Téeríi ana fa bíníyú unni kayya won Pool ɓëy Korente ra
Kúnsëe
Bee daa uni ana fa bíní Pool ɓëy ílí jaŋii Korente hom filiɓ Bíibëlë rë. Kolaꞌte unna ɗéɓ ɗí wëe bíní rë, lahte wonni ɗeefiɗte ri tahte níi hanndal ki ɓani wa neɓlilay. Balaa ɗi payaat na waali éeyë fë nék, ɗi bíníté unni ƴeh yugusaꞌi hanndal ki wani. Na bíní Pool unni ƴee ra, ɗeef Korente húmú gini caakke yin te yiiga tílté.
Jamanii baaha, ɗeef lahte ɓëewí húmú në, na waariyu ɓëy ílí jaŋaa iñi bokaay a ƴee na waare Pool ra. Wa ayuu biti wa i apootar gaan, te wa húmú mínú won.
Pool wonte ɓëy Korente biti ɗi lahte yii damaa ri koon, bi luk bi apootarri ƴah, ndaa ɗi damaay ri ndah ƴaa ɓéeɓ lahay solo. Yee lah solo ra daa ri biti wa fi ɓëy Korente ñee iña wonu filiɓ Uni Neba ra.
Ɗi wonte wa :
- yii leŋke heni ri apootari Yéesú-Kiristaa (1.1 ; 12.11-12),
- yii leŋke payi yérí wë (1.15-24 ; 13.1-4),
- yii leŋke ndami yii hasa pok Koope hanndal ki ɓani ɓëewë rë (3.7-18),
- yii leŋke yugusaꞌi Koope hanndal ki ɓani ɓëewë (5.11-21),
- yii leŋke ɗi fi Pool, coono fa deƴ ɗi ɓéeɓ ɗi múñcé wë rë (6.4-5),
- yii leŋke haakalsaꞌi hélsë nay kéyrúu habraꞌi koy-yaayyin Yerusalem ra (8.1-15),
- yii leŋke waaraa na waare ri te sehay yin na ra (11.7-12),
- a yii leŋke apootarri paɗɗah ya (11.4, 13-15).
Ɓëyí fí jaŋi téeríi bee ɓéeɓ ay ot biti ɓëyí fí ay damee ɓéeɓ, damaa Yíkëe.
1
Wodoha
1 Ɗon fi ɓëy ílí jaŋii Koope di Korente a ɓëewí Koope Akaay ɓéeɓ, soꞌ mi Pool, funi Timoote koy-yaafi yen daa na woduu ron. Soꞌ nék, mi falu apootari Yéesú-Kiristaa ndah Koope daa fahaꞌ baaha. 2 Baap-Koo a Yéesú-Kiristaa Yíkëe líhún rën mal, on ɗon jaamma !
Doolaa na tah ow múñ coono ra
3 Yen sím Koope, ɗi fi Boffi Yéesú-Kiristaa Yíkíi yen, Boffa naaꞌ-keeñ teem ɗii na ra, ɗi fi Koope fa yii lah ɓéeɓ ɗi onaꞌ doole ra. 4 Coono fi hom fun ɓéeɓ ɗi on fun doole, nda fun ñeyaꞌ yee pagiɗ ɗi fun ɗa, fun mín on ɓëyí fí hom coono doole, a di mín tí man coono fa ɓéeɓ. 5 Nagajek, di hëpëꞌ coono fa húmú deƴ Kiristaa ra sun fi fun, ɗi hëpëꞌ fun doolii mújúun fun ɗaaha ñéyíɗté rí Kiristaa na. 6 Ɗon ot fun hom coono, nda ɗon lah doole, ɗon múc ; ɗon ot fun onu doole, nda ɗon onu doolii mín tah ɗon múñ mani coono fa deƴu fun ɗa. 7 Fun lahute yaakaari wëerté ɗon na, ndah fun yúhúté biti ɗon bokute a fun coono, ɗon bokute a fun ɗon onute doole.
8 Koy-yaayyi ƴeh, fun fahuu biti ɗon yúh coono fa deƴu fun Aasi ra : húmú misikke misigi fí yúhté biti lukke fun doole níi fun húmú habuu biti fun ii pes. 9 Tílté níi sah fun habuu biti fun ay húl. Yii baa lahaꞌte ɗah nda fun ɓanti tík yaakaari fun affi fun na, fun tíkún yaakaari fun Koope fa na këlíɗ ɓúudé rë. 10 Daa ri sëmlëꞌ fun húlí misigi bah, te ri ay dékée në. Fun tíkúté yaakaari fun ɗii na biti ɗi ay dékée në. 11 Te lah na bín fë rëe, ɗaŋŋi ron ay fun naa habraꞌ. Koope tah ɗaŋŋi ɓëewí caakka yuliɗ fun na raa, ow caak ay rii sím di mala nay rii fun one ra.
Híilëhí Pool waala húmú ham ɗi ra
12 Cëe mi won ɗon yee na damuu fun ɗa : fun yúhrúté affi fun biti fun tílúu a ɓëewë ɓéeɓ a nufi lante, níi lukaꞌ a ɗon te fun ɗapuy na dara. Pagadee ke fun baa kolaꞌ Koope na. Ɗi kolaay ham-hami feey fi beh, ɗi mali fun a Koope. 13-14 Filiɓ unna na bíníyú fun ɗon ɗa, wa homaꞌ iñi ɗon ole wa rek wa haale affon. Ɗon nék, mi yúhté biti ɗon yúhúté fun ɗee rek níi wocce, te mi yaakaarte biti ɗon ay yúh níi lan bitih : yiin nay nimile Yéesú Yíkíi yen ra, ɗon ay dëmdée fun ti di nay fun ɗon dëmdée nen.
15-16 Yii baa húmú wëerté sëꞌ daa tah mi húmú ham biti balaa mi saañ Maseduwaan koon, may ɗéɓée ñee ginon. Te mi kolaꞌ Maseduwaan koon may nimilee ginon, ɗon ay soo habraꞌ waali Yúdée fë húmú ham mi ra. Tígí daaha, may payaꞌ ginon waal ana koon, Koope ñeyaꞌ soo na ndín mi lahiɗ ɗon njiriñ waal ana. 17 Habaꞌ mi biti may rii henee ɗaa ra, mi níɓëy níɓë ëe yih ? Mbée bee mi caŋke paŋ yin ɗa, mi níɓëꞌ níɓëɗ ow kut níi tah mi wone íi a ëe-ëeꞌ waala yínë aa yih ? 18 Koope sah yúhté biti iña na wonu fun ɗon ɗa na heneh íi a ëe-ëeꞌ waala yínë. 19 Funi Silaas a Timoote, fun waariyute ron Yéesú-KiristaaKoy Koope, te ri húmú henay íi a ëe-ëeꞌ waala yínë. « Íi » kut daa ɗii na. 20 Nagajek, Yéesú daa « íi » fí Koope. Maanam daa ri paŋ iña gapaꞌ Koope ra ɓéeɓ. Yii baa daa tah yen ɓal, yen ñeeꞌuu Yéesú në yen wone Koope « ɗémíin », yen kañee ri ɗaaha. 21 Ɗi fi Koope daa na on yen doole ɗon a fun, nda ngémí yen híin Kiristaa na. Daa ri fal yen, 22 ɗi tíinndëꞌté yen ɓekke Ruuh-Peseŋ keeññi yen, te Ruuhi baa daa yee habu yen naꞌ-naꞌ ra níi iñi wunna yefiɗ ɗi yen ɗa ac.
23 Koope mín sëe seede ! Mi fel rek ɗi hawa soꞌ húl ! Yee tah mi nimilay ginon ɗa, mi kaaꞌ biti mi ac ayi ay ron kome keeñi neɓay. 24 Fun saamuy biti fun ac fun cagoh ron níi lukus di yii leŋke ngémën, ndah ɗon habute na híin. Fun saamu biti kay, yen bok légéy, keeññon sos.