa kwabalungileyo,
njalo sengathi isiphetho sami singafana lesabo!”
11 UBhalaki wathi kuBhalamu, “Kuyini osungenzele khona na? Ngize lawe ukuze uqalekise izitha zami, kodwa akulalutho olwenzileyo ngaphandle kokuzibusisa!”
12 UBhalamu, waphendula wathi, “Ngingakukhulumi na engikutshelwe nguThixo?”
Ukwambulelwa Kwesibili KukaBhalamu
13 Ngakho uBhalaki wathi kuBhalamu, “Woza asiye kwenye indawo lapha ozababona khona; uzabona ingxenye kuphela kungeyisibo bonke. Khonapho-ke ungiqalekisele bona.” 14 Wasesuka laye waya emangweni waseZofimu phezu kwentaba iPhisiga, kulapho akha khona ama-alithare ayisikhombisa wanikela ngenkunzi langenqama e-alithareni linye ngalinye.
15 UBhalamu wathi kuBhalaki, “Hlala lapha eceleni komnikelo wakho mina ngisayahlangana laye ngale.”
16 UThixo wahlangana loBhalamu wamtshela wathi, “Buyela kuBhalaki uyemnika umbiko lo.”
17 Wasebuyela kuBhalaki wamfica emi eceleni komnikelo wakhe, kanye lamakhosana amaMowabi. UBhalaki wambuza wathi, “Utheni uThixo?”
18 Wasesitsho umbiko wakhe:
“Vuka, Bhalaki, njalo ulalele; zwana mina,
ndodana kaZiphori.
19 UNkulunkulu kasumuntu, ukuthi angaqamba amanga,
loba indodana yomuntu, yona eguquguqula ingqondo yayo.
Kambe ukhuluma angenzi na?
Uyathembisa angagcwalisi isithembiso na?
20 Ngamukele umlayo wokubusisa;
usebusisile, njalo ngingeke ngikuguqule lokho.
21 Akulamabhadi ehlela kuJakhobe,
akulasizi olubonakala ku-Israyeli.
UThixo uNkulunkulu wabo ukanye labo;
umkhosi weNkosi uphakathi kwabo.
22 UNkulunkulu wabakhipha eGibhithe;
balamandla enyathi.
23 Akulamilingo engalinga uJakhobe,
akulamasalamusi angamelana lo-Israyeli.
Khathesi sekuzathiwa ngoJakhobe
kanye lo-lsrayeli, ‘Khangela okwenziwe nguNkulunkulu!’
24 Abantu bayavuka njengesilwanekazi;
badlwanguluka njengesilwane
sona esingaphumuliyo size sitshwabadele inyamazana yaso
njalo sinathe igazi layo.”
25 Ngakho uBhalaki wasesithi kuBhalamu, “Ungabaqalekisi, njalo ungababusisi!”
26 UBhalamu waphendula wathi, “Angikutshelanga na ukuthi ngenza engikutshelwe nguThixo?”
Isambulelo Sesithathu SikaBhalamu
27 Ngakho uBhalaki wathi kuBhalamu, “Woza, kahle ngikuse kwenye indawo. Mhlawumbe kuzamthokozisa uNkulunkulu akuvumele ukuthi ungiqalekisele bona ukhonale.” 28 Ngakho uBhalaki wahamba loBhalamu baya phezu kwePheyori ekhangele enkangala.
29 UBhalamu wathi, “Ngakhela ama-alithare ayisikhombisa khonapha, ungilungisele inkunzi eziyisikhombisa lenqama eziyisikhombisa.” 30 UBhalaki wenza lokho ayekutshelwe nguBhalamu, wanikela inkunzi eyodwa lenqama e-alithareni linye ngalinye.