2
Ukulingisela Ukuthobeka KukaKhristu
1 Nxa kukhona okukhuthazayo ngokuhlangana loKhristu, nxa kulenduduzo evela ethandweni lwakhe, nxa kulobudlelwano loMoya, nxa kulozwelo lesihawu, 2 phelelisani intokozo yami ngokuba ngqondo nye, lilothando lunye, limunye emoyeni njalo linjongo yinye. 3 Lingenzi lutho ngokuzikhukhumeza loba ukuziphakamisa okuyize. Kodwa ngokuthobeka khangelani abanye njengabangcono kulani 4 lingazikhathaleli izifiso zenu lodwa kodwa likhathalele lezifiso zabanye.
5 Ekuphilisaneni kwenu, isimo sengqondo yenu kumele sifanane lesikaKhristu uJesu,
6 Yena okwathi ngemvelo enguNkulunkulu,
kacabanganga ukulingana loNkulunkulu
kuyilutho olungafinyelelwa,
7 kodwa wazithoba,
wathatha isimo senceku,
yena elesimo somuntu.
8 Wathi ebunjwe wabonakala njengomuntu,
wazehlisa
walalela kwaze kwaba sekufeni,
ukufa kwasesiphambanweni!
9 Ngakho-ke, uNkulunkulu wamphakamisela endaweni ephezulu kakhulu,
wamnika ibizo elingaphezu kwamabizo wonke,
10 ukuba amadolo wonke aguqe ebizweni likaJesu,
ezulwini lasemhlabeni kanye langaphansi komhlaba,
11 lezindimi zonke zivume ukuthi uJesu Khristu uyiNkosi,
kube ludumo lukaNkulunkulu uYise.
Ukucwebezela Njengezinkanyezi
12 Ngakho-ke, bangane bami abathandekayo, njengoba lihlezi lilalela kungayisikho ukuthi ngikhona kuphela kodwa ikakhulu nxa ngingekho, qhubekani lisebenzela ukusindiswa kwenu ngokwesaba langokuthuthumela 13 ngoba nguNkulunkulu osebenzayo phakathi kwenu ukuba lifune njalo lenze okumthokozisayo.
14 Yenzani konke kungela kusola kumbe ukuphikisana 15 ukuze libe ngabantwana bakaNkulunkulu abangelasici labahlambulukileyo, abamsulwa phakathi kwesizukulwane esonakeleyo lesixhwalileyo, lina elicwebezela phakathi kwaso liletha ukukhanya emhlabeni 16 ligagadlela ilizwi lokuphila. Ngalokho ngizazincoma ngosuku lukaKhristu ukuthi kangigijimelanga kumbe ngasebenzela ize. 17 Kodwa lanxa ngithululwa njengomnikelo wokunathwa phezu komhlatshelo lenkonzo evela ekukholweni kwenu, ngiyathaba ngithokoza lani lonke. 18 Ngakho-ke, lani njalo thabani lithokoze lami.
UThimothi Lo-Ephafrodithusi
19 Ngiyethemba eNkosini uJesu ukuba ngizathuma uThimothi kini masinyane ukuba lami ngithokoze lapho ngisamukela izindaba ngani. 20 Kangilaye omunye onjengaye, othakazelela inhlalakahle yenu ngobuqotho. 21 Ngoba abantu bonke bazifunela okwabo, hatshi okukaJesu Khristu. 22 Kodwa lina liyakwazi ukuthi uThimothi usezifakazele ngoba njengendodana eloyise usesebenze lami emsebenzini wevangeli. 23 Ngakho-ke, ngithemba ngizamthuma masinyane lapho sengibonile ukuba izinto zingihambela njani. 24 Njalo ngiyathemba eNkosini ukuthi lami uqobo ngizakuza masinyane.
25 Kodwa ngibona kufanele ukuthi ngimthume kini futhi u-Ephafrodithusi, umzalwane wami, obambisane lami umsebenzi lolibutho kanye lami, oyisithunywa senu futhi, elamthumayo ukuthi angisize ngendingeko zami. 26 Ngoba uyalilangatha lonke njalo ukhathazekile njengoba lezwa ukuthi wayegula. 27 Ngempela wayegula njalo waphose wafa. Kodwa uNkulunkulu waba lesihawu kuye, kungayisikho kuye kuphela kodwa lakimi ukuba angiphephise osizini phezu kosizi. 28 Ngakho-ke, ngitshisekela kakhulu ukumthuma ukuze kuthi lapho limbona futhi lithokoze lami ngikhathazeke okunganeno. 29 Mamukeleni eNkosini ngokuthokoza okukhulu njalo libahloniphe abantu abanjengaye 30 ngoba waphosa wafela umsebenzi kaKhristu, wafaka impilo yakhe engozini ukuze angiphe usizo elingangiphanga lona.