13
Yee míllëꞌ won Pool ɓëy Korente ra
1 Baa daa ac waali éeyë fë nay mii aye ginon ɗa. Di bíníyúu rí Téerëe bitih : « Balaa yin lecu ɓéeɓ, lahan seede ana mbée éeyë. »✡13.1 Saame Nérsí Kootaa 19.15 2 Yee húmú won mi ɓëewë húmú bakaaru merees ra a ɓëewí kayya ɓéeɓ ayaꞌ mi ginon waali ana fa ra, may naa ñeyaat wuti mi íníh leeloon raa : waali yínée nay mii aye yérën rë, mii yérém ow. 3 Ɗon fahuu yii nay teeɓee biti Kiristaa ñeyaꞌ soo na won saa ? Ɗon ay rii ot ! Kiristaa mínéh yin ɗon na mínë neh déꞌ ! Ɗi kay hom teeɓaꞌ doolii teeɓoo ɗon na. 4 Na daaƴu ri kurwaha ra ɗi húmú lahay doole naam, ndaa doolii Koope tahte ɗi ee pes ɗa. Nona nonu fun ɗii na ra tahte fun ɓal fun lahuy doole, ndaa doolii Koope tahte fun ay pes a ɗi, te fun ac ginon ɗaa ɗon yúh baaha.
5 Kénsíi affon ɗon olsoh nda ngém ee ɗon na raa. Ëlsíi affon ! Ɗon oluy biti Yéesú-Kiristaa ee ɗon na a ? Mbée ɗon olsoh affon raa, ɗon ay ole biti ɗon keenute ngémën aa yih ? 6 Soꞌ mi yaakaarte biti ɗon ay ot biti fun keenuy bi fun. 7 Fun ee ron ɗagiru Koope ra nda ɗon ɓanti paŋ yin ɓos. Fun húmú saamuy na teeɓaꞌi biti fun pagute yee nah fun Koope ra déꞌ ! Ëe-ëeꞌ kay ! Wuti ɓëewë habuun biti fun keenute na raa sah, yee fahuu fun ɗa biti kep ɗon pagun yin wun, 8 ndah di yii leŋke kaaf ki Koope, fun míníh dara na. Yee mínú fun ɗa daa ri biti fun légéy yii ay kúré kaaf ki baaha fíi. 9 Biti fun lahuy doole raa ɗon lahuu doole, keeññi fun sosaꞌ na sosoo dotooƴ. Yee na ɗagu fun ra biti ɗon hen ɓëewí mitute sëk. 10 Yee tah mi bíní ron unni ƴee bee wulaꞌ mi ron bee ra daa ri beh : mi fahaay biti mi lah ginon ɗaa mi híin sun fon. Yíkëe onte soꞌ sañ-sañ, ndaa ɗi sañ-sañi ay ron ɓaate ɓaato, bi ay ron saŋkuye saŋkuyo neh.
Takohi Pool ɓëy Korente
11 Kon yen takuun a unni ƴee kat koy-yaayyi ƴeh : hëmíi sos-keeñ ! Féhéyí níi ɗon hen ɓëewí mitute sëk, ɗon onantaꞌ doole, ɗon kéldëꞌ hanndal kon, ɗon pesaꞌ jaamma. Ɗon henaꞌ ri ɗaaha raa, Koope fa fahaꞌte ow níi fahaꞌ, na onaꞌ jaamma ra ay ñéerëꞌ a ron.
12 Lah wëdëntíi hanndal kon níi wodantaꞌ*13.12 Di ɓaahi ɓëewí ƴaaha, wa ƴahti wodoh ɓëewë mboko yi wa mbée ɓëewë meeru wa raa, wa fëenúu wë fëenëe..
Ɓëewí Koope ya dee ɓéeɓ na woduu ron.
13 Yéesú-Kiristaa Yíkëe líhë rën ɓéeɓ mal ! Koope dékëe fahaꞌon ɓéeɓ ! Ruuh-Peseŋ paga níi ɗon ɓéeɓ hen yínë !