Téerëe bíníyú tílëdí apootarra ra
Kúnsëe
Téeríi bee bíníyú tílëdí apootarra. Daa ri téeríi ana fa bíní Lúkkë rë. Bee ɗéɓ ɗíi bíní rë won sun fi pesi Yéesú feey. Bee bíní rí bee ra nék, won sun fi filoon fi bee lawaꞌ Yéesú sun-Koo ra, kaaꞌeeh ɗi líssí pes filiɓ taalibe yi, na ɓeddaꞌ wa a Ruuhi. Ɓëewí húmú gémú ɗii na suute haalute i gin caak na waariyu. Jamanii baaha buuri gaani Rom daa húmú ílíf i gin caak.
Téeríi bee won sun fi :
- yii leŋke saañi Yéesú sun-Koo (1.6-11),
- yii leŋke cébí Ruuh-Peseŋ a jamanaa dalaꞌ jaŋaa filiɓ yëwúɗɗë di Yerusalem ra (2.1-47),
- yii leŋke tolof toloffa lah jaŋaa anaꞌ rii dal ra (8.1-3),
- yii leŋke haali ngémë filiɓ fi ɓëewë yëwúɗ neh ra ti ɓëy faam Korney (10.1-48) ; ɓëy Añcos (11.19-26), ɓëy Fílíp (16.11-40), ɓëy Korente (18.1-11) a ginni kayya nen (17.1-4, 10-12),
- yii leŋke hami Pool téƴúté Yerusalem (21.27-36 ; 22.24), kúrúté Sesare (23.23-35),
- a yii leŋke kúrí Rom, na sehaaloh buuri gaana aattiyaꞌ ri (27.1 níi 28.31).
Ɓëyí fí jaŋi téeríi bee ɓéeɓ ay yúh ɗee lahaꞌ waarii Uni Nebi Yéesú-Kiristaa njiriñ níi tígí hom ow ëldúnë ɓéeɓ keloh ri ra.
1
Sehi Ruuh-Peseŋ
1 Ɓah Tewofil, iña bíní mí téerée ké sëꞌ ɗéɓ ɗë won sun fi iña paŋ Yéesú a iña yëeddëꞌ rí rë ɓéeɓ dalaꞌte dalaana níi 2 yiin ɓéyrú rí saañce sun ɗa. Balaa ri saañ sun, ɗi ñeyaꞌte doolii Ruuh-Peseŋ nahte ɓëewë ɗi húmú tanis wa henute apootarri ra yee nay waa page ra. 3 Filoon fi húlí, ɗi feeñiyohte wa fi ƴah, ñeyaꞌte wa pagaɗ caak teeɓpe wa biti ɗi ee pes ɗa kaah. Hente bis sabay iniil (40), hom níi rëe ɗi feeñiyoh wa wa ot ɗi, ɗi wone wa yii leŋke Nguur ki Koope. 4 Bisa ín, ɗi hompe na ñam a wa, ɗi won wa tih : « Ngënë wúlíi Yerusalem, séhí yee gap ɗon Baasoꞌ ra, daa ri yee húmú wonaꞌ mi ron bitih : 5 Saŋbëtsëꞌ a muluɓ, ndaa ɗon, tasse ƴutuuɗ ɗon ay bëtsúu a Ruuh-Peseŋ. »
Nimili Yéesú sun-Koo
6 Filoon fi baaha, wa fi apootarra homu a Yéesú rë meelute ri wonu tih : « Wahtaa nay fuu cëgírëeté nguur ki Israyel ra lahte aa Yíkëe ? » 7 Ɗi won wa tih : « Waal fon íníh jamanu a wahtu yi Baasoꞌ, daa ri lah sañ-sañ sun fi yii nay rii page ra kut. 8 Yúhí biti Ruuh-Peseŋ ay cép sun fon, on ɗon doole, ɗon hen seede yi soꞌ Yerusalem, Yúdée a Samari ɓéeɓ, a tígí teem feey fa ɓéeɓ. »
9 Kolaꞌ Yéesú unni ƴah, ɗi kolohte feey íllí wë na saañ sun-Koo. Lahte nérí yíppée ac ɗappe rí íllí wë. 10 Ɗi na saañ, wa homute daa na yeelu sun-Koo, ow ana yi ɓekuu búuɓ naaꞌ yípútée caŋ fíi wë, 11 wonu wa tih : « Ɓëy Galile yi ƴeh, ɗon homu yi dee ɗon na ƴíirú sun-Koo ? Yéesú fë koloh fíiyën ɓéyrúté sun-Koo ra, di oluu ron ri ɗi na saañ, ɗi ay nimilee ɗaaha. »
Ɗee tansuu Macaas hente apootar ra
12 Apootarra koluute daŋa daaha, bee na wonuu daŋi Ëlíiffë rë, suute Yerusalem. Daŋa wulaay a gina níi, hanndal ka waɗti hena kilomet yínë. 13 Lahuu wa Yerusalem ra, wa lawute sun faam, haalute lasa na hoñuu waa teeꞌaꞌ ra. Wa húmú Peer, Saŋ, Saak, Anndere, Fílíp, Toomaa, Bartalemi, Maccëe, Saak fi Alfe, Simoŋ fi jammbaara a Yudaas fi Saak. 14 Wani Maryaama yaafi Yéesú a i ɓeleɓ kay, a koy-yaayyi Yéesú ƴaal teeꞌuu daaha, faraah wa ɗage.
15 Lahte bis waalli ƴaaha, Peer kolohte caŋke leelii koy-yaayya filiɓ ngémë, ɗeef wa warutee mit ow tíméer a ow sabay ana (120), won wa tih : 16 « Koy-yaayyi ƴeh, Ruuh-Peseŋ húmú wonte yin yii leŋke Yudaas fa kúɗ ɓëewë habu Yéesú rë. Ɗi húmú ñeyaꞌ Dawit na, wonte ri Téerëe ; te yii baa waɗti laha laho te lahaꞌ ɗaaha. 17 Yudaas húmú non fun na, te ri húmú yerute légéyí ti di yeruu ow fi ow fun na bii nen. »
18 (Hélsë yínlúu rí yii ɓosa paŋ ɗi ra, lomuu feey. Ɗi keenaꞌ feey fi baaha. Na keen ɗi ra, ɗi keenaꞌ líhëh lowa lasse, liilla ɓéeɓ bútëhté. 19 Yaa hente lëyëŋ filiɓ Yerusalem ɓéeɓ. Kolaꞌte baaha, ɓëy Yerusalem wonuu tígí daaha Hakeldama, daa ri : Feey fi ñif ma.)
20 Peer tíkké won tih : « Di yii leŋke ɗi fi baaha, nagajek bíníyúté filiɓ téeríi Kañaa ya bitih : “Faam fa hena holoŋ, ow ɓan naa dék.”✡1.20 Saame Kañaa ya 69.26 Bíníyúté biti ɓal : “Ow kay taha légéyí.”✡1.20 Saame Kañaa ya 109.8 21 Lahte ɓëewí ewu yen na deh, funi wa daa mësúu ñéerëꞌ a Yéesú-Yíkëe, 22 dalaꞌte bín oluu yen Saŋ Batis na bëtís rí rë níi a bee këllúu rí leelii yen ra. Kon di mín ɗíi man ɓéeɓ, waɗtee lah ɓëyí haal fun na di wa fi ƴaaha, seedeyiɗ Yéesú biti ri kolohte ɓúudé. »
23 Tígí daaha, tii ow ana capute : ɓëyí yínëe Suseef fa na dëekúu Barsabaas mbée Yústús rë, yínëe Macaas. 24 Taalibe ya ɓéeɓ yefuute ɗaŋi Koope wonu tih : « Yíkëe, ɗo fa yúh yii hom keeñ ow ɓéeɓ rë, teeɓ fun ɓëeꞌ tanis fu di wa fi ana yi ƴeh, 25 hen apootar tah tígí Yudaas fa hegoh légéyí saañce tígë waɗ ɗii na ra. » 26 Filoon fi baaha, wa púlúfúté wa fi ana ya, púlúfë keente sun fi Macaas. Ɗi yeeltee ɓaatoh apootarri sabboo a yínë yë në.