8
Umupuuti usongo ughwa lwitikano ulupya
1 Inongwa ingulu ku shooshi isho yo iyi, utwe tuli naghwe uMupuuti uSongo ughwa luko ulwo, umwene iikiile kulubhafu ulwa kumwisa ulwa chitengu icha bhunyafyale icha Chaala ughwa Maka Ghooshi kumwanya ukwo. 2 Kumwanya ukwo akubhomba imbombo iya Mupuuti uSongo Pabhuyo uBhwelu, kwo kuti mu itembe ilya nalooli lila liilyo umundu atakalisenga loole uMalafyale uChaala mwene.
3 Ghweshi umupuuti usongo akabhiikighwa ukuti afumyange ifyabhupe, bhubhuubhwo uMupuuti ghwitu uSongo uyo akulondighwa ukuti ghwepe abhe nako kamu aka kufumya kwa Chaala. 4 Linga uYeesu akeendelelagha ukwikala mu chiisu ichi, ngali ataa Mupuuti na kaakanandi paapo mu chiisu ichi bhaliipo abhapuuti bhaabho bhakufumya ifyabhupe ukukongana ni ndaghilo isha Moose. 5 Shila shiisho abhapuuti abho bhakubhomba Pabhuyo uBhwelu, chifwanikishooshe icha shila isha nalooli shiisho shili Pabhuyo uBhwelu kumwanya kula. Yo yiiyo nongwa bhwo uMoose akwitendekesha ukusenga itembe,*8:5 Itembe Ku Bhaisilaeli, itembe ili likabha bhuyo bhuubhwo bhukasengighwa ku nongwa iya kumwipuuta uChaala akabhalilo kaako aBhaisilaeli bhakachuulagha ukubhuuka ku chiisu icha Kaanani. Mu itembe ilyo likabhiikighwanga Ibhokoshi ilya Lwitikano liilyo likalangishanga ukuti uChaala ali pamupeene nabho (Bhufumilo 25:8-9). uChaala akamubhuula akati, “Tendekesha kooshi akandu ukukongana na shooshi shiisho ingakulangisha pa kaghamba aka Sinaayi kala.”✡8:5 Bhufumilo 25:40 6 Loole uChaala amupiile uYeesu imbombo iya bhupuuti yiiyo nyiisa ngaani ukukinda iya bhapuuti aBhayuuta yila. UYeesu ghwe yuuyo akubhafwania abhandu nu Chaala mu lwitikano luulwo lwisa ukukinda lula luulwo abheene bhakalubhombelagha. Soona, ulwitikano ulwo lusengiighwe pa lwalilo ulwisa, kwo kuti pamwanya pa lufingo ulwisa ngaani ukukinda ulufingo ulwa lwitikano ulukuulu lula.
7 Linga ulwitikano ulwa kwanda lukiiyiilanianga, po uChaala ngali atalubhiikite ulwitikano ulwa bhubhili. 8 Loole bhwo uChaala aabhubhona ubhutulanongwa ubhwa bhandu bhaake, akayugha akati,
“Pulikisha, akabhalilo kakwisa,
kaako indiingabhiike ulwitikano ulupya
na bhandu abha Isilaeli na bhandu abha Yuuta.
9 Ulwitikano ulupya ulu lutaalukabhe ungati ulwa kubhwandilo lula luulwo ingabhiika na bhosekulu bhaabho
akabhalilo kala kaako ingabhalongoshanga akiisa ukufuma ku chiisu icha Miisili.
Abheene bhatakabha bhasubhaalilighwa, soona bhatakakongagha ulwitikano lwangu ulwa kubhwandilo. Iyi yo yiiyo nongwa indakabhasaaghila soona.
10 Ulu lwo luulwo lwitikano ulupya luulwo indiingiitikane na Bhaisilaeli amashiku agho ghaagho ghakwisa.
Indiingabhiike indaghilo shangu mu nyinongʼono shaabho, indiingashisimbe mu ndumbula shaabho.
Une indiingabhe nee Chaala ghwabho bhoope indibhakabhe bhandu bhangu.
11 Ataaakabheepo umundu naayumo yuuyo indiakamumanyishange umunine,
pamu ughwa kumubhuula umunine ukuti, ‘Mumanye uMalafyale uChaala.’
Ghweshi umundu ukufuma ku mukeke ukufika kwa songo indibhakaamanye une.
12 Paapo indiingabhahobhokele ubhubhiibhi bhwabho, indaaingashikumbuke soona imbiibhi shaabho.”✡8:8-12 Yelemiiya 31:31-34
13 UChaala paapo akuyugha akuti ulwitikano ulu “lupya,” akulangisha ukuti ulwitikano ulwa kwanda “lukuulu.” Po akandu kooshi kaako kaabha kakuulu soona kaywelukite, katali ni mbombo naayimo, kali papiipi ukusobha.
*8:5 8:5 Itembe Ku Bhaisilaeli, itembe ili likabha bhuyo bhuubhwo bhukasengighwa ku nongwa iya kumwipuuta uChaala akabhalilo kaako aBhaisilaeli bhakachuulagha ukubhuuka ku chiisu icha Kaanani. Mu itembe ilyo likabhiikighwanga Ibhokoshi ilya Lwitikano liilyo likalangishanga ukuti uChaala ali pamupeene nabho (Bhufumilo 25:8-9).
✡8:5 8:5 Bhufumilo 25:40
✡8:12 8:8-12 Yelemiiya 31:31-34