Ihubo 5
Kumqondisi wokuhlabela. Kwabemifece. Ihubo likaDavida.
1 Zwana amazwi ami, Oh Thixo,
hawukela ukububula kwami.
2 Lalela ukukhala kwami ngidinga uncedo,
Nkosi yami loNkulunkulu wami,
ngoba ngikhuleka kuwe.
3 Ekuseni, Oh Thixo, uyalizwa ilizwi lami;
ekuseni ngibeka izicelo zami phambi kwakho
ngilinde ngithembile.
4 Kawusuye uNkulunkulu othokoza ngobubi;
ababi ngeke bahlale lawe.
5 Iziqholo ngeke zime
phambi kwakho;
uyabazonda bonke abenza okubi.
6 Uyababhubhisa labo abaqamba amanga;
abomele igazi labakhohlisayo
uThixo uyabenyanya.
7 Kodwa mina, ngomusa wakho omkhulu,
ngizangena endlini yakho;
ngizakhothamela phansi ngokuhlonipha
ngikhangele ethempelini lakho elingcwele.
8 Ngikhokhele, Oh Thixo, ngokulunga kwakho;
ngenxa yezitha zami
yenza iqonde indlela yakho phambi kwami.
9 Kalikho lalinye ilizwi lomlomo wabo elithembekileyo;
inhliziyo yabo igcwele ukubhidliza.
Umphimbo wabo ulingcwaba elikhamisileyo;
ngolimi lwabo bakhuluma inkohliso.
10 Tshono uthi balecala, Oh Nkulunkulu!
Akuthi amacebo abo abe yikuwa kwabo.
Baxotshele khatshana ngenxa yezono zabo ezinengi,
ngoba bakuhlamukele wena.
11 Kodwa akuthi bonke abaphephela kuwe bathokoze;
kabahlabelele njalonjalo ngenjabulo.
Basibekele ngovikelo lwakho,
kuthi labo abalithandayo ibizo lakho bajabule ngawe.
12 Ngoba ngempela, Oh Thixo,
uyababusisa abalungileyo;
uyabazungeza ngomusa wakho njengesihlangu.