Mbombo isha Bhatumighwa
Shiisho shikutangila
Ukalata uyu akasimbighwa nu Luuka. ULuuka akasimba ukalata uyu mu chinja icha malongo mahaano na limo ni fyinja fibhili ukufika mu chinja icha malongo mahaano na limo ni fyinja fitatu (62-63) bhwo uYeesu aapaapighwa, akabhalilo kaako akabha pamupeene nu Paabhuli mu chiisu icha Looma. Akasimba ukalata ughwa Luuka nu ghwa Mbombo isha Bhatumighwa ku mundu yuuyo ingamu yaake akabha ghwi Tiyofiilo. ULuuka akaghendagha nu mutumighwa uPaabhuli kuno nu ukwo, soona akabha mumanyani ghwake umusubhaalilighwa (2 Tiimoti 4:11).
Mwa kalata uyu uLuuka akulingaania ukuti bhwo uYeesu eeghighwa ukubhuuka kumwanya, abhamanyili bhaake bhakaanda ukulumbilila iNongwa iNyiisa ku Bhayuuta. Soona akulingaania muumwo abhamanyili bhaake kubhwandilo bhakamupokeela uMbepo uMwelu, na muumwo uMbepo uyo akeendelela ukubhakasha nu kubhalongosha abheene pamupeene na bhalongoshi bhaabho mu mbombo yaabho iya kulumbilila inongwa isha Yeesu.
ULuuka akulingaania shiisho uPeeteli akabhomba na shiisho shikabhoneka ku bhiitiki abha mu Yelusaleemu. Akulingaania muumwo uMbepo uMwelu akabhaafwa ukushaaghania ukuti uChaala akulonda ukuti iNongwa iNyiisa iya Yeesu yilumbililighwange ku bhandu abha fyisu fyoshi. Soona akulingaania muumwo uMbepo uyo akamulongosha umutumighwa uPaabhuli ukubhuuka pakulumbilila iNongwa iNyiisa mubhuyo ubhwingi ubhwa mu chiisu icha Aasiya ni cha Bhulaya nu kumaliisha imbombo iyo mu chiisu icha Looma.
1
1 Ghwe mughindikighwa Tiyofiilo, mwa kalata ghwangu ughwa bhwandilo yula ughwa Luuka ingasimba shooshi shiisho uYeesu akabhombagha na shiisho akamanyishanga ukwandila kubhwandilo, 2 ukufika ishiku liilyo akeeghighwa ku chiika ukubhuuka kumwanya. Bhwo akaali ukubhaleka abhatumighwa bhaake bhaabho akabhasala, akabhabhuula ukughendela ku sila iya Mbepo uMwelu muumwo indibhakabhombele imbombo. 3 Ku kabhalilo aka mashiku amalongo manna (40) ukwandila bhwo aashuuka, akabhasetukila abhatumighwa bhala utubhalilo utwingi, akiilangisha pabhwelu ukuti umwene mwumi. Soona akamanyishanga inongwa isha chitangalala icha Chaala.*1:3 Bhelenga ishu ilya Ichitangalala icha Chaala ku Mashu aMaheesha.
4 Ishiku limo bhwo uYeesu ali pakulya pamupeene na bhamanyili bhaake, akabhalaghila akati, “Manye mutiilaghe mu kaaya aka Yelusaleemu,†1:4 Bhelenga ingamu iya Yelusaleemu ku Mashu aMaheesha. loole mwikale muno muno ukufika paapo uTaata akuya pakubhapa ulusekeelesho ulwa Mbepo uMwelu isa muumwo akafinga. Ulufingo ulwo lwo luulwo mwambulikagha bhwo inguyugha inongwa shaake. 5 UYoohani akabhooshanga abhandu na miishi, loole bhwo amashiku manandi ghaakinda, umwe indimukooshighwange nu Mbepo uMwelu.”‡1:5 Indimukooshighwange nu Mbepo uMwelu Kwo kuti, uChaala indiakamutume uMbepo uMwelu ukwikala pamupeene nabho nu kubhalongosha mu bhwumi bhwabho bhwoshi. Soona indiakabheelufye imbiibhi shaabho shooshi nu kubhapa amaka agha kumughindika umwene.
Ukukwela ukwa Yeesu ukubhuuka kumwanya
6 Bhwo abhatumighwa bhaabhungaana pamupeene nu Yeesu, bhakaanda ukumubhuusha bhakati, “Ghwe Malafyale, kali, aka ko kabhalilo kaako kubhaghalushikisha aBhaisilaeli ubhunyafyale bhwabho?” 7 Umwene akabhaamula akati, “Yitaa mbombo yiinyu ukumanya amashiku pamu utubhalilo tuutwo uTaata atubhaatikite ku maka ghaake mwene. 8 Loole indimukapokeele amaka linga uMbepo uMwelu iisa kukwinyu, nuumwe indimukabhe bhakeeti bhangu mu kaaya aka Yelusaleemu, mu chiisu chooshi icha Yuteeya, icha Samaliiya nu kufika kuukwo ichiisu chooshi chishiliile.”
9 Bhwo uYeesu aamala ukuyugha isho, akeeghighwa ukubhuuka kumwanya bhwo bhakutesha. Ibhingu likamwifunika, bhatakamubhona soona. 10 Bhwo bhakaali bhakutesha kumwanya bhwo uYeesu akubhuuka, nakalinga abhaliisha bhabhili§1:10 Abhaliisha bhabhili bhakabha bhandumi abha Chaala. bhaabho bhakafwala imyenda imyelu bhakiima papiipi nabho. 11 Bhakabhabhuusha bhakati, “Mwe bhandu abha Ghalilaayi umwe, kali, kooni mwimite panu nu kutesha kumwanya? UYeesu uyo yuuyo uChaala aamwegha ukufuma kukwinyu nu kubhuuka naghwe kumwanya, indiakiise soona ku sila isa yiyiiyo yiiyo mwamubhona bhwo akubhuuka kumwanya.”
Bhakumusala uMaatiyaasi ughwa kumupyanila uYuuta
12 Po abhatumighwa bhala bhakaghaluka ukubhuuka ku Yelusaleemu ukufuma ku kaghamba kaako bhakatingi kaghamba aka Mishunguti kaako kakabha ikilomiita yimo ukufuma mu kaaya aka Yelusaleemu. 13 Bhwo bhiingila mu kaaya ako, bhakabhuuka mu nyumba ingelesanie muumwo bhakiikalagha. Ingamu isha bhatumighwa abho sho ishi: uPeeteli, uYoohani, uYaakobhu, uNdeleeya, uFilipu, uToomasi, uBhatolomaayi, uMataayi, uYaakobhu umwana ughwa Alufeeyo, uSiimoni uMulwila Chiisu*1:13 USiimoni uMulwila Chiisu akabha mundu yuuyo akalwilagha ichiisu chaake ku silikali iya Looma. Mu bhokalata abhanine akwitishighwa Siimoni uMukananaayi (Mataayi 10:4; Maalika 3:18). nu Yuuta umwana ughwa Yaakobhu. 14 Abhatumighwa bhooshi abha bhakabhungaana pamupeene ukwipuuta kwa Chaala. Mu bhatumighwa abho, bhakabhaamwo na bhakolo bhamu pamupeene nu Maliiya ungʼina ughwa Yeesu na bhoghwamwabho.
15 Ishiku limo abhiitiki abha Yeesu bhaabho bhakabha imya yimo na malongo mabhili (120) bhakabhungaana pamupeene. Po uPeeteli akiima pakati papaabho, 16 akabhabhuula akati, “Mwe bhiitiki bhanyiitu, kubhwandilo uMbepo uMwelu akamulongosha umalafyale uNdaabhiti†1:16 Bhelenga ingamu iya UNdaabhiti ku Mashu aMaheesha. ukusolola isha Yuuta yuuyo akabhalongosha abhandu bhala bhaabho bhakamukola uYeesu. Po ulu shooshi isho shikulondighwa shibhombighwe isa muumwo shikasimbighwa mu Masimbo aMeelu. 17 UYuuta akabha ghwe yumo mu chibhughutila chiitu paapo ghwepe akasalighwa ukuti tubhombaghe imbombo iyi pamupeene naghwe.”
18 Po uYuuta akaghula umughunda ghumo ukubhombela indalama shila shiisho akashaagha ku sila imbiibhi iya kwitika ukumubhiika uYeesu mu tukono utwa bhalughu. Bhwo ali mu mughunda ghula, uYuuta akaghwa ku maka, ulufukwe lwake lukapunda na mala ghooshi ghakafumila kuuse, akafwa.✡1:18 Mataayi 27:3-8 19 Abhandu bhooshi bhaabho bhakiikalagha mu kaaya aka Yelusaleemu bhakapulika inongwa isha bhufwe ubhwa Yuuta. Ku nongwa iyo, bhakaghwita umughunda ghula mu njugha yaabho iya Chialamu Akelindama, kwo kuti, “Mughunda ughwa Libhanda.”
20 UPeeteli akeendelela ukuyugha akati, “Shisimbiighwe mwa kalata ughwa Sabhuli ukuti,
‘Inyumba yaake yibhe chisaami,
manye abheepo umundu ughwa kwikala umwo.’✡1:20 Sabhuli 69:25
“Soona shisimbiighwe ukuti,
‘Umundu umunine akulondighwa
abhombaghe imbombo yaake.’✡1:20 Sabhuli 109:8
21 “Po tukulondighwa tumusale umundu umunine ughwa kumupyanila uYuuta. Umundu uyo akulondighwa abhe ghwe yumo mu bhandu bhala bhaabho bhakabha pamupeene nuutwe akabhalilo kaako tukaghendagha pamupeene nu Yeesu. 22 Soona tumusale umundu yuuyo akabha pamupeene nuutwe ukufuma akabhalilo kaako uYoohani akamwoshanga uYeesu ukufika ishiku liilyo akeeghighwanga ukubhuuka kumwanya. Umundu uyo indiashimikishange ku bhandu abhanine ukuti uMalafyale ghwitu uYeesu Kilisiti ashuukite.”
23 Po abhiitiki bhala bhakiitikana na shiisho uPeeteli akayugha, bhakasala ingamu isha bhandu bhabhili. Ughwa kwanda akabha ghwi Yoosefu yuuyo bhakamwitishanga ingamu iya Bhalisabha pamu Yuusito nu ghwa bhubhili akabha ghwi Maatiyaasi. 24 Po bhakiipuuta kwa Chaala bhakati, “Ghwe Malafyale, ughwe ushimeenye shooshi shiisho shili mu ndumbula isha bhandu bhooshi. Tukukusuuma utulangishe mu bhandu bhabhili abha yuuyo ghwamusala, 25 ukuti apyanile pa mbombo iya bhutumighwa iya Yuuta yuuyo akafwa nu kubhuuka kuukwo kumubhaghiile.” 26 Po bhakabhasala ku sila iya kubhakomela ikuula‡1:26 Kubhakomela ikuula ABhayuuta bhakabha nu lwiho ulwa kusimba ingamu isha bhandu mu mayondo amandi nu kughabhiika mu ikopo. Po bhakayungaanianga ikopo ilyo ukufika paapo iyondo limo lyafuma nu kughwa paase. Po umundu yuuyo ingamu yaake yikasimbighwa pi iyondo iyo, ghwe yuuyo bhakatingi aasalighwa. abhandu bhabhili bhala, ikuula yikamughwila uMaatiyaasi. Pabhumalilo abhiitiki bhala bhakamubhelengela uMaatiyaasi ukubha mutumighwa pamupeene na bhatumighwa abhanine kalongo na yumo (11) bhala.
*1:3 1:3 Bhelenga ishu ilya Ichitangalala icha Chaala ku Mashu aMaheesha.
†1:4 1:4 Bhelenga ingamu iya Yelusaleemu ku Mashu aMaheesha.
‡1:5 1:5 Indimukooshighwange nu Mbepo uMwelu Kwo kuti, uChaala indiakamutume uMbepo uMwelu ukwikala pamupeene nabho nu kubhalongosha mu bhwumi bhwabho bhwoshi. Soona indiakabheelufye imbiibhi shaabho shooshi nu kubhapa amaka agha kumughindika umwene.
§1:10 1:10 Abhaliisha bhabhili bhakabha bhandumi abha Chaala.
*1:13 1:13 USiimoni uMulwila Chiisu akabha mundu yuuyo akalwilagha ichiisu chaake ku silikali iya Looma. Mu bhokalata abhanine akwitishighwa Siimoni uMukananaayi (Mataayi 10:4; Maalika 3:18).
†1:16 1:16 Bhelenga ingamu iya UNdaabhiti ku Mashu aMaheesha.
✡1:18 1:18 Mataayi 27:3-8
✡1:20 1:20 Sabhuli 69:25
✡1:20 1:20 Sabhuli 109:8
‡1:26 1:26 Kubhakomela ikuula ABhayuuta bhakabha nu lwiho ulwa kusimba ingamu isha bhandu mu mayondo amandi nu kughabhiika mu ikopo. Po bhakayungaanianga ikopo ilyo ukufika paapo iyondo limo lyafuma nu kughwa paase. Po umundu yuuyo ingamu yaake yikasimbighwa pi iyondo iyo, ghwe yuuyo bhakatingi aasalighwa.