Ukalata ughwa kwanda ughwa
Yoohani
Shiisho shikutangila
Ukalata uyu akasimbighwa nu Yoohani, umutumighwa ughwa Yeesu Kilisiti. Shikulangisha ukuti uYoohani akasimba ukalata uyu mu chinja icha malongo mahaano na manna (90) bhwo uYeesu aapaapighwa. Akasimba ukalata uyu bhwo ali mu kaaya aka Efesi.
UYoohani akabhasimbilagha abhiitiki bhaabho akabhaghana leka nu kubhiitisha ukuti, “Bhaana bhangu” (2:1). Akabhalilo kaako akasimbagha ukalata uyu, bhakabhaapo abhamanyishi abhingi abha bhumyashi. Abhamanyishi abho bhakamanyishanga ukuti uYeesu Kilisiti akiisa pa chiisu ichi bhwo atali nu mubhili ungati mundu, nu kuti nalinga abhandu bhakubhomba imbiibhi bhabhaghiile ukupokighwa ku nongwa iya kuti ichisa icha Chaala chiliipo.
Inyango iya kusimba ukalata uyu yikabha ya kubhalingaania abhiitiki abho ukuti bhakulondighwa bheendelelaghe ukubha pamupeene nu Chaala nu Yeesu Kilisiti ukuti bhabhwaghe ubhwumi ubhwa bhwila na bhwila. Soona inyango inine yikabha ya kubhalingaania abhiitiki abho ukuti bhakulondighwa ukughanana bheene-bheene. Inyango inine yikabha ya kubhasoka abhiitiki abho ukuti bhabhange maaso na bhamanyishi abha bhumyashi.
1
Ishu ilya bhwumi
1 Tukubhasimbila inongwa isha Lishu. Ishu ilyo ghwi Yeesu yuuyo akubhapa abhandu ubhwumi, yuuyo akabhaakwo kubhwandilo bhwo uChaala akaali ukupela ichiisu.✡ 1:1 Bhwandilo 1:1; Yoohani 1:1-3 Utwe tumupulikite, tumubhweni na maaso ghiitu, twamuteshanga nu kumupalamaasha nu tukono twitu. 2 Uyo yuuyo akubhapa abhandu ubhwumi, abhonekite kukwitu nuutwe tumubhweni. Ulu tukushimikisha nu kumufumusha kukwinyu ukuti uyo ghwe yuuyo bhwumi ubhwa bhwila na bhwila, yuuyo akabha pamupeene nu Chaala uTaata ghwitu, akabhoneka kukwitu.✡ 1:2 Yoohani 1:14 3 Tukufumusha kukwinyu inongwa isha Yeesu yuuyo tumubhweni nu kumupulika ukuti umwe mubhange pamupeene nuutwe. Isa muumwo umwe indimubhange pamupeene nuutwe, bhubhuubhwo utwe tweshi inditubhange pamupeene nu Chaala uTaata ghwitu nu Mwana ghwake* 1:3 UMwana ghwake Bhelenga ishu ilya UMwana ughwa Chaala ku Mashu aMaheesha. uYeesu Kilisiti. 4 Tukubhasimbila shooshi isho ukuti tubhange nu lusekelo ulukulu ngaani.
Ukwikala mu bhwelu
5 Indumi yiiyo tuyipulikite kwa Yeesu yo yiiyo tukuyifumusha kukwinyu ukuti uChaala bhwelu, soona ichiisi chitaliimwo mukati mumwake. 6 Linga tukuyugha ukuti tuli pamupeene nu Chaala, loole tukwendelela ukughenda mu chiisi, tukuyugha ubhumyashi, soona tutakubhomba ukukongana nu bhwanalooli ubhwa Chaala. 7 Loole linga tukughenda mu bhwelu isa muumwo uChaala ali mu bhwelu, po tuli pamupeene twibheene-bheene. Soona, ibhanda ilya Yeesu uMwana ghwake likutwelufya imbiibhi shiitu shooshi.
8 Linga tukuyugha ukuti utwe tutaa bhatulanongwa, tukwishimbula yutwetwe, soona tutali nu bhwanalooli mu ndumbula shiitu. 9 Loole linga tukwilaata imbiibhi shiitu kwa Chaala, akutuhobhokela nu kutwelufya imbiibhi shiitu shooshi paapo umwene musubhaalilighwa soona ghwanalooli. 10 Linga tukuyugha ukuti tutabhombite imbiibhi naalumo, tukumubhiika uChaala ukubha mumyashi, soona ishu lyake litaliimwo mu ndumbula shiitu.