Téeríi dalaana
Kúnsëe
Téeríi bee daa téerëe ɗéɓúu bíníyú Bíibëlë rë, te ri wonuu « Téeríi dalaana ». Yee tah ɗi na wonuu ɗaaha ra nék biti ɗi won sun fi dalaani ëldúnë a iña saku filiɓ ɗa ɓéeɓ (1.1-27).
Téerëe wonte sun fi ɗee kolaꞌ Koope paŋi yee húmú nufi ra te daa ri biti ɗi cëgíɗ goomali ɓëewí ɗi ay waa barkel. Ɗi ay ñeeꞌee séttí Abraham na, ɗi barkel wa (22.18). Yii baa daa tah, kolaꞌ ri sagi sun-Koo a feey fa ra, ɗi sak ow ƴaal a ow ɓeleɓ, nda wa keñ tali wa ɓaatoh, wa líifíɗ feey fa teeɓaꞌ ndami (1.28).
Wa fi ɓëewí ana ya ɗéɓúu saku ra nék ñeyuy yee won wa Koope ra, tahte keeñ Koope haayte wa níi líkké wë hëbísí. Filoon fi bee ɓaatuu ɓëewí ƴaa ra, Koope otte biti ɓëewë pesuu pagaɗ ɓos feey fa, wa na pagantuu iñi ɓosse, ɗi yeñce wa mulii mbënë më muuyilte wa ɓéeɓ níi tas Nowe a ɓëy faami (7.1-24). Bee gétëꞌ iñƴaa ɓéeɓ rë, i kíil caak filoon fe, ɓëewë ɓaatuutee caak feey fa. Bi ɗeef ɗi húmú maañcee tíɓ nufi nay ri waa sëmlée, ɗi wonte a Abraham, ɗi fi Abraham tíkëy në un, ñeete woni (12.1-9). Ɗi dalaꞌ cëgíɗ goomali ɓëewée ké rí ɗi tansiɗ wa afi ra ɗaaha keñilte wa, wa coosaanuute Abraham na : Abraham límpé Isaak, Isaak límpé Yakop, Yakop límpé koy sabboo a koy ana, daa wa ƴee fí yúhté biti talli sabboo a ana ya Israyel ɗúhúu waa na ra (49.3-28). Daa wa ɓëy Israyel, ƴee yípú faammi wa feey fa húmú gap Koope Abraham ra.
Ɓëyí fí jaŋi téeríi bee ɓéeɓ ay ot biti Koope na yeɗɗeh ɓëyí gémpé ɗii na ti Abraham nen. Ɗi ñeyaꞌ ɗi fi Abraham na barkelte ɓëewë feey fa ɓéeɓ.
1
Sagi ëldúnë
1 Dalaana, Koope sakke sun a feey.
2 Feey fa húmú holoŋ, gëeꞌ, gëfëŋ, dëlëeƴ a muluɓ : ow yéeh ɗee man ɗi ra ; ñúusë húunté ƴaaha ɓéeɓ ; ngilaaw mi Koope laɗte sun fi mulaa, na pay na ac. 3 Tígí daaha, Koope won tih : « Niiña hena ! » Niiña hente. 4 Koope otte biti niiña yii wunte, ɗi ɓísëlsëꞌté niiña a ñúusë. 5 Koope dëekëꞌté niiña « naꞌ », dëekëꞌté ñúusë « elek ». Fíníin lahte, ɓaaba acce*1.5 fíníin lahte, ɓaaba acce : Ébrë hom olaꞌ bis múlgús ɗaaha. : baa daa bisa ɗéɓ ɗë.
6 Koope wonil tih : « Hanndal gaan lahan ndín, ɓísëlsëꞌ mulaa ana. » 7 Koope sakke hanndal ka, ɓísëlsëꞌté mulaa paaꞌ feey a ƴee paaꞌ sun ra. Baa lahaꞌte ɗah. 8 Koope dëekëꞌté hanndal ka « sun-Koo ». Fíníin lahte, ɓaaba acce : baa daa bisi ana fa.
9 Koope wonil tih : « Mulaa paaꞌ feey ra négírëen ílíƴ yínë ndín, feey fa hen dandaŋ. » Ƴaa lahaꞌte ɗah. 10 Koope dëekëꞌté tígí dandaŋa « feey », dëekëꞌté mulaa négírëꞌ rë « kísí » ; te ɗi otte biti baa yii wunte.
11 Koope wonil tih : « Feey fa henan hilil : lah gaaw fi na ɗúhíɗ tisoh ki a heetti kilikki na lím, bina-bina ɓéeɓ a tisoh ki. » Ƴaa lahaꞌte ɗah. 12 Feey fa hente hilil. Heetti gaawa ya, bina-bina ɓéeɓ a tisoh ki ; heetti kilikka na lím rë, bina-bina ɓéeɓ a tisoh ki. Koope otte biti baa yii wunte. 13 Fíníin lahte, ɓaaba acce : baa daa bisi éeyë fë.
14 Koope wonil tih : « Sun lahan i yin niiñlaa ndín, ɓísëlsëꞌ naꞌa a elga ; na wa teeɓaꞌ bissi feetta, bissi kayya a kíillë ; 15 wa homun sun ndín, hawaane feey fa ! » Baa lahaꞌte ɗah. 16 Koope sakaꞌ iñi niiññi gaanni ana ya ɗah : bee lukki gaan ra, naꞌa, lahaꞌ bisa biti Koo yíil ; bee lukki ƴin ra, céyín fë, lahaꞌ elga. Ɗi ɓaatte sakke hulla ɓal. 17 Koope tíkké wë sun, niiñlii feey fa, 18 wa lahaꞌ naꞌa a elga, ɓísëlsëꞌ niiña a ñúusë. Koope otte biti baa yii wunte. 19 Fíníin lahte, ɓaaba acce : baa daa bisi iniil fa.
20 Koope wonil tih : « Mulaa líifën a iñi na pes níi woƴe, te ƴakka púdé hanndal ki sun a feey. » 21 Koope sakke heetti raɓɓi gaanna kísí fë, yii na woƴ filiɓ muluɓ ɓéeɓ, a ƴakka sun ɓéeɓ. Koope otte biti baa yii wunte. 22 Koope barkelte wa won tih : « Kéñí, ɗon ɓaatoh, ɗon líifíɗ mulaa kísí fë te ƴakka ɓaatoh feey fa. » 23 Fíníin lahte, ɓaaba acce : baa daa bisi iip fa.
24 Koope wonil tih : « Feey fa lahan heetti raɓɓa ɓéeɓ : ƴee faamma, ƴee luufa a raɓɓi ƴutuuɗɗa ɓéeɓ. » Ƴaa lahaꞌte ɗah. 25 Koope sakaꞌ heetti raɓɓa ɓéeɓ ɗaaha : ƴee luufa, ƴee faamma a raɓɓi ƴutuuɗɗa ɓéeɓ. Te Koope otte biti yii baa wunte.
26 Koope wonil tih : « Yen sak ow, ɗi man ti di madu yen nen ! Ɗi ílífën jénnë kísí fë, ƴakka sun, raɓɓa faamma a raɓɓi ƴutuuɗɗa a feey fa ɓéeɓ. »
27 Koope sakke ow ti di man ɗi fi Koope nen.
Di man ɗi fi Koope, ɗi sakaꞌ ow ɗaaha.
Ɗi sak ow ƴaal a ow ɓeleɓ.
28 Koope na an waa barkel, won wa tih : « Kéñí, ɗon ɓaatoh, ɗon líifíɗ feey fa ; ílífí jénnë kísí fë, ƴakka sun, a raɓɓa na tílú feey fa ra ɓéeɓ. » 29 Koope ɓaatte won tih : « Ëlí ! Gaaw fi na ɗúhíɗ tisoh ki feey fa ɓéeɓ, a kilki na lím koy ki na ɗúhíɗ tisoh ki ɓéeɓ, mi onte ron wa ɓéeɓ pesaa. 30 Te raɓɓa feey fa, ƴakka sun a yii na pes feey fa ɓéeɓ, mi onte wa gaaw fi hilila pesaa ɓal. » Baa lahaꞌte ɗaaha. 31 Koope otte biti iña paŋ ri ra ɓéeɓ wunte níi wun. Fíníin lahte, ɓaaba acce : baa daa bisi pëenë fë.