Téerëe bíníyú unna yuloh ébrë yë në rë
Kúnsëe
Unni ƴee daa unna bíníyú yuliɗ ébrë yë në rë. Wa fi ébrë yë nék, daa wa ɓëy tali Abraham. Daa wa na wonuu yëwúɗɗë ɓal. Tii ɓëeꞌ bíní unna ra wonuy, gina yuliɗ wa ra ɓal wonuy.
Unna nék, ɓëeꞌ bíní wë rë, waɗ waa bíníyë yëwúɗɗí nonu koy-yaayya filiɓ ngémë (1.1), ƴi fí yúhté biti húmú yeɗɗuute níi lahte na ƴi ngémí wë húmú tallaꞌ saata. Ɗi néríssé wë iña húmú yëeddú wë rë, habraꞌi wa nda wa lahaat doole wa ham ngémí wë híin (5.11 níi 6.12).
Ɗi wonte wa biti Kiristaa a Koope if a ɓëlgís, daa ri teeɓaꞌ ɗee man Koope kah-kah ra (1.3), te ɓëewë ay ñeeꞌee ɗii na nda wa múc. Daa ri tah ɓëewë gémú rë mín leɓoh Koope, te ri kut daa ri Seeƴohi gaana. Daa ri tah Koope pok yin has hanndal ki ɓani ɓëewë, bi gén bee húmú pok ɗi hanndal ki ɓani caacci wa ra (8.1-13).
Ɗi wonte wa biti ɓal, wa yíp íllí wë Kiristaa na, wa tík nuffi wa ɗee mújëꞌ rí kaaꞌa kaaꞌuu ri ɓëewë rë, wa ɓanti gooy, ɓanti yeɗɗoh (12.2-3).
Ɗi wonte wa :
- yii leŋke jébëlë jébël Kiristaa afi sarah waal yínë kut teempe waali yíníi baaha tosse bakaaɗɗi yen ɗa (9.12-28),
- yii leŋke hawiɗɗa na húmú hawru caacci wa filoon ɗa (10.1-4),
- yii leŋke caaccee ke wa húmú gémú rë (11.1-40),
- a yii leŋke njíittée ké wë húmú waariyu wa Un Koope ra (13.7).
Ɓëyí fí jaŋi téeríi bee ɓéeɓ ay ot biti hawiɗɗa na húmú hawru caacci yen te yen na pagu ri níi a woteh ra mínéh hos bakaaɗ, ndaa Kiristaa jébëlëꞌ afi waal yínë kut teempe waali yíníi baaha hosse bakaaɗɗi yen.
1
Ɗee wonaꞌ Koope yen na ra
1 Filoon, Koope húmú ñeyaꞌ yonente ya na, di pagaɗɗi bokaay wonte a caacci yen waal caak. 2 Ndaa woteh, di jamanaa míllëꞌ bee ra, ɗi ñeyaꞌ Koohi na wonte a yen. Ɗi ñeyaꞌ Koy ki baa na sakke ëldúnë, ɗi tanisse ɗi fi Koy ki baaha lahaꞌte iña ɓéeɓ. 3 Koy ki baa daa niiñi ndami Koope, te ɓani Koope if a ɓëlgís, daa ri teeɓaꞌ ɗee man Koope kah-kah ra. Daa ri ñeyaꞌ doolii uni, tahte iña ëldúnë ɓéeɓ hom woteh. Te filoon fi bee yeraꞌ ri ñíiní hosse bakaaɗɗa ra, ɗi ín tookke sunaa-sun, hëbís Koope fa gaan doole ra, hompe yaꞌi ñamaa fi. 4 Di paaꞌ ri malaaka ya ɓéeɓ sun, tiya lah ri fíi Koo ra, lukaꞌ bi wa ɗaaha fap.
Ɗee lukaꞌ Koy ka malaaka ya gaan ɗa
5 Ndah nagajek, Koope wënɗëy malaaka yínë sah unni ƴeh :
« Daa fu Koy soꞌ,
dalaꞌte woteh
mi Boffu. »✡1.5 Saame Kañaa ya 2.7
Ɗi wënɗëy malaaka biti ɓal :
« May hen baap ɗii na,
ɗi hen koy soo na. »✡1.5 Saame 2 Samiyel 7.14
6 Te wolaꞌ rí koy ki saawi ëldúnë rë, ɗi won tih :
« Malaaka yi Koope ɓéeɓ ƴekun fíyí, sígímíɗ ɗí. »✡1.6 Saame Nérsí Kootaa 32.43
7 Di yii leŋke malaaka yi ƴaa na Koope wonte bitih :
« Ɗi paŋke níi malaaka ya madu ngilaaw nen,
ɗi paŋke níi wa fi súrgë yí madu njaar-kíi nen. »✡1.7 Saame Kañaa ya 104.4
8 Ndaa di yii leŋ Koohi na, ɗi won tih :
« Nguur ku ɗo fi Koope
ay home na níi kiri fi kirih.
Fu kúɗté ɓëewú kúrí júɓpé,
9 fu fahaꞌ yii hente júɓ kep,
te fu wonay dara tooñ.
Yii baa daa tah soꞌ mi Koope fu
mi tanis ro,
mi on ɗo sos-keeñ,
mi túm rë díw heeñ af,
ndah fu génëꞌ sëꞌ ɓëewë ɗoni wa homu ra. »✡1.9 Saame Kañaa ya 45.7-8
10 Ɗi wonte ri ɓal tih :
« Dalaana, ɗo fi Yíkëe daa fu sak feey fa,
daa fu sak sun-Koo a yaꞌu.
11 Iñƴaa ɓéeɓ ay muuy,
ndaa ɗo fay home na faraah.
Wa ay yah
ti di na húlëꞌ búuɓ nen.
12 Fay waa túlëñsëꞌ
ti ɓëyí túlëñsëꞌ búuɓ nen,
wa lofu ti di na lofuu yéré nen,
ndaa ɗo fi na lofiseeh
te fay pese peso níi kiri fi kirih. »✡1.12 Saame Kañaa ya 102.26-28
13 Koope wënɗëy malaaka bitih :
« Tooke hëbís sëꞌ, yaꞌi ñamaa fi soꞌ dee
níi bín nëy míi yíssée kaaꞌoh yu hen tíkëe yí kottu ra. »✡1.13 Saame Kañaa ya 110.1
14 Wa fi malaaka ya, wa mbínéeffí lahuy boꞌ faan. Koope hom wolaꞌ wa habraꞌi ɓëewë nay múcé rë.