INongwa iNyiisa isha Yeesu Kilisiti
isa muumwo shikasimbighwa nu
Maalika
Shiisho shikutangila
Ukalata uyu akasimbighwa nu Maalika yuuyo ingamu inine ghwi Yoohani Maalika, yuuyo akabha ghwe yumo mu bhiitiki abha kwanda bhaabho bhakiikalagha mu Yelusaleemu (Mbombo isha Bhatumighwa 12:12). Shikulangisha ukuti uMaalika akasimba ukalata uyu mu fyinja ifya malongo mahaano na limo ukufika amalongo mahaano na mabhili (60-70) bhwo uYeesu aapaapighwa. UMaalika akaghendagha pakulumbilila iNongwa iNyiisa na bhalumbilili isa uPaabhuli (Mbombo isha Bhatumighwa 13:1-13), uBhalinabha (Mbombo isha Bhatumighwa 15:36-41) nu Peeteli (1 Peeteli 5:13).
Akabhasimbilagha ukalata uyu abhiitiki abha mu kaaya aka Looma bhaabho akabhalilo ako bhakashaaghagha indamyo inyingi ukufuma kwa malafyale uNeelo.
Inyango iya kusimba ukalata uyu yikabha ya kubhakasha aBhakilisiti mu lwitiko. Soona akubhabhuula aBhakilisiti abha ku chiisu icha Looma ukuti bheendelelaghe ukwitendekesha nu kwikasha, paapo abhalughu bhaabho bhakulonda ukubhatiisha mu lwitiko luulwo bhali nalwo mwa Yeesu Kilisiti.
UMaalika akulingaania inyingi shiisho uYeesu akabhombagha ukukinda shila shiisho akalumbililagha. Tukutesha ifyika ifyingi fiifyo uYeesu akabhomba, akashikiishanga imbepo imbiibhi nu kubhahobhokela abhandu imbiibhi shaabho. Shooshi isho shikulangisha amaka ghaake nu kuti umwene akafuma kwa Chaala. Soona shikulangisha ukuti akiisa pakubhufumya ubhwumi bhwake ukuti abhaabhule abhandu ukufuma mu maka agha mbiibhi.
1
UYoohani akubhatendekesha abhandu ukumupokeela uYeesu
(Mataayi 3:1-12; Luuka 3:1-18; Yoohani 1:19-28)
1 Ubhwandilo ubhwa Nongwa iNyiisa isha Yeesu Kilisiti*1:1 Bhelenga ingamu iya UKilisiti ku Mashu aMaheesha. uMwana ughwa Chaala†1:1 Bhelenga ishu ilya UMwana ughwa Chaala ku Mashu aMaheesha. bhwo ubhu. 2 Inongwa ishi shikabhoneka isa muumwo shikasimbighwa mwa kalata ughwa musololi‡1:2 Bhelenga ishu ilya Umusololi ku Mashu aMaheesha. uYesaaya, uChaala akuti,
“Tesha, ingumutuma ughwandumi ghwangu mundaashi yaako yuuyo indiakatendekeshe isila yaako.”✡1:2 Malaaki 3:1
3 “Umundu akwitisha mu lungalangala akuti,
‘Tendekeshanga isila iya Malafyale,
gholoshanga muumwo indiakaghendaghe.’ ”✡1:3 Yesaaya 40:3
4 Ughwandumi uyo akabha ghwi Yoohani uMwoshi. Akabhoneka mu lungalangala, akalumbililagha ukuti abhandu bhooshi bhiilaataghe imbiibhi nu kwoshighwa ukuti uChaala abhahobhokele imbiibhi shaabho. 5 Po abhandu abhingi ukufuma mu kaaya aka Yelusaleemu na mu chiisu chooshi icha Yuteeya bhakabhuukagha kwa Yoohani. Bhakiilaatagha imbiibhi shaabho, ghwepe akabhooshanga mu lusooko ulwa Yoolotani. 6 UYoohani akafwalagha umwenda ghuughwo ghukasonighwa na meeya agha ngamila,§1:6 Ingamila chinyamaana icha kusugha chiicho chikulu ukukinda ifinyamaana fyoshi mu chiisu icha Isilaeli. Soona, ichinyamaana ichi chibhaghiile ukukibha chishita kungʼwa amiishi akabhalilo akatali. akiipinyagha umukanda ughwa likwela mu musana ghwake.*1:6 Imyenda yiiyo uYoohani akafwalagha yikaghelela ni ya musololi uEliiya (2 Bhanyafyale 1:8). Soona akalyanga abhopaashi nu bhwuki ubhwa mu chitengele. 7 Akalumbililagha ku bhandu akatingi, “Kunyuma kukwangu akwisa umundu ughwa maka ukuunginda une, yuuyo indabhaghiile ukubha mubhombi ghwake, soona indabhaghiile ukufulama nu kusatula utughoye utwa filato fyake. 8 Une ingubhoosha na miishi gheene, loole umwene indiakabhooshange nu Mbepo uMwelu.”
UYeesu akwoshighwa nu kughelighwa
(Mataayi 3:13–4:11; Luuka 3:21-22; 4:1-13)
9 Ku kabhalilo kala kala uYeesu akiisa ukufuma ku kaaya aka Naasaleeti†1:9 Bhelenga ingamu iya Naasaleeti ku Mashu aMaheesha. iya mu chiisu icha Ghalilaayi,‡1:9 Bhelenga ingamu iya Ghalilaayi ku Mashu aMaheesha. akabhuuka nu kumwagha uYoohani mula. Po uYoohani akamwosha mu lusooko ulwa Yoolotani. 10 Bhwo uYeesu akutiila ukufuma mu miishi, nakalinga akaagha kumwanya kwighuka, akamubhona uMbepo ughwa Chaala akwika pamwanya papaake ungati ngunda. 11 Po ishu ukufuma kumwanya likapulikighwa likati, “Ughwe ghwe Mwana ghwangu umughanighwa, inguhobhoka nuughwe.”
12 Nakalinga, uMbepo ughwa Chaala akamulongosha uYeesu ukubhuuka ku lungalangala. 13 UYeesu akiikala kula kula amashiku amalongo manna (40) ukuti uSeetano§1:13 Bhelenga ingamu iya USeetano ku Mashu aMaheesha. amughele. Mu mashiku agho, akiikalagha pamupeene ni fikanu, soona abhandumi abha Chaala bhakiisa nu kumubhombela.
UYeesu akubhiitisha abhamanyili bhaake
(Mataayi 4:12-22; Luuka 4:14-15; 5:1-11)
14 UYoohani akapinyighwa mu nyumba iya bhapinyighwa.✡1:14 Maalika 6:17-20 Bhwo aapinyighwa, uYeesu akabhuuka mu chiisu icha Ghalilaayi, akalumbililagha iNongwa iNyiisa iya Chaala, 15 akatingi, “Akabhalilo kafikite, ichitangalala icha Chaala*1:15 Bhelenga ishu ilya Ichitangalala icha Chaala ku Mashu aMaheesha. chipalamiile. Pindukagha nu kwilaata imbiibhi shiinyu nu kuyiitika iNongwa iNyiisa iya Chaala.”
16 Ishiku limo uYeesu akaghendagha kulubhafu kwa sumbi ughwa Ghalilaayi. Bhwo akughenda, akabhabhona abhalobha iswi bhabhili bhaabho bhakabha ghwi Siimoni nu munungʼuna uNdeleeya bhakuponia ifilepa mwa sumbi. 17 Po uYeesu akabhiitisha akati, “Isagha muungongaghe une! Nuune indiimbabhiike ukubha bhalobha bhandu.”†1:17 Abhalobha bhandu Kwo kuti, bhandu bhaabho bhakubhalumbilila abhandu ukuti bhiilaate imbiibhi shaabho nu kubhabhiika kwa Chaala. 18 Po nakalinga, bhakafileka ifilepa fyabho, bhakamukonga.
19 UYeesu akaghenda pandaashi panandi pamupeene na bhamanyili bhaake bhabhili abho, akabhabhona abhandu bhabhili, uYaakobhu nu munungʼuna uYoohani, abhaana abha Sebhetaayi. Abhaana abho bhakabha mu bhwato, bhakatendekeshanga ifilepa fyabho. 20 Akabhiitisha ukuti bhamukongaghe nu kubha bhamanyili bhaake. Po bhakamuleka ughwise mu bhwato pamupeene na bhabhombi nu kwanda ukumukonga uYeesu.
UYeesu akumuposha umundu ughwa mbepo imbiibhi
(Luuka 4:31-37)
21 UYeesu na bhamanyili bhaake bhakabhuuka nu kufika mu kaaya aka Kapenabhumu. Bhwo lyafika ishiku ilya Sabhati,‡1:21 Bhelenga ishu ilya ISabhati ku Mashu aMaheesha. uYeesu akiingila mu sinaghoghi§1:21 Bhelenga ishu ilya Isinaghoghi ku Mashu aMaheesha. nu kwanda ukumanyisha. 22 Abhandu bhooshi bhakaswigha leka ni fimanyisho fyake, paapo atakamanyishanga ungati bhamanyishi abha ndaghilo isha Moose,*1:22 Bhelenga ishu ilya Abhamanyishi abha ndaghilo isha Moose ku Mashu aMaheesha. loole akamanyishanga ungati mundu yuuyo ali na maka.
23 Mu sinaghoghi mula, akabhaamwo umundu yumo yuuyo akakolighwa ni mbepo imbiibhi. Umundu uyo, akakuuta ku ishu ilya pamwanya 24 akati, “Ghwe Yeesu ughwa kufuma ku Naasaleeti! Kali, tuli bhuki tweshi? Kali, ghwisile pakutupyuta? Naakumanya ukuti ughwe ghwe Mwelu ghwe ufumite kwa Chaala.” 25 Loole uYeesu akayikemela imbepo imbiibhi yila akati, “Ghwe mbepo imbiibhi ughwe, sumba! Fumaamwo mu mundu uyu.” 26 Po imbepo imbiibhi yila yikamuyungaania ku maka umundu yula, yikakuuta ku ishu ilya pamwanya nu kutiilaamwo mu mundu yula.
27 Abhandu bhooshi bhakaswigha nu kubhuusania bheene-bheene bhakati, “Kali, mbombo shiki ishi shiisho tukushibhona? Kali, fimanyisho ifipya? Paapo umundu uyu akumanyisha ku maka, soona ali na maka agha kushilaghila ni mbepo imbiibhi, shoope shikumupulika!” 28 Inongwa isha Yeesu shikafumukwa lubhilo mu twaya twoshi utwa mu chiisu icha Ghalilaayi.
UYeesu akubhaposha abhabhine abhingi
nu kushikiisha imbepo imbiibhi
nu kushikiisha imbepo imbiibhi
(Mataayi 8:14-17; Luuka 4:38-41)
29 Nakalinga, uYeesu na bhamanyili bhaake, uYaakobhu, uYoohani, uSiimoni nu Ndeleeya bhakafumaamwo mu sinaghoghi nu kwingila mu nyumba iya Siimoni nu Ndeleeya. 30 Ungʼinafyala ughwa Siimoni akabha aghonite pa chitala ku nongwa iya sekema, po bhakamupangila uYeesu isha sekema yaake. 31 Po uYeesu akapalamila papiipi, akamukola akakono nu kumwinula. Nakalinga, umukolo yula akapola isekema yila. Po akanyatuka nu kwanda ukumutendekeshekesha uYeesu ifindu.
32 Bhwo lyabha lya namasubha, abhandu bhakiisa kukwake na bhabhine abhingi na bhaabho bhakabha ni mbepo imbiibhi. 33 Po abhandu abhingi abha mu kaaya aka Kapenabhumu kala, bhakabhungaana pa mulyango ughwa nyumba iya Siimoni yila. 34 UYeesu akabhaposha abhandu abhingi bhaabho bhakabha na mabhine amingi nu kushikiisha imbepo imbiibhi inyingi, loole atakashiitikisha imbepo shila ukuyugha, paapo shikabha shimumeenye ukuti umwene Mwana ghwa Chaala.
UYeesu akulumbilila ku bhandu
abha mu twaya utunine utwa mu Ghalilaayi
abha mu twaya utunine utwa mu Ghalilaayi
(Luuka 4:42-44)
35 Ishiku ilya ningeelo pangeelo ngaani bhwo kukaali ukucha, uYeesu akatiila nu kubhuuka pabhuyo ubhushiifu, akaanda ukwipuuta. 36 Bhwo uSiimoni na bhanine bhaagha uYeesu ataliimwo mu nyumba yila, bhakabhuuka pakumulonda. 37 Bhwo bhaamwagha, bhakamubhuula bhakati, “Ghwe Mumanyishi, abhandu abhingi ngaani bhakukulonda.” 38 Umwene akabhabhuula akati, “Tubhuuke ku bhandu abha mu twaya utunine tuutwo tuli papiipi na kaaya aka, ukuti kwope inje indumbilile iNongwa iNyiisa paapo iyi yo yiiyo mbombo niisile pakuyibhomba.” 39 Po akabhuuka nu kughenda mu twaya twoshi utwa mu Ghalilaayi nu kulumbilila mu masinaghoghi ghaabho nu kushikiisha imbepo imbiibhi.
UYeesu akumuposha umundu ughwa mbungo iya makete
(Mataayi 8:1-4; Luuka 5:12-16)
40 Po umundu yumo yuuyo akabha ni mbungo iya makete,†1:40 Imbungo iya makete Ukukongana ni nyiiho isha Bhayuuta, umundu ughwa mbungo iya makete bhakatingi munyali, soona bhatakamwitikishanga ukupalamilana nu kwongaana pakwipuuta pamupeene na bhandu bhaabho bhakafu. akabhuuka kwa Yeesu, akafughamila pandaashi papaake nu kumusuuma akati, “Ghwe Malafyale, linga ghwighanite, ubhaghiile ukuunyeelufya.” 41 Ichisa chikamukola uYeesu, akagholosha akakono kaake, akamweghelesha, akati, “Niighanite, elupa.” 42 Nakalinga, imbungo iya makete yila yikatiila, umundu yula akeelupa. 43 Po uYeesu akamubhuula ukuti abhuukaghe lubhilo nu kumusoka ku maka akati, 44 “Manye umubhuulaghe umundu naayumo. Loole bhuuka ghwilangishe ku mupuuti‡1:44 Bhelenga ishu ilya Abhapuuti ku Mashu aMaheesha. nu kufumya ifyabhupe ifya kupemba isa muumwo uMoose akalaghilila ukulangisha ukuti upolite.”✡1:44 Bhalaabhi 14:1-32 45 Loole umundu yula atakasumba, akabhuuka nu kwanda ukufumusha pooshi pala paapo akabhuukagha inongwa isha muumwo uYeesu akamuposha. Ku nongwa iya nongwa isho, uYeesu akapootwa ukwingila pabhwelu mu kaaya kooshi kala. Loole akiikala kuuse kuukwo kutakabha na bhandu. Poope abhandu bhakiisagha kukwake ukufuma imbafu shooshi.
*1:1 1:1 Bhelenga ingamu iya UKilisiti ku Mashu aMaheesha.
†1:1 1:1 Bhelenga ishu ilya UMwana ughwa Chaala ku Mashu aMaheesha.
‡1:2 1:2 Bhelenga ishu ilya Umusololi ku Mashu aMaheesha.
✡1:2 1:2 Malaaki 3:1
✡1:3 1:3 Yesaaya 40:3
§1:6 1:6 Ingamila chinyamaana icha kusugha chiicho chikulu ukukinda ifinyamaana fyoshi mu chiisu icha Isilaeli. Soona, ichinyamaana ichi chibhaghiile ukukibha chishita kungʼwa amiishi akabhalilo akatali.
*1:6 1:6 Imyenda yiiyo uYoohani akafwalagha yikaghelela ni ya musololi uEliiya (2 Bhanyafyale 1:8).
†1:9 1:9 Bhelenga ingamu iya Naasaleeti ku Mashu aMaheesha.
‡1:9 1:9 Bhelenga ingamu iya Ghalilaayi ku Mashu aMaheesha.
§1:13 1:13 Bhelenga ingamu iya USeetano ku Mashu aMaheesha.
✡1:14 1:14 Maalika 6:17-20
*1:15 1:15 Bhelenga ishu ilya Ichitangalala icha Chaala ku Mashu aMaheesha.
†1:17 1:17 Abhalobha bhandu Kwo kuti, bhandu bhaabho bhakubhalumbilila abhandu ukuti bhiilaate imbiibhi shaabho nu kubhabhiika kwa Chaala.
‡1:21 1:21 Bhelenga ishu ilya ISabhati ku Mashu aMaheesha.
§1:21 1:21 Bhelenga ishu ilya Isinaghoghi ku Mashu aMaheesha.
*1:22 1:22 Bhelenga ishu ilya Abhamanyishi abha ndaghilo isha Moose ku Mashu aMaheesha.
†1:40 1:40 Imbungo iya makete Ukukongana ni nyiiho isha Bhayuuta, umundu ughwa mbungo iya makete bhakatingi munyali, soona bhatakamwitikishanga ukupalamilana nu kwongaana pakwipuuta pamupeene na bhandu bhaabho bhakafu.
‡1:44 1:44 Bhelenga ishu ilya Abhapuuti ku Mashu aMaheesha.
✡1:44 1:44 Bhalaabhi 14:1-32