Téerëe ɗéɓpí bíníyú unna won Pool ɓëy Korente ra
Kúnsëe
Ƴee daa unna ɗéɓpí bíní Pool ɓëy Korente hom filiɓ Bíibëlë rë. Balaa unni ƴeh, ɗi húmú bíníté wë i un kay ƴi bíníyúy filiɓ Bíibëlë. Ɗi fi Pool nék daa yíp jaŋii Korente (Saame Tílëdí apootarra 18.1-28). Jamanii baaha nék, ɗeef gini baa jahte lool ndah waah yi ana ya filiɓ, ƴee na teeruu gaalla ra : yiiga tílté, pes lahte gina. Ƴee saye raa ƴee aye tahte níi haneella caakute a ɓaah yi wa. Yii hente pagaɗ ɓos ɓéeɓ húmú filiɓ. Kerceenna filiɓ, bi anuu waa haal ngémë, lahte iñi caakki wa húmú yíih wë níi, wa bíníyúté Pool meelute ri wa. Ɗi fi Pool ɓal lahte iñi ɗi kelohte wa waa na, antee waa bíní unni ƴeh.
Ɗi wonte sun fi ɓísëꞌí wa fi kerceenna : ƴee wonu nonu Pool na, ƴee wonu nonu Apolos na, ndaa ɗi wonte wa biti ɗi neh daa ri húl sun fi kurwaha ndah wa, te wa fi ƴaaha bëtsúuy tiyi (1.11-13). Ɗi wonte wa biti ɓal Ruuh-Peseŋ onte ow fi ow waa na ɓéeɓ yii mín ɗí, ti cérrí faanni bokuy yii na pagu wa nen, ndaa daa wa boku ɓéeɓ henute faana yínë. Kon wa fi ƴaa bokun ɓéeɓ wa hen yínë (12.11-12).
Ɗi wonte wa :
- yii leŋke ham-hami Koope a ham-ham ow (1.17 níi 2.16),
- yii leŋke tílëdí ɓosa húmú homaꞌ ow di ɓëy ílí jaŋaa ra (5.1-13),
- yii leŋke kooɗ a yesaꞌ (7.1-16),
- yii leŋke boꞌ yúul (8.1-13),
- yii leŋke ɗee henaꞌ ri apootari Kiristaa ra (9.1-27 ; 15.8-10),
- yii leŋke cagaɗ ƴaal a ɓeleɓ fíi Koope (11.1-16),
- yii leŋke fahaꞌ ow (13.1-13),
- yii leŋke ɗaŋ wonadi ɓëewë kéllúy rí (14.1-40),
- a yii leŋke koloh ɓúudé (15.12-54).
Ɓëyí fí jaŋi téeríi bee ɓéeɓ ay ot biti ow fi ow yen na ɓéeɓ Koope onte ri yii ay njiriñ ɓëewë ɓéeɓ, te ɗi ay ot biti ɓal yen fa gémú Kiristaa na ra ɓéeɓ, yen daa cérrí faani.
1
Wodoha
1-2 Ɗon fi ɓëy ílí jaŋii Koope di Korente, ɗon fa jébëlú Koope ndah nona nonu ɗon Yéesú-Kiristaa na ra, soꞌ mi Pool funi Sosten koy-yaafi yen, fun na woduu ron. Koope daa dëek ɗon ɗon henute ɓëewí, ɗoni ɓëewë tígí pay ow feey fa ɓéeɓ wa dëekúu Yéesú-Kiristaa Yíkíi yen fa daa lahaꞌ wa lahaꞌte yen ɗa. Soꞌ mi Pool nék, soꞌ fa falu apootari Yéesú-Kiristaa ndah Koope daa fahaꞌ baaha ra, ma na wodoh ron. 3 Baap-Koo a Yéesú-Kiristaa Yíkëe líhún rën mal, on ɗon jaamma !
Mala ñéyíɗ Koope Kiristaa na ra
4 Ma na sím Koope faraah di yii yuliɗte ɗon na ndah mala on ɗi ɗon ñéyíɗté rí Yéesú-Kiristaa na ra. 5 Nona nonu ɗon Kiristaa na ra, onte ron yin caak : Koope onte ron ɗon mínúté won níi mín, ɗon yúhúté níi yúh, 6 ndah yee seedeyu fun Kiristaa na ra haalte ron níi haal. 7 Kon, ɗon talluuy mali ay kollee Koope na, ɗon fa na sehu wahtaa nay feeñiyee Yéesú-Kiristaa Yíkíi yen ɗa. 8 Yéesú-Kiristaa Yíkíi yen daa nay ron ɓeddee ɗon ham híin níi lúsëenín, ɗon ɓanti lah yii wonun sun fon yiin nay rii nimile ra. 9 Ɗi fi Koope yii won ɗi ɓéeɓ ɗi paŋ ri, ɗi fa dëek ɗon ɗon non Koohi Yéesú-Kiristaa Yíkíi yen na ra.
Múuƴëꞌí ɓëy ílí jaŋaa
10 Koy-yaayyi ƴeh, daa mi na ɗaŋ ɗon ɗi ee di tii Yéesú-Kiristaa Yíkíi yen : kéldíi ɗon ɓanti ɗarsaꞌ hanndal kon. Héní yínë, ɗon bok nuf, ɗon ham yaa yínë. 11 Koy-yaayyi ƴeh, yee tah mi won ɗon yii baa ra, biti lahte ɓëewí nonu ɓëy faam Kolowe wonute soꞌ biti ɗon na hécëntúu filiɓ fon. 12 Mi fahaꞌ woni bitih : filiɓ fon, ƴee wonu wa nonu ɓëewí Pool ; ƴee wonu wa nonu ɓëewí Apolos ; ƴee wonu wa nonu ɓëewí Peer ; ƴee wonu wa nonu ɓëewí Kiristaa. 13 Ɗon habuu biti Kiristaa mín woralsuu a ? Soꞌ mi Pool daa mi daaƴu sun fi kurwaha ndah ɗon woo ? Moo ɗon bëtsúu tii soꞌ a ?
14 Mi gérémpé Koope di yee bëtsëy mí ow yínë sah ɗon na gét nëe Kíríspús a Gayus ra. 15 Kon kay ow ii won biti ɗon bëtsúu tii soꞌ ! 16 Manti nérsëh ɗee kan ! Daa mi bëtís Estefanas a ɓëy faami ɓal, henay wa fi ƴaa mi nérsëey tígí bëtsëꞌ mí ow kay. 17 Kiristaa wolay soꞌ ɓëewë në biti may waa bëtsé bëtsë, ɗi wol soꞌ waarii wa Uni Neba, mi ɓan ɗii pagaꞌ a ham-hami kolaꞌ ham-ham ow, toñeh ɗee nay mii wonee ra neɓ níi múur njiriñ mi húlí ɗi fi baa sun fi kurwaha.
Yéesú daa doolii Koope
18 Yee waareyu yii leŋke húlí Yéesú-Kiristaa sun fi kurwaha ra, wonaɗ dof ɓëewë na suu saŋkuye ra na ; ndaa ɗi doolii Koope yen fa homu kotti múc ɗë në. 19 Bíníyúté Téerëe bitih :
« May ƴím ham-hami ɓëewë ñaañu ra,
mi ƴím nuffi ɓëewë lahu af ra. »✡1.19 Saame Isayii 29.14
20 Ɓëewë ñaañu ra ay wonle yih ? Ɓëewë jaŋiyu ra ay wonle yih ? Ɓëewë mínú won ɗa ay wonle yih ? Koope teeɓaay biti ham-hami ëldúnë ɗi dof a ? 21 Nagajek, Koope teekiraꞌ a ham-hami ɓéeɓ, te ñaañi ɓëewë tahay wa yúh rí. Yii baa daa tah Koope caŋ sëmlëꞌí ɓëewë gémú, bee liiluu wa waaraa yuliɗ yii leŋke húlí Yéesú sun fi kurwaha man wonaɗ dof nen ɗa. 22 Yëwúɗɗë fahuu biti teeɓun kimtaan, Gerekka fahuu ham-ham. 23 Yen nék, yen waariyuu biti Kiristaa daaƴute sun fi kurwaha : baa daa yee kabin yëwúɗɗë rë, heetti kayya habuute ri wonaɗ dof. 24 Ɓëewë Koope dëek wë rë nék, ƴahun yëwúɗ mbée yëwúɗ neh ɓéeɓ, Kiristaa daa doolii Koope waa na, daa ri ham-hami Koope. 25 Yee na paŋ Koope ɓëewë olaꞌ ri pagaɗ dof ra, luk ham-ham ow ; te yee na paŋ Koope ɓëewë olaꞌ ri biti lahay doole ra, luk ow doole.
26 Koy-yaayyi ƴeh, nérsíi ɗee húmú madu ɗon na dëek ɗon Koope ra : filiɓ fon, caakay ɓëewí ɓëewë húmú habuu wa ɓëewí ñaañute, caakay ɓëewí húmú lahute doole, caakay ɓëewí húmú nonu tal ow gaan. 27 Añcaŋ, Koope daa tanis yii na habuu ɓëewë dof, sëpírí ɓëewë ñaañu ra ; ɗi tanisse yii na habuu ɓëewë biti lahay doole, sëpírí ɓëewë lahu doole ra ; 28 ɗi tanisse yin ƴutuuɗ, yii ow faaliyaay ri, yii lahay maanaa ɓëewë në nda ri yah yee na habaꞌ ow biti lahte maanaa ra. 29 Ɗaaha, lahay ɓëyí mín damoh fíi Koope. 30 Koope daa tah ɗon fi ƴaa ɗon non Yéesú-Kiristaa na, te ri paŋke níi Kiristaa hente ham-hami yen : ɗi fi Kiristaa daa tah yen júɓ fíi Koope, daa ri tah yen lan íllí Koope, daa ri tos yen. 31 Koope daa henaꞌ ri ɗaaha nda di bíníyúu rí Téerëe nen lahaꞌ ɗaaha. Bíníyú Téerëe bitih : « Ɓëyí fí ay damee, damaa Yíkëe. »✡1.31 Saame Yérémí 9.23