1 Yéesú ñeyaatte taalibe yi anil na léeh wë won tih : « ⁠ ⁠Ɓëyí caakke yin húmú laha⁠ˈ dagi daa na tooppitoh alal mi ; ɗi antee keloh biti daga yaha⁠ˈ alal mi yahoo. 2 Ɓëe⁠ˈ dëekké daga, won ɗi tih : “Yee keloh mi ɗoo na ra neɓaay so⁠ˈ⁠ ⁠! Teeɓ so⁠ˈ ɗee légéyë⁠ˈ fú rë ; woc raa fu yeris légéyë.” 3 Daga won nufi tih : “Bee nay mii líkúu légéy bee ra, may hene ɗíh ? Mi lahay doole línëe te mi sopohte saraatoh. 4 Mi otte yee nay mii page ra, hen ɗaaha mi líkú légéyí së⁠ˈ rëe, lah ɓëewí mín sëe yef faam wa.” 5 Tígí daaha, ɗi dëekké ɓëewë lahru kélfíi kabut ra ɓéeɓ yínë-yínë. Ɗi won bee ɗéɓ ɗë tih : “Fu lahiɗ kélfíi së⁠ˈ yih ?” 6 Ɓëe⁠ˈ won ɗi tih : “Mi lahiɗ ɗi bërgú dúuléen tíméer (100).” Daga won ɗi tih : “Kéedí kabut ku abeh ; yípée took fu bíní bërgú sabay iip (50).” 7 Ɗi antee dëek ow kay, won ɗi tih : “Fu lahiɗ kélfíi së⁠ˈ yih ?” Ɓëe⁠ˈ won ɗi tih : “Mi lahiɗ ɗi saaku pep tíméer (100).” Daga won ɗi tih : “Kéedí kabut ku abeh ; bíníyé saaku sabay peeye (80).” 8 Kélfëe laasse ɗee laha⁠ˈ daga júɓëy rë nuf. Kaah biti ɓëewë fahuu ëldúnë rë luku ɓëewë homu niiña ra lah nuf pagaa yin hanndal ki wa.⁠ ⁠»

9 Yéesú ɓaatte won tih : « ⁠ ⁠Mantee ron won tee : sëemí kooƴ a alal ma lahuu ron feey fi bee ra, nda tíl níi ɗon lahluy wa raa, Koope tah ɗon faami níi kiri fi kirih. 10 Ɓëyí júɓ di yin ƴutuuɗ, ay júɓ di yin gaan ɓal ; ɓëyí júɓëy di yin ƴutuuɗ, ii júɓ di yin gaan. 11 Kon hena biti ɗon júɓúy di na kúrúu ron alal ma feey fi bee raa, ɗon habuu biti ɗon ay déŋéenú alal ma lukki lah solo ra a ? 12 Te hena biti ɗon júɓúy di yii leŋke alal ow kay raa, ɗon yaakaaru biti ɗon ay liil alal ma waɗ ɗon lahuun faraah ra a ? 13 Lahay súrgíi mín légéyíɗ kélfë ana : ɗi ay kaa⁠ˈ ow yínë waa na, pokoh ɓëyí yínëe në ; ɗi ay ñee won ow yínë waa na, kaa⁠ˈ síkírëhí ɓëyí yínëe. Ti ɗaaha nen, ɗon míníh boolla⁠ˈ foŋko Koope a foŋko hélíis.⁠ ⁠»

14 Fariseŋŋa tíkú hélíis kep affi wa ra, keluu wa unnee ke Yéesú ƴaa ra, wa ɓéeɓ na këekkëlíyú rí. 15 Yéesú won wa tih : « ⁠ ⁠Ɗon fahuu biti ɓëewí kayya haba⁠ˈ ron ɓëewí júɓúté, ndaa Koope yúh yee keeññon. Yee na habuu ɓëewë biti daa lukki lah solo ra, ɗi yii ɓosse níi ɓos Koope na. 16 Balaa Saŋ Batis, Koope húmú ñeya⁠ˈ Kootaa a téeré yí yonente ya yëeddée. Aya⁠ˈ Saŋ níinén Uni Nebi Nguur ki Koope daa na waariyu te ɓëyí faha⁠ˈ naa haal ɓéeɓ fay naa cagoh. 17 Biti sun a feey muuy daa lukki yooɓ biti koy una lukki ƴin di Kootaa ra múuƴ. 18 Ƴaali yes ɓeleɓi, kooɗ ɓeleɓ kay, njaaliyohte. Te ɓëyí kooɗ ɓelii yesute, njaaliyohte ɓal.

19 « ⁠ ⁠Húmú laha⁠ˈ ɓëyí caakke alal, ɗi ɓeka⁠ˈ búuɓɓí wunte te kofeelte, faraah ɗi ñama⁠ˈ neɓ. 20 Bín fë, húmú lahte ñëkídí hínú Lasaar, faana ɓéeɓ líiffé puul, fënɗúté helute ílí faam ɓëe⁠ˈ. 21 Nufa tasse wooñnjiidi ñami ɓëe⁠ˈ, ndaa ri liileh na. Ɓaatte biti ɓuh ya na ayu ɗeewe puulla faana.

22 « ⁠ ⁠Hompe níi ñëkídë húlté, malaaka ya kúrúté rí hëbís Abraham. Yíkíi alal ma húlté ɓal, hacute, 23 saañce safara, na mok dín fë. Ɓéyrë⁠ˈ rí afi ra, ɗi séenté Abraham, Lasaar tookke hëbísí. 24 Ɗi won Abraham tígí daaha tih : “Caac Abraham yérém së⁠ˈ, fu wol Lasaar soop kuni muluɓ kom so⁠ˈ, mi hilsiɗ gol-gol so⁠ˈ, ndée mi mokke filiɓ kíi kí ƴee níi mok.” 25 Ndaa Abraham won ɗi tih : “Koy so⁠ˈ, nérsée biti fu liilte neɓu na húmú pesa⁠ˈ fu ra, te Lasaar húmú pesa⁠ˈ coono. Ɗi liilte nebi leegi, fu hompe coono. 26 Ɓaatte biti nuŋ gaan ee hanndal ki yen, tahte ow mínéh koloh fun na ac ɗon na, te ow mínéh koloh ɗon na ac fun na.” 27 Yíkíi alal ma won Abraham tih : “Kon mi na ɗaŋ ɗo Caac, fu wol Lasaar faam fun ; 28 mi lahte na ñéyíɗ iip, lah raa ɗi líkín wë, toñeh wa ay soo ɗeefre coono fi beh.” 29 Abraham won ɗi tih : “Wa lahute kootii Mëyíis a téeré yí yonente ya waa na níi wocce, wa ñeyun iña wonu na ra.” 30 Yíkíi alal ma won ɗi tih : “Ëe-ëe⁠ˈ caac Abraham, ƴaa doyay ; ndaa ow koloh ɓúudé pay waa na raa, tígí daaha wa ay lof pesaɗ.” 31 Abraham won ɗi tih : “Wa kaa⁠ˈ keloh woni Mëyíis a yonente ya raa, wuti ow koloh ɓúudé ɗeefiɗ wa raa, wa ii rii síkírëh.”⁠ ⁠»