Ihubo 69
Kumqondisi wokuhlabela. Itshuni ethi, “Amaluba.” ElikaDavida.
1 Ngisindisa, Oh Nkulunkulu,
ngoba umsinga wamanzi usugamenxe ngentamo yami.
2 Ngiyagalula ezinzikini ezitotayo,
lapho okungekho ndawo yokugxila.
Sengifike enzikini;
impophoma sezingikhulela.
3 Sengidiniwe yikumemeza ngicela uncedo;
umphimbo wami usome qha.
Amehlo ami aseze efiphele,
edinga uNkulunkulu wami.
4 Labo abangizondayo kungelasizatho
banengi okwedlula inwele zekhanda lami;
banengi abayizitha zami kungelambangela,
labo abafuna ukungidiliza.
Ngiyaphoqelwa ukuhlawula
engingakuntshontshanga.
5 Uyabazi ubuthutha bami, wena Nkulunkulu;
isono sami kasifihlakalanga kuwe.
6 Akuthi labo abathemba kuwe
bangayangiswa ngenxa yami,
Oh Thixo, Thixo Somandla;
akuthi labo abakudingayo,
bangahlaziswa ngenxa yami,
Oh Nkulunkulu ka-Israyeli.
7 Ngiyakubhensela ukugconwa ngenxa yakho,
ihlazo lihuqiwe ebusweni bami.
8 Ngingowemzini kubafowethu,
ngingowemzini emadodaneni kamama;
9 ngoba ukutshisekela indlu yakho kufuthelene kimi,
lezethuko zalabo abakuthukayo ziwela kimi.
10 Ngithi lapho ngilila ngizila ukudla,
ngibhensele ukwetheswa inhlamba;
11 kuthi lapho ngivunula amasaka
abantu badlale ngami.
12 Labo abalinda emasangweni bayangihleka,
ngiyingoma nje yezidakwa.
13 Kodwa ngikhuleka kuwe, Oh Thixo,
ngesikhathi somusa wakho;
ngothando lwakho olukhulu, Oh Nkulunkulu,
ngiphendula ngensindiso yakho eqinisekileyo.
14 Ngihlenga exhaphozini,
ungangiyekeli ngigalule;
ngikhulula kulabo abangizondayo,
emanzini atshonayo.
15 Ungayekeli izikhukhula zingigalulise
loba inziki zingiginye,
loba umgodi uvaleke umlomo wawo phezu kwami.
16 Ngiphendula, Oh Thixo, ngenxa yokulunga kothando lwakho;
emuseni wakho omkhulu phendukela kimi.
17 Ungayifihleli ubuso bakho inceku yakho;
ngiphendula masinyane, ngoba ngiphakathi kohlupho.
18 Sondela ungikhulule;
ngihlenga ngenxa yezitha zami.
19 Uyakwazi ukuthi ngigconwa njani,
ngihlaziswa njalo ngiyangiswa;
zonke izitha zami ziphambi kwakho.
20 Ukugconwa sekuyephule inhliziyo yami
kwangitshiya esithubeni;
ngadinga uzwelo ngaluswela,
abaduduzi, kodwa ngabaswela.
21 Bathela inyongo ekudleni kwami
banginathisa iviniga nxa ngomile.
22 Sengathi itafula eliphambi kwabo lingaba ngumjibila;
sengathi lingaba yisijeziso lesithiyo.
23 Sengathi amehlo abo angafiphala ukuze bangaboni,
lamaqolo abo akhokhobe kokuphela.
24 Thululela ulaka lwakho phezu kwabo;
akuthi ulaka lwakho olwesabekayo lubehlele.
25 Sengathi indawo yabo ingaba ngamanxiwa;
akungabi lamuntu ozahlala emathenteni abo.
26 Ngoba bahlupha labo obalimazayo
bakhulume ngobuhlungu balabo obalimazayo.
27 Bethese amacala phezu kwamacala;
ungayekeli bazuze isabelo sensindiso yakho.
28 Sengathi bangesulwa encwadini yokuphila
bangaze babalwa kanye labalungileyo.
29 Ngisebuhlungwini, ngikhathazekile;
sengathi insindiso yakho, Oh Nkulunkulu ingangivikela.
30 Ngizalidumisa ibizo likaNkulunkulu ngengoma,
ngilibabaze ngokubonga.
31 Lokhu kuzamthabisa uThixo okwedlula inkabi,
okwedlula inkunzi yonke ilempondo lamangqina ayo.
32 Abayanga bazabona bajabule
lina elimdingayo uNkulunkulu,
sengathi inhliziyo zenu zingaphila!
33 UThixo uyabezwa abaswelayo,
kabeyisi abantu bakhe abathunjiweyo.
34 Akuthi izulu lomhlaba kumdumise,
inlwandle lakho konke okunyakaza kuzo,
35 ngoba uNkulunkulu uzayisindisa iZiyoni
ayakhe kutsha imizi yakoJuda.
Yikhona-ke abantu bazakwakha khona balithathe libe ngelabo;
36 abantwana bezinceku zayo lizakuba yilifa labo,
labalithandayo ibizo lakhe bazahlala khona.