Ihubo 21
Kumqondisi wokuhlabela. Ihubo likaDavida.
1 Yebo Thixo umbusi uyathokoza ngamandla akho.
Kukhulu ukuthokoza kwakhe ngokunqoba akuphiwa nguwe!
2 Usumphile isiloyiso senhliziyo yakhe
njalo kawumncitshanga isicelo sezindebe zakhe.
3 Wamemukela ngezibusiso ezinhle
wamethesa umqhele wegolide elicengekileyo ekhanda lakhe.
4 Wacela kuwe ukusila,
wamupha ubude bezinsuku kuze kube nini lanini.
5 Ngokunqoba akuphiwe nguwe
lukhulu udumo lwakhe;
usumgqizise inkazimulo lobukhosi.
6 Ngempela usumuphe izibusiso ezingapheliyo
wamenza wajabula ngentokozo yobukhona Bakho.
7 Ngoba umbusi uyamthemba uThixo;
ngothando loPhezukonke olungaphuthiyo
akayikuzanyazanyiswa.
8 Isandla Sakho sizazibamba zonke izitha Zakho;
isandla Sakho sokunene sizabaxhakalaza abakuzondayo.
9 Kuzakuthi lapho uqhamuka wena
uzabenza babe njengomlilo wemvutho enkulu.
Ngenxa yentukuthelo yakhe uThixo uzabaginya,
umlilo wakhe uzabaqothula.
10 Wena uzabhubhisa izizukulwane zabo emhlabeni,
inzalo yabo ebantwini.
11 Loba beceba okubi Ngawe
besakha amaqhinga amabi, abangeke baphumelele;
12 ngoba uzabenza bafulathele babaleke
nxa usubakhombela usulinwebile idandili.
13 Phakanyiswa, Oh Thixo ngamandla Akho;
sizahlabela sibabaze amandla Akho.