4
1 Mi won ɗon tee : kúkëyí lahaꞌ lam, ɓani ñaam yínë. Wuti daa ri lahaa lama ɓéeɓ rëe, 2 ɗi ay ñee woni ɓëewë kúrú rí rë a ƴee alal mi tíkúté yaꞌ yi wa ra níi wahtaa ham boffa biti ɗi ay waa naa liile ra lah. 3 Yen nék yen húmú kúkëy ti ɗaa nen, yen húmú ñaammi doole ya ëldúnë. 4 Lahaꞌ wahtaa ra nék, Koope wolte Koohi, ñeyaꞌte ri ɓeleɓ na ɗi límúté, Kootaa hampe ri, 5 nda ri sëmlëꞌ ɓëewë Kootaa ham wa ra, yen ɓal yen mín hen koyyi Koope.
6 Yee teeɓaꞌ biti ɗon koyyi ra daa ri biti Koope wolte Ruuhi Koohi haalte keeññi yen, te Ruuha ɓéyíɗté uni sun won tih : « Baap*4.6 Bíníyú : Abbaa, Baap. Abbaa : Daa ri : Baap di wonadi yëwúɗɗë. ! » 7 Ɗon topuu hen ñaam baaha, ɗon tasu koyyi ! Hém ɗon koyyi leegi raa kay, Koope ay ron on yee yefiɗ ɗi ɓëyí hente koy ɗii na ra.
Yee tíitíɗ Pool ɓëy Galasi na ra
8 Ɗéɓëenë, ɗon húmú yíih Koope, ɗon húmú i ñaammi iñi yéŋké biti Koope neh. 9 Bee yúhúu ron Koope bee ra nék, mbée bee yúhëꞌ ron Koope bee ra book, ɗon mínúu nimil doole ya ëldúnë fí bee lahuy doole, lahuy njiriñ ra ɗíh ? Ɗon fahuu nimil ɗon hen ñaammi wa a ? 10 Ɗon ɓekute affon biti lahte bisi daa lukki lah solo, céyín fí lukki lah solo a kíilí lukki lah solo ! 11 Soꞌ mi tíitté ɗon na : moga mok mi ɗon na ra moos ay teye ɗaaha a ?
12 Koy-yaayyi ƴeh, mi ɗaŋ ɗon biti ɗon man a soꞌ, ti di feheyaꞌ mi níi mi mante a ɗon nen. Mi yúhté biti ɗon mësúy sëe paŋ yin misik. 13 Ɗon nérsúuté yee tah mi waare ron Uni Neba ɗéɓëenë rë ë ? Jérë húmú jér mí mi tasse ɗon na ra, daa tah mi waare ron Uni Neba ! 14 Faan soꞌ húmú neɓay ron ot níi, ndaa tahay ɗon kaaꞌ soꞌ, tahay ɗon sébítëh sëꞌ. Ɗon lukuu soo ham na sah kay ti malaakii Koope nen, mbée ti Yéesú-Kiristaa nen ! 15 Keeññon húmú sos soso bín fë níi ! Kon yi daa kat ɗon leegi ? Soꞌ mi mín ɗon seedeyiɗ biti ɗon mín lukut íllën ɗon yeɗ soꞌ wa bín fë koon, ɗon paŋ ɗi. 16 Tígë homuu yen bee ra kep, wona na won mi ron kaah ra tah mi hen kaaꞌohi ron a ?
17 Lahte ɓëewí fí yúhté biti ñéerëꞌí a ɗon kut daa affi wa ndaa nuffi wa laday. Wa fahuu biti ɗon takaꞌ a soꞌ, ɗon ñéerëꞌ a wa. 18 Ñéerëꞌ a ow wunte lool naam, ndaa ɗeefa ƴaha nufi wunte te dékë dékë. Bi yen nék ɓanay teem biti rek mi hom leeloon. 19 Tuŋki ƴeh, tígë homaꞌ mi bee ra kep, mi yéŋké misik ti ɓelii lowa daa ham nen. Te may yégé misigi baa níi lan soꞌ biti ɗon mannuute a Kiristaa nen. 20 Soꞌ déꞌ mi mín ɗí koon, mi hen leeloon sorooh mi lof di nay mii wonee a ron, ndah yee homuu ron ra kúnté af soꞌ.
Agaar a Saara
21 Síkíríi sëꞌ, ɗon fa fahuu Kootaa ham ron ra ! Ɗon keluuy yee won kootii bee ra a ? 22 Bíníyúté biti Abraham húmú lahaꞌ koy ana : koy ki yínëe bi ɓani ñaami hínú Agaar, yínëe bi ɓani ɓelee ke ri hínú Saara te ñaam neh ra.✡4.22 Saame Dalaana 16.1-16 ; 21.1-7 23 Bee lahaꞌ ri a ñaama ra límúu ti di na límúu koy ɓéeɓ nen, ndaa bee lahaꞌ ri a ɓelaa ñaam neh ra, Koope daa húmú gap ri ri. 24 Yee bíníyú baa ra, wa iñi ana yi mëllúu mëllëe : ɓeleɓɓi ana ya wa iñi ana yi poku poko. Yínëe daa ri bee pok Koope a Mëyíis sun fi daŋi Sinayii†4.24 Sinayii : Daa ri daŋa húmú lap Mëyíis na yeɗ ɗi Koope túuƴëꞌ yí sabboo ya ra. Ɗi na wonuu Horep ɓal. ra. Agaar nék mëllúu a ri. Tuŋka límúu yee poku baa ra ɓéeɓ i ñaam. 25 Maanam Agaar daa daŋee ke Sinayii baa di Arabi. Ɗi mëllúu ɓal a Yerusalem fee woteh ñaam ra, a koy ki Yerusalem ɓéeɓ. 26 Ndaa Yerusalem fa sun-Koo ñaam neh ra, daa yaafi yen. 27 Nagajek, bíníyúté bitih :
« Keeñu sosa
ɗo fi ɓelaa húmú lahay koy ra !
Ɗéegísé
ɗo fa yéeh misiga hom lah koy ra,
ɗo fa ƴaalu hel ro ra,
fay luk ɓelaa ƴaala yef ri ra koy. »✡4.27 Saame Isayii 54.1
28 Ɗon nék koy-yaayyi ƴeh, ɗon nonu koyya límúu yee gapaꞌ Koope ra, ti Isaak nen. 29 Koy ka húmú límú filoon ti di na límúu koy ɓéeɓ nen ra, húmú moklaꞌ bee límúu Ruuhi Koope ra mokloo, te yii baa lahaꞌ ɗaaha woteh. 30 Yi daa bíníyú Téerëe nék ? Bíníyú yii beh : « Líké ñaami bee a koohi. Koy ka ii bok lam a koy ka lím ɓelaa ñaam neh ra. »✡4.30 Saame Dalaana 21.10 31 Koy-yaayyi ƴeh, kon yen koyyi ɓelii ñaama a ? Ëe-ëeꞌ ! Yen kay, yen ƴi ɓelaa ñaam neh ra.