1 Soꞌ mi lahaay af soꞌ lahoo a⁠ ⁠? Mi apootar neh a⁠ ⁠? Mi olay Yéesú Yíkíi yen olo a⁠ ⁠? Ɗon daa yee lím iña légéyíɗ mi Yíkëe rë neh a⁠ ⁠? 2 Wuti lahte ɓëewí habuuy soꞌ apootar raa sah, wëerté sëꞌ biti mi apootar ɗon na, ndah nona nonu ɗon Yíkëe në rë teeɓaꞌte biti mi apootar kaah.

3 Soꞌ mi hom lofaꞌ ɓëewë në wonu yin sun fi soꞌ ra ɗeh⁠ ⁠: 4 Légéyë në légéyú fun ɗa, fun yeeliyuuy biti fun ñam na fun han na a⁠ ⁠? 5 Fun yeeliyuuy biti koon fun lah ɓelii non filiɓ ngémë, fun kúrëelëh rí dee ti di paguu ri apootarri kayya nen, mbée koy-yaayyi Yíkëe mbée Peer*9.5 Peer ⁠ ⁠: Di gerek, bíníyú ɗeh⁠ ⁠: Sefaas. Daa ri tii yíníi Peer. nen a⁠ ⁠? 6 Funi Barnabaas kep daa warun ñëmrún affi fun a⁠ ⁠? 7 Ɗon kéllúté biti soldaar daa na lomiɗ afi iña na légéyëꞌ rí rë ë⁠ ⁠? Ɗon kéllúté biti ow na ñameh na gañcaha soh ri meeyi ra a⁠ ⁠? Ɗon kéllúté biti níirëh na haneh na miis ma yuba na tooppitoh ri ra a⁠ ⁠?

8 Iña won mi ron ƴaa ra, mi ɓeyay wa iñi pesi ëldúnë kep, wa wonute filiɓ kootii Mëyíis ɓal. 9 Bíníyúté kootii Mëyíis bitih⁠ ⁠: «⁠ ⁠Mbaam†9.9 Mbaam ⁠ ⁠: Loꞌ daa bíníyú filiɓ Téerëe ndah ɓëewí ƴaaha húmú línúu a fana.fi hom légéy meey ngana pok ɓúgë fu kaddaꞌ ri ñam na gaañcaha.⁠ ⁠»✡9.9 Saame Nérsí Kootaa 25.4 Nuf Koo na pay mbaam na a⁠ ⁠? 10 Uni baa bíníyírúy fun fi ƴee a⁠ ⁠? Nagajek ɗon ot uni baa wonu, biti ɓëyí fí pay meey waɗtee naa séentëh woɗ, ɓëyí fí baac too waɗtee naa séentëh woɗ. 11 Fun sohute iñi Koope ɗon na. Kon fun lah na iña lahuu ron feey fi bee raa, ɗeef fun lukusirute a⁠ ⁠? 12 I ow kay yeeliyoh yii baa ɗon na raa, assumaa fun neh⁠ ⁠!

Fun yeeliyuute yii baa ɗon na, ndaa fun peguuy ron ri⁠ ⁠! Fun mújúté ɓéeɓ toñeh fun ay page yii ay kaddee ɓëewë keloh Uni NebiKiristaa. 13 Ɗon yúhrúté affon biti ɓëewë në légéyú filiɓ Faam fi gaani Koope ra liiluu njélí wë në, wa fa na jébëlú sarah ya sun fi tígë na hawruu ra pesuu di iña jébëlú rë. 14 Ti ɗaaha nen, Yíkëe nahaꞌte biti ɓëewë na waariyu Uni Neba ra pesuun na.

15 Soꞌ nék, mi meelaay yin yínë sah iña yeeliyoh soꞌ ra, te mi bíníyëy ron iñƴaa biti mi hom saam yin ɗon na. Soꞌ déꞌ, biti mi húlë húlë daa génël sëꞌ biti ow yahiɗ soꞌ sosi keeña homaꞌ mi di yee sehay mi dara yee na paŋ mi ra. 16 Waaraa na waare mi Uni Neba ra nék, soꞌ mi mínéh nëe damoh. Ɗi yii mi túuƴú rí túuƴë, waɗ soꞌ waro. Soꞌ kay, mi torohan biti mi waareyeh Uni Neba. 17 Daa mi tansara af soꞌ légéyí bee koon, ɗeef mi waɗtee yínlú⁠ ⁠; hém mí túuƴú rí túuƴë nék, mi paŋ yee déŋéenú mí rë. 18 Yínlí sëꞌ yi kon⁠ ⁠? Yínlí sëꞌ biti mi waare Uni Neba te mi seheh yin na, mi ɓanti ɓeɓ yee yeeliyoh ɓëyí na waare Uni Neba ra.

19 Daa mi lahaꞌ af soꞌ, soꞌ mi ñaam ow neh. Di filiɓ baaha ɓéeɓ nék mi tíkké af soꞌ ñaami ɓëewë ɓéeɓ, nda mi héc ow caak Kiristaa na. 20 Soꞌ mi hom a yëwúɗ rëe, mi pesaꞌ ti wa nen, nda mi mín wëe héc. Wuti kootii Mëyíis habay soꞌ raa, bee mi hompe a ɓëewë Kootaa ham wa ra, mi pesaꞌ ti wa nen, nda mi mín wëe héc. 21 Ti ɗaaha nen ɓal, mi hom a ɓëewí taaꞌuuy dara a Kootaa raa, mi hom madaꞌ a wa, nda mi mín wëe héc. Baa ɗi biti neh mi taaꞌaay dara a kootii Koope déꞌ⁠ ⁠! Soꞌ kay mi ñeyaꞌ kootii Kiristaa. 22 Mi hom a ɓëewë ngémí wë maanay raa, mi madaꞌ a wa nda mi mín wëe héc. Ɗaaha, ɓëyí mín ɗíi hen ɓéeɓ, mi hom a ɗi raa mi madaꞌ a ri, mi paŋ ɓéeɓ nda i ow waa na mín múc. 23 Ɗon ot mi na hen ɗaaha, mi fahaꞌ biti Uni Neba ɓaatti líiwëlsëꞌ ndín, mi bok a wa iñi wunna na onaꞌ ri ra.

24 Ɗon yúhúté biti i ow home saadantaꞌ raa, faraah lah bi daa na saan. Kon múkëyí múkë mí mín tah ɗon saan. 25 Bee múkëyëh hompe waaƴ saañ saadantaꞌ ra, ɗi hom koraꞌ afi koroo yii na paŋ ɗi ɓéeɓ. Yee na paŋ ɗi baa ra ɓéeɓ nék ɗi saam na baanii ndami ii maañ rek, yíppí yah⁠ ⁠; ndaa yen saamuu na baanii ndami ay hene has faraah. 26 Yii baa daa tah mi ƴahti múkë rëe, mi yullaꞌ fíi ciɗ. Soꞌ mi ƴahti bërëꞌ rëe, ma na yúh ɗee na haalaꞌ mi ɓëeꞌ rë. 27 Soꞌ mi hawsaꞌ faan soꞌ hawsoo mi koɗ ɗi yee fahaꞌ mi ra, toñeh mi liilehti waare ɓëewí kayya Uni Neba ndín mi bokleh, Koope ɓan soo yeɗ ndam.