Téeríi ana fa bíní Peer ra
Kúnsëe
Bee daa uni ana fa bíní Peer ra. Yee tah ɗi koloh na ra nék, haaꞌaꞌi ɓëewë na waariyu ɓëy ílí jaŋaa iñi bokaay a Uni Nebi kah-kah fa ra (2.1). Ɗi koloh na ɓal ɓeddaꞌi wa fi ɓëy ílí jaŋaa nda wa tíl kotti wunte, te wa pokoh yúhí Koope a Yéesú-Kiristaa yúh kah-kah (1.5-8), ti di waariyu wa ri ɓëewë tíkú Kiristaa íl ngëeƴ nen ɗa (1.16).
Ɗi wonte wa :
- yii leŋke tílëɗ ɓëyí gémpé (1.5-11),
- yii leŋke yonente yi paɗɗah ya (2.1-22),
- a yii leŋke nimili Yíkëe (3.1-18).
Ɓëyí fí jaŋi téeríi bee ɓéeɓ ay ot biti ɓëewë gémú rë waɗti saamun yúhí Yíkëe faraah, wa ɓanti síkírëh wonaɗɗa ee na níi múuƴɗé wë.
1
Wodoha
1 Koy-yaayyi ƴeh, ɗon fa gémú Yéesú-Kiristaa ra, ɗon fa yen teyu kep ngémë rë, soꞌ mi Simoŋ Peer, súrgë a apootari Yéesú-Kiristaa, daa mi na wodoh ɗon. Júɓë júɓ Yéesú fë daa Koope fi yen a Sëmlëhí yen ɗa daa tah ɗon gém. 2 Koope hëpë rën mal, on ɗon jaamma ndah yúhë yúhú ron ɗi fi Koope a Yéesú Yíkíi yen ra.
Tílëɗ ɓëyí gémpé
3 Koope ñeyaꞌ doolii onte yen yii waɗ yen ɓéeɓ, nda yen pesaꞌ pokoh ɗii na. Ɗi ñeyaꞌ yúhë yúhú ri yen ɗa pagiɗte yen yii baaha, ɗi fa ñeyaꞌ ndami a baahi dëekké yen ɗa. 4 Ɗaaha, ɗi yeɗte yen alal mi caaga gap ɗi yen ɗa, nda ɗon múc fah pes-neɓ, bee na yah ëldúnë rë, ɗon tokoh ɗi fi Koope na, pesi ron madaꞌ a pesi. 5 Daa tah mi won ɗon tee : pëgí ɓéeɓ ɗon tíl tílëdí wunte, ɗeefiɗ ngémën ; ɗon saam yúh yee fahaꞌ Koo ra, ɗeefiɗ tílëdí wunon ; 6 ɗon ham affon, ɗeefiɗ yúhí ron yee fahaꞌ Koope ra ; ɗon múñ, ɗeefiɗ hama habu ron affon ra ; ɗon pokoh Koope na, ɗeefiɗ múñën ; 7 ɗon tíl koy-yaay kon, ɗeefiɗ pokohi ron Koope na ; ɗon fahaꞌ ow, ɗeefiɗ tílí koy-yaay kon. 8 Ɗon lah iñƴaa ɗon na te ɗon cagoh paŋi wa raa, wa ay ron sawooril te wa ay ron ɓaatti ɓek yúhí Yéesú-Kiristaa Yíkíi yen. 9 Ɓëyí fí lahay iñƴaa ɗii na nék, ɓani búumíɗ wuluuy, ndah oli wulay. Ɓëyí baa halte biti ɗi hosɗute bakaaɗɗee ke ri merees.
10 Koy-yaayyi ƴeh, yii baa daa tah mi won ɗon biti ɗon gëergëerlëh níi lan biti Koope dëekké rën te tanisse ron. Ɗon henaꞌ ri ɗaaha raa, ɗon ii keen pagaɗ ɓos. 11 Ɗaaha, ɗon ay lukuu tahru haal Nguur ki Yíkíi yen a Sëmlëhí yen Yéesú-Kiristaa na, nguur kee ri na ɗúméh rë.
Yëeddëꞌí tíkëh kaah
12 Ɗon yúhúté iñƴaa te ɗon habute kaaf ka liilu ɗon ɗa sah naam, ndaa may dékée nérsí ron wa faraah. 13 Hém mí líssí pes feey fi bee rek, jekke biti mi dékëe nérsí ron iñƴah, ɗon hele nuf na. 14 Bi yúh mí biti mee kotti kúl kë ti di teeɓaꞌ soꞌ ri Yéesú-Kiristaa Yíkíi yen nen, 15 may paŋ ɓéeɓ níi wuti mi húl rëe sah, faraah ɗon nérsée iñƴah.
16 Yee wonuu fun ɗon biti Yéesú-Kiristaa Yíkíi yen ac ayo a doole ra, fun sakuy ri sako. Fun daa tíkú íllí fun ngëeƴ gaanaa ki. 17 Koo Boffa daa ɓéyíɗ ɗí onte ri ndam ; te ɗi fi Koope, ɗi fi yíkíi Ndami gaana, ɓéyíɗté uni níi Yéesú kelohte ri na won ɗi tih : « Bee daa Koy soꞌ. Mi fahaꞌte ri níi fahaꞌ, keeñ soꞌ sosse ɗii na níi sos. »✡1.17 Saame Maccëe 17.5 ; Marka 9.7 ; Lúkkë 9.34-35 18 Fun fi ƴee ɓal fun keluute unee ke Koope kolaꞌ sun-Koo baa ra, bee homuu fun a Yéesú sun fi daŋi selaa ra.
19 Yii baa daa tah fun ɓaatti gém iña wonu yonente ya ra*1.19 Yii baa daa tah fun ɓaatti gém iña wonu yonente ya ra : Lahte ɓëewí habuu ri ɗeh : ɓaatte biti fun keluute iña wonu yonente ya ra, te wa kaah.. Lah tíkí nuffon na : wa man lampii na hawaan filiɓ ñúusë níi bín yíilëe Koo ra nen. Tíkí nuffon na níi hula na niiñ hagaɗ ɗa ac niiñil keeññon. 20 Ɗéɓíi yúh biti ow a afi kut mínéh poysiiɗ afi iña wonu yonente ya Téerëe rë†1.20 Ɗéɓíi yúh biti ow a afi kut mínéh poysiiɗ afi iña wonu yonente ya Téerëe rë : Lahte ɓëewí habuu ri ɗeh : Ɗéɓíi yúh biti iña wonu yonente ya Téerëe rë, wa níɓ ow neh., 21 ndah iña wonu yonente ya ra ɗúhëey waa na, Koope daa na cépíɗ Ruuh-Peseŋ sun fi wa, wa anee won.
✡1:17 1.17 Saame Maccëe 17.5 ; Marka 9.7 ; Lúkkë 9.34-35
*1:19 1.19 Yii baa daa tah fun ɓaatti gém iña wonu yonente ya ra : Lahte ɓëewí habuu ri ɗeh : ɓaatte biti fun keluute iña wonu yonente ya ra, te wa kaah.
†1:20 1.20 Ɗéɓíi yúh biti ow a afi kut mínéh poysiiɗ afi iña wonu yonente ya Téerëe rë : Lahte ɓëewí habuu ri ɗeh : Ɗéɓíi yúh biti iña wonu yonente ya Téerëe rë, wa níɓ ow neh.