4
Naaɓii Kayeŋ a Abeel
1 Hompe níi, Aadama ñéerëꞌté a ɓeleɓi Aawa, ɓelaa pokke loo, lahte Kayeŋ. Aawa won tígí daaha tih : « Koo-Yahwee onte soꞌ níi mi lahte koy ƴaal*4.1 mi lahte koy ƴaal : Kayeŋ mëllúu a « kana » di ébrë ; « kana » daa ri : lah mbée lím.. » 2 Aawa lahilte koy ƴaal kay, Abeel, ñéedí Kayeŋ. Abeel hente níirëh, Kayeŋ hente línëh.
3 Lahte bis, Kayeŋ ɓeɓpe na iña lín rí rë, kompe wa Yahwee sarah. 4 Ɗi fi Abeel ɓeɓ na harra ɗéɓúu límú yubi ra, kompe Yahwee ƴee lukuu wun faan ra sarah. Yee paŋ Abeel ra neɓaꞌte Yahwee, 5 ndaa ri yeelay Kayeŋ a iña kúɗ ɗí sarah ra sah. Yii baa tahte Kayeŋ neeɓpe níi ɗoffe ɓúkí.
6 Yahwee won ɗi tih : « Fu neeɓ yih ? Fu ɗof ɓúk yi ɗeeha ? 7 Fu paŋ yin wun raa, fay ɓéyíɗ afu. Henay bah, bakaada aa lakohte ílí faamu ra aa ti gúmú nen, nufa aa ɗoo na, ndaa page níi fu ílíf rí. » 8 Hompe níi, Kayeŋ wonte Abeel i un†4.8 i un : Ɓëewë húmú ñeyaatu unni ƴee bín fë woraꞌi wa ɓëewë rë, lahte na ƴi húmú bíníyú : Yen saañ meey.. Homuu wa meeyyin ra, Kayeŋ yejohte Abeel ñéedí në, bëempé rí.
9 Filoon fi baaha, Yahwee won Kayeŋ tih : « Koy-yaafu Abeel di ɗeh ? » Ɗi tahte won tih : « Mi yúhëꞌ ? Daa mi níidí woo ? » 10 Koope tahte won ɗi tih : « Fu pagaꞌ yii baa ɗíh ? Foŋi ñif mi koy-yaafu kolaꞌ feey níi lahte soo na, na dëekëꞌ yíllíɗ. 11 Dalaꞌte woteh, fu alkohte, te fu líkúté feey fa keenaꞌ ñif mi koy-yaafee ke ro bëem fú rë. 12 Wuti fu lín rí níi lín rëe, fii naa ɗúhríl yin. Fu ac wëndëŋ, fu mbale feey fa. » 13 Kayeŋ won Yahwee tih : « Daana tík fú sëꞌ rë ɓítté sun fi soꞌ níi ɓít. 14 Ole ! Fu líkké sëꞌ feey fa looɓ ra níi may roo wuloh ndín, mi mbale feey fa níi ɓëyí funi teyaꞌ raa bëem sëꞌ. » 15 Ndaa Yahwee won ɗi tih : « Ngana néekíñëꞌ ! Ow bëem ɗë rëe, fay yíllírú waal paana. »
Kolaꞌte bah, Yahwee tíinndëꞌté Kayeŋ a yii fí yúhté biti ɓëyí ɓani teyaꞌ ɓéeɓ, nufa taseh hawi húl. 16 Kayeŋ kolohte dah, saañce hompe gini Not‡4.16 Not : Tii Not daa ri : mbal., paaꞌ Eden púlëen naꞌ ra, wulohte Yahwee.
Ɓëy tali Kayeŋ
17 Kayeŋ ñéerëꞌté a ɓeleɓi, ɓelaa pokke loo, lahte Henok. Kayeŋ antee yíp gin-taah, yeɗte gina tii koohi, Henok. 18 Henok daa boffi Irat, Irat límpé Mehuyayel, Mehuyayel límpé Metusayel, Metusayel límpé Lemek.
19 Lemek kooɗte ɓeleɓ ana : ɓelii gaana hínú Aada, ƴutuuda hínú Silla. 20 Aada límpé Yabal. Yabal daa ciffi ɓëewë dékú taanta§4.20 taanta : Ɗi dúdí poonuu hun bín fë. te kúrúu i yup ra. 21 Ñéedí ƴaal hínú Yubal ; daa ri ciffi ɓëewë na típú koraa, na fiisu kiis ra ɓéeɓ. 22 Ɗi fi Silla ɓal, límpé Tubal-Kayeŋ ; daa ri ɓëeꞌ në húmú tíɓ përëm a tiiŋ ra. Koy-yaafi Tubal-Kayeŋ ɓeleɓ hínú Naama.
23 Lemek won ɓeleɓɓi tih :
« Aada a Silla, síkíríi sëꞌ ;
ɗon fi ɓeleɓɓi soꞌ kélíi woni soꞌ mi Lemek :
af gaañoh tahte mi bëempé ow ƴaal,
mi bëempé kúkëy ƴaal af ŋaasoh.
24 Kayeŋ yíllírúu waal paana raa,
Lemek ay yíllírúu waal sabay paana a waal paana (77). »
Límí Set
25 Aadama ñéeríilté a ɓeleɓi, wa lahute koy ƴaal kay, ɓelaa yeɗte ri tii Set antee won tih : « Koope onte soꞌ koy ƴaal kay tígí Abeel fa Kayeŋ bëem ɗí rë. » 26 Ɗi fi Set lahte koy ƴaal ɓal, yeɗte ri tii Enos.
Kolaꞌ baaha, ɓëewë daluu jaamiyoh Koope na, na ñeeꞌuu ri tiyi, na dëekúu rí Yahwee.
*4:1 4.1 mi lahte koy ƴaal : Kayeŋ mëllúu a « kana » di ébrë ; « kana » daa ri : lah mbée lím.
†4:8 4.8 i un : Ɓëewë húmú ñeyaatu unni ƴee bín fë woraꞌi wa ɓëewë rë, lahte na ƴi húmú bíníyú : Yen saañ meey.
‡4:16 4.16 Not : Tii Not daa ri : mbal.
§4:20 4.20 taanta : Ɗi dúdí poonuu hun bín fë.