Lilaghanu lya shonu 2 VAKOLINDU 1

BALUWA YA PILI YA PAULI KWA VANDU VA KOLINDU

2 VAKOLINDU

ULONGULELU

Baluwa ayi ya pili kwa Vakolindu yiyandikiwa na ndundami Pauli yaveli kucha myaka ya milongu muhanu na muhanu mbaka milongu muhanu na sita naha kukandila pawonikili Yesu. Sula ya 1:1.

Ayi ndi Baluwa yaki ya pili yituvelili nashu gati ya baluwa shaki shavayandikilili vandu va lipinga lya yivamjumilili Kilistu lya Kolindu. Vasomi vajumilili kucha mwanja mtasi Pauli ayandikili baluwa ngali kwa Vakolindu. Tuvahela baluwa ngimu yiyandikiwili mubaluwa ayi musula ya 2:3-4:2 Yikudeteka kucha baluwa ayi ya Vakolindu wa pili yiyandikiwa chipindi Pauli paghaveyi aku Makedoniya sula ya 2:13.

Baluwa ya pili yaveli ya paweka kwanongwa yikwilata milandu ya mundu mweni na hoshu shaki. Pauli alangushili seku yaki kwilata milandu ya nyanyi yapokilili kufuma kwa Titusi kwilata lipinga lya vandu yivamjumilili Kilistu va aku Kolindu. Mubaluwa ayi tuwona ng'ulilu yisasambuliwili kwilata kutawula ngimu wulilaghila lilaghanu lya shonu, mahali pala Pauli akutawula malayishu va kukungasha mbiya dasiyeghiwi kuvatanga vandu yivamjumilili Yesu va aku Yelusalemu sula ya 8-9 Yawonikili kucha vandundami vamu va udesi yivafumili panji ya lipinga lya vandu yivajumilili Yesu vatolili fwasi ya uchimdwama wuvelili gati ya vandu vamonga yivavelili mulipinga lya vandu yivamjumilili Yesu kwa Pauli kuyikwisha veni. Veni vawupufyili uwesu wa Pauli wuvelili wukukuvilisha kwa liwovi uwesu waki wavelili nawu kucha ndundami wa Yesu Kilistu mbaka mbelu ya Vakolindu wa 2.

Fivelili amu kwa chikata

Pauli akukanda baluwa yaki kwa kuvajambusha lipinga lya vandu yivamjumilili Kilistu. sula ya 1:1-7.

Pambeli Pauli akuhimulila kwilata kughalambula mwanja waki na lulayilayi lwa yangili kwilata veni na nyangulilu yawu yiilata baluwa yaki ya mwanja mtasi sula ya 1:8-7:16.

Kandi Pauli akuvagayila layilayi kwilata kukungasha mbiya kwanongwa ya kuvatanga vandu yivajumilili Kilistu va aku Yelusalemu sula ya 8:1-9:15.

Pauli akwitashila kwa kuvakayika ndambu ya mwanja waki dawuyisi pambeli sula ya10:1-13:10.

Jambu kufuma kwa Pauli

1 Nenga Pauli ndundami wa Yesu Kilistu ngimu ya utami wa Chapanga, pamu na mulongu wetu Timotewu tukuvajambusha.

Tukuvayandikila yumwi lipinga lya vandu yimumjumilili Kilistu yimuvelili aku Kolindu na vandu va Chapanga vosi poposi pala pamuvelili mumlima wa Akaya.

2 Usangi na kusika kufuma kwa Tati wetu Chapanga pamu na Bambu Yesu Kilistu yivi na yumwi.

Pauli akumlumba Chapanga

3 Leki tumjumi Chapanga Tati wa Bambu wetu Yesu Kilistu, Tati wa lusungu, Chapanga wa kukola mawoku kwa ndambu shosi, 4 mweni akutukola mawoku yufwi mutabu shosi, ili na yufwi tuweshi kuvakola mawoku vayetu mutabu shosi ngimu watukolili Chapanga. 5 Ngimu wuyivelili gobuleku ya Kilistu payisidi mugati ya yufwi, ndi wuwula tukusidi kukamuliwa mawoku kufuma kwa mweni. 6 Payiva tukupata tabu, topi tabu ayi yikuva kwanongwa ya kukoliwa mawoku na yumwi mulowuliwi. Patukoliwa mawoku ndi utangi kwa yumwi mukuyiwunishila tabu kucha yiyilayila yitupata yufwi. 7 Kwanongwa tumanya fitushuvilila kwa yumwi fiva fikomi, kucha patuva pamu mutabu shetu, wuwowu datuvi pamu mukukoliwa mawoku.

8 Valongu, tukudayila kuvafifa ha kuvawombela tabu asi situpatili aku Asia shaveli ngomi shatutopilili munu mbaka tudoya kuyikala. 9 Yina, mundima shetu twawonili kucha chipindi chetu cha kusova chifika. Yavelili nahawu ili tuwuliwi ndambu ya kumwidumba Chapanga yavashukusha yivasovili, ngajila kwidumba liwovi lyetu twaveni. 10 Mweni atulowoli mumyowu ya njifwa na yufwi tukushuvilila daayendeleli kutujabula kandi muhatali ya njifwa. 11 Mututangili yufwi kwa dadavu shenu dasiyangiwi na Chapanga datusangili yufwi na vatangalili davamjumi Chapanga kwanongwa ya yufwi.

Pauli aghalambulili mwanja waki

12 Yufwi tukwidumba utovileli wa natilu yetu wukutugayila chiganu kucha ndambu yitwikala mumlimawu na chamunu kwa yumwi, kwa ushisha moyu na ugoleki wutusangiliwili na Chapanga, tulongushiwa ha na luhunja lwa chiwundu ila usangi wa Chapanga. 13 Tukuvayandikila filongu fingi ha ila filongu fila fimuwesha kufisoma na kufimanya. Nenga ngushuvilila kucha damumanyi findu afi kwa chiganu, 14 topi ponopa mumanya nenga padokwa hela, pambeli tumanya mulijuva lila lya kuwuya Bambu Yesu yumwi damwidumbili yufwi ngimu yufwi datwidumbili yumwi.

15 Kwanongwa ndavelili na chiganu na afi, mwanja mtasi ndayilatili kwisa kuvatanga yumwi ili mupati usangi myanja mivili. 16 Ndayilatili kutyangila kwa yumwi pandiveyi mumwanja kuyenda mumkowa wa Makedoniya wuwowu chipindi cha kuwuya, mundangi mumwanja wangu wa kuyenda Yudeya. 17 Wuli mukucha pandalisheyi afi mukacheyi ndiva kucha mundu yangajila chiganu? Awu mukacheyi namulu yangu yavelili ya chiwundu yakudeta “Yina yina” na “Ng'odu ng'odu” mwanja wumu? 18 Ngimu Chapanga wavelili wa nakaka, topi, twavawombilili ha yumwi chilongu cha “Yina” na “Ng'odu” kwa chipindi chimu. 19 Nongwa Yesu Kilistu mwana wa Chapanga, mweni yitumulandulili yufwi na Silivanusi na Timotewu avelili wa “Yina” na “Ng'odu” ha ila mugati ya mweni chipindi chosi mwaveli “Yina.” 20 Nongwa kupitila Kilistu jangi shosi sha Chapanga siva “Yina” kwa mweni. Kupitila mweni tukuwomba, “Yina” kwa ukomi wa Chapanga. 21 Mweni Chapanga ndi yatudindasha yufwi na yumwi Mukilistu, mweni ndi yatushaghili mafuta, 22 ndi yatutayili lihundu lya kuva va mweni na kutusangila Mfuki Mng'alili mundima shetu kucha chilangushilu cha findu fyosi fyatuvikilili kwanongwa ya yufwi. 23 Chapanga ndi mtovilela wa nenga, mweni kayimanya ndima yangu, nongwa nguvawonela lusungu ndi nongwa nyisa kandi ha aku Kolindu. 24 Tukudayila ha kuva kucha tukuvatavala muujumilwa wenu, yumwi mudindala muujumilwa wenu, chituyilata yufwi kugola chichuku pamu kwanongwa ya cheleli ya yumwi.