5
1 Paapo ghweshi umupuuti usongo akasalighwanga ukufuma mu bhandu abhanine ukuti abhombaghe imbombo mu bhuyo ubhwa bhanine. Umwene akamufumikishanga uChaala ifyabhupe ni finyamaana ifya kupemba ku nongwa iya mbiibhi isha bhandu. 2 Umupuuti usongo uyo abhaghiile ukubhapelela ichisa abhandu bhala bhaabho bhakubhomba imbiibhi chishita kumanya ku nongwa iya kuti ghwepe mwonywa. 3 Yo yiiyo nongwa iyi akulondighwa ukufumya ifyabhupe ukuti uChaala amuhobhokele imbiibhi shaake. Bhwo aabhomba ulwo, akufumya ifyabhupe ifinine ukuti uChaala abhahobhokele abhandu abhanine imbiibhi shaabho.✡5:3 Bhalaabhi 16:11-19 4 Soona naayumo umundu yuuyo abhaghiile ukwibhiika ukubha umupuuti usongo, loole uChaala ghwe yuuyo akumusala isa muumwo akamusala uAaloni.*5:4 UAaloni ghwe yuuyo akabha mupuuti usongo ughwa kwanda (Bhufumilo 28:1-3).
5 Bhubhuubhwo, ghwepe uKilisiti atakiilondela mwene ulughindiko ulwa kubha Mupuuti uSongo, loole uChaala ghwe yuuyo akamusala nu kumubhuula akati,
“Ughwe ghwe Mwana ghwangu,
umuusughu naabha nee Ghuuso.”✡5:5 Sabhuli 2:7
6 Soona shisimbiighwe pabhuyo ubhunine mu Masimbo aMeelu, uChaala akati,
“Ughwe ghwe Mupuuti bhwila na bhwila
isa muumwo uMelikisendeki†5:6 UMelikisendeki akabha mupuuti yuuyo akamwipuutagha uChaala mu kaaya aka Yelusaleemu akabhalilo kaako uAbhulahamu akabha mwumi. Umwene akabha mupuuti ughwa Chaala ku kabhalilo akatali bhwo uChaala akaali ukumubhiika uAaloni yuuyo ichikolo chaake cheene chikabhiikighwa ukubha cha bhapuuti (Bhwandilo 14:17-20). akabheela.”✡5:6 Sabhuli 110:4
7 Bhwo uYeesu ali pa chiisu panu, akiipuuta, akasuuma nu kulila ngaani kwa Chaala yuuyo ali na maka agha kumupoka ukufuma ku bhufwe.✡5:7 Mataayi 26:36-46; Maalika 14:32-42 UChaala akapulikagha inyipuuto shaake ku nongwa iya kwiyiisha kwake. 8 Pamupeene nu kuti uYeesu akabha Mwana ghwa Chaala, poope akamanyila ukumupulika uChaala ku sila iya ndamyo shiisho shikamwaghagha. 9 Ukukongana ni isho, uChaala akamubhaghisha uYeesu ukubha bhwandilo ubhwa bhupoki ubhwa bhwila na bhwila ku bhandu bhooshi bhaabho bhakumupulika. 10 UChaala akamubhiika ukubha Mupuuti uSongo isa muumwo uMelikisendeki akabheela.
Isoki ku sha kululeka ulwitiko
11 Tuli nasho inyingi isha kuyugha ku sha Yeesu ukubha Mupuuti uSongo, loole pakafu ukubhabhuula ku nongwa iya kuti mutaa bhengo ukushaaghania. 12 Ku kabhalilo aka umwe mwalondighwanga ukuti ngali muli bhamanyishi abha bhanyiinyu, loole umwe mukaali mukulonda umundu ughwa kubhamanyisha ifimanyisho ifya bhwandilo ifya lishu ilya Chaala! Ku nongwa iyo, umwe muli ungati bhaana abhakeke bhaabho bhakwonga, loole bhakupootwa ukulya ifindu ifikafu. 13 Po umundu yuuyo akwongaashe, umundu uyo mwana mukeke yuuyo atakushaaghania shiisho nyiisa na shiisho mbiibhi. 14 Loole abhandu bhaabho bhakalite bho bhaabho bhakulyanga ifindu ifikafu, abhandu abho bhamanyiile ukushaaghania shila shiisho nyiisa na shiisho mbiibhi.
✡5:3 5:3 Bhalaabhi 16:11-19
*5:4 5:4 UAaloni ghwe yuuyo akabha mupuuti usongo ughwa kwanda (Bhufumilo 28:1-3).
✡5:5 5:5 Sabhuli 2:7
†5:6 5:6 UMelikisendeki akabha mupuuti yuuyo akamwipuutagha uChaala mu kaaya aka Yelusaleemu akabhalilo kaako uAbhulahamu akabha mwumi. Umwene akabha mupuuti ughwa Chaala ku kabhalilo akatali bhwo uChaala akaali ukumubhiika uAaloni yuuyo ichikolo chaake cheene chikabhiikighwa ukubha cha bhapuuti (Bhwandilo 14:17-20).
✡5:6 5:6 Sabhuli 110:4
✡5:7 5:7 Mataayi 26:36-46; Maalika 14:32-42