8
Ubizo Lokuhlakanipha
1 Ukuhlakanipha kakumemezi yini?
Ukuqedisisa kakuphakamisi ilizwi lakho na?
2 Emiqolweni yezindlela,
emahlanganweni ezindlela kulapho okujame khona;
3 emasangweni angena phakathi kwedolobho,
ezintubeni kuyamemeza kakhulu kusithi:
4 “Ngimemeza lina, madoda;
ilizwi lami libiza bonke abantu.
5 Lina eliyizithutha, zuzani ukuqonda;
lina ziphukuphuku, zuzani ukuqedisisa.
6 Lalelani ngoba ngilitshela izinto eziqakathekileyo;
ngivula izindebe zami ngikhuluma okuqondileyo.
7 Umlomo wami ukhuluma okuliqiniso,
ngoba izindebe zami ziyabenyanya ububi.
8 Wonke amazwi omlomo wami aqondile;
kalikho lelilodwa elitshekileyo loba elingcolileyo.
9 Kulowo ozwisisayo wonke alungile;
akulankohliso kulabo abalolwazi.
10 Khetha iseluleko sami kulesiliva,
ulwazi kulegolide elikhethiweyo,
11 ngoba ukuhlakanipha kuligugu okudlula amarubhi,
njalo akulanto ongayifisa ezifisweni zakho okulingana lakho.
12 Mina, kuhlakanipha, ngihlala ndawonye lokuqondisisa;
ngilolwazi lokukhetha kuhle.
13 Ukwesaba uThixo yikuzonda ububi;
ngiyakuzonda ukuzazisa lobuqholo,
ukuziphatha kubi lenkulumo ebolileyo.
14 Ukweluleka lokwahlulela okuhle kungokwami;
ngilokuzwisisa lamandla.
15 Amakhosi abusa ngenxa yami
lababusi balakho ukutshaya imithetho elungileyo;
16 amakhosana abusa ngami,
lazozonke izikhulu ezibusa emhlabeni.
17 Ngiyabathanda labo abangithandayo,
labo abangidingayo bayangithola.
18 Kimi kukhona inotho lodumo,
inotho engapheliyo lokuphumelela.
19 Izithelo zami zingcono kulegolide elicengiweyo;
okuphuma kimi kwedlula isiliva sekhethelo.
20 Ngihamba ngendlela yokulunga,
ngilandela umkhondo wokuqonda,
21 ngiyabela inotho kulabo abangithandayo
ngigcwalise iziphala zabo.
22 UThixo wangenza ngaba khona
ngaqalela konke okukhona,
kuqala kokwenza ezinye izinto;
23 ngaba khona ekudabukeni kwezinto,
kwasekuqaleni, umhlaba ungakabi khona.
24 Kungakabi lezilwandle, ngasengizelwe,
kungakabi khona izihotsha ezigcwele amanzi;
25 izintaba zingakamiswa ensikeni zazo,
engakabi khona amaqaqa, ngasengizelwe,
26 uThixo engakawenzi umhlaba lamaganga,
loba lonke uthuli lomhlaba.
27 Ngangikhona uThixo ehlela kuhle izulu,
ephawula kuhle imingcele yomkhathi lolwandle,
28 esenza amayezi emkhathini
wazizinzisa inziki zolwandle,
29 ebeka imingcele yolwandle
ukuze amanzi angedluli izimiso zakhe,
ngesikhathi lapho emisa izisekelo zomhlaba.
30 Ngalesosikhathi ngangingumbumbi eceleni kwakhe.
Ngangilenjabulo enkulu insuku ngensuku,
ngithokoza ukuba laye kokuphela,
31 ngithokoza ngomhlaba wakhe wonke
ngijabuliswa yibukhona babantu.
32 Ngakho-ke, madodana ami, ngilalelani;
babusisekile labo abalondoloza izindlela zami.
33 Lalelani imfundiso yami ukuze lihlakaniphe;
lingaqali ukuyidela.
34 Ubusisiwe lowomuntu ongilalelayo,
olinda imihla yonke eminyango yami,
elindile entubeni yami.
35 Ngoba lowo ongifumanayo uzuza ukuphila
emukeliswe ukuthandwa nguThixo.
36 Kodwa lowo owehlulekayo ukungifumana uyazilimaza;
bonke abangizondayo bathanda ukufa.”