22
Caŋi Yudaas yaayi Yéesú
(Saame Maccëe 26.1-5, 14-16 ; Marka 14.1-2, 10-11)
1 Feedi mbúurú njeñe ya na wonuu Paak ra ee saañ lahe ra. 2 Kélfë yí seeƴoh ya a yëeddëh yí kootii Mëyíis na saamu nufa nay waa hawee Yéesú húl rë, ndaa wa kaañuy ɓëy gina.
3 Tígí daaha, Seytaane haalte Yudaas fa na wonuu Iskariyot te non taalibe yi sabboo a ana ya ra. 4 Ɗaaha, Yudaas yíppée pay kélfë yí seeƴoh ya na a kélfë yí wohoh yi Faam fi gaani Koope, wa peenute ɗee nay ri waa yaayee Yéesú rë. 5 Keeññi wa sosse níi sos, wa gapute ri hélíis. 6 Yudaas tahte yee wonu wa ra, na anti saam wahtaa nay rii ɗamaalee Yéesú níi ri yaay wa ri, te ow yégéh rë.
Míllëení Yéesú reer a taalibe yi
(Saame Maccëe 26.17-30 ; Marka 14.12-26 ; Saŋ 13.21-30 ; 1 Korente 11.23-25)
7 Filiɓ feedi mbúurú njeñe ya, bisa na hawuu har fi Paaga ra lahte. 8 Yéesú wolte Peer a Saŋ won wa tih : « Tílí ɗon waaƴe reeri Paaga. » 9 Wa wonu ri tih : « Fu fahaˈ biti fun waaƴuun ɗi tígí dih ? » 10 Ɗi won wa tih : « Síkíríi ! Ɗon haale gina raa, ɗon ay teeˈaˈ a ow ƴaal kúɗ pen muluɓ. Lah ñéyí tala níi faam fa nay rii haale ra. 11 Ɗon lah na raa, wëní yíkíi faam fa tih : “Yëeddëhë daa nah fun meel ro lasa nay ñamee ɓani taalibe yi reeri Paaga ra.” 12 Hen ɗaaha raa, ɗi ay ron teeɓ lasi gaani paaˈ sun, bi yugusute níi wocce : yii nay yen sohlee ɓéeɓ ín në. Ɗon ay waaƴee reeri Paaga daaha. » 13 Peer a Saŋ suute, wa ɗeefute iña ɓéeɓ ti ɗee húmú wonaˈ wa Yéesú rë nen. Ɗaaha, wa waaƴute reeri Paaga.
14 Lahaˈ wahtaa ra, Yéesú a apootarri goorute na reeru. 15 Ɗi won wa tih : « A ɗee fahaˈ mi biti yen bok reeri Paagi bee ra, balaa wahtaa nay mii mokluu ra lah ! 16 Mee ron won ɗa ee bitih : mii ñamil reeri Paaga níi iti fi teeɓuu Nguur ki Koope. » 17 Ɗi ɓeɓpe kaas béeñ tígí daaha, símpé Koope won tih : « Ɓéyí béeñí ƴeh, ɗon woraˈ wa hanndal kon ; 18 te mee ron won ra ee : dalaˈte woteh, mii hanil béeñ níi bín nay ayee Nguur ki Koope ra. » 19 Filoon fi baaha, ɗi ɓeɓpe mbúurú, símpé Koope, lecsaˈte ri, yeɗte taalibe yi won wa tih : « Mbúuríi bee faan soˈ, af ron tah mi yeraˈ ri. Lah pëgí yii beh, nérsëhí sëˈ. » 20 Reeruu wa níi wocce ra, ɗi yeɗte wa kaasi béeñë ɓal, won tih : « Kaasi béeñí bee daa yii hasa pokalsaˈ Koope a ɓëewë ñeyaˈte ri ñif mi soˈ ra. Wa ay keen ndah ɗon. 21 Yúhí biti ɓëeˈ nay soo yaaye ra, funi daa boku loon ee. 22 Kaah biti soˈ mi Koy-ɓëeˈ mi waɗtee húl ti di fahaˈ ri Koope ra nen ; ndaa mas ɓëeˈ nay soo yaaye ra ! » 23 Tígí daaha, taalibe ya na meelantuu ɓëeˈ nay page yii baa filiɓ fi wa ra.
Ɓëeˈ lukki gaan ra
24 Filoon fi baaha, taalibe ya yefuute taasantaˈi misikke hanndal ki wa, fahuu yúh ɓëeˈ waɗti habuun biti daa ri lukki gaan waa na ra. 25 Yéesú won wa tih : « Buurri ginna daa na nootu ɓëewí kayya, kélfë yë saame tii sun fi ɓëewë. 26 Ndaa ɗon waruy henaˈ ɗaaha. Ɓëeˈ lukki gaan ɗon na ra kay, waɗti habaa afi ɓëeˈ lukki ƴin ɗa ; ɓëeˈ në túuƴëˈ rë waɗti habaa afi súrgíi ɓëewë ɓéeɓ. 27 Daa lukki gaan hanndal ki ɓëeˈ took na ñam ra a súrgëe tíkíɗ ɗí loona ra ? Ɗi bee na ñam ra neh a ? Añcaŋ, mi man súrgë ɗon na nen ! 28 Ɗon fi ƴeh, ɗon mësúy sëe hel na moklu soˈ ɓëewë rë. 29 Di yeraˈ soˈ Baasoˈ Nguur ka, mi yeraˈ ron ri ɗaaha ɓal : 30 yen ay bok ñam a han Nguur ki soˈ, te ɗon ay took ñaani Nguur ka, ɗon ílíf talli sabboo a ana yi Israyel. »
Woni Yéesú biti Peer ay taasaˈ yúhí
(Saame Maccëe 26.31-35 ; Marka 14.27-31 ; Saŋ 13.36-38)
31 Filoon fi baaha, Yéesú won Peer tih : « Simoŋ, síkírëh sëˈ ! Seytaane ɗaŋke nda ri mín rën hégíƴ ti di na níikëˈ ɓeleɓ nen. 32 Ndaa mi ɗagiɗte ro nda fu ɓan soo súugëh. Te fu nimil soo na raa, lah one koy-yaayyu yaˈ. » 33 Peer won ɗi tih : « Yíkëe, tígë nay fuu ɓekuu kasu ra, may naa ɓeku ; fu hawun húl, may naa hawu. » 34 Yéesú won ɗi tih : « Mee roo won ɗa ee Peer : fiisiin ki paan, fay taasaˈ biti fu yúh sëˈ níi hen waal éeyë. »
Woni Yéesú taalibe yi biti wa koloh affi wa
35 Yéesú antee waa won ɓéeɓ tih : « Wolaˈ mi ron, ɗon suute, ɗon kúrúy hélíis, ɗon kúrúy nafa a ñafaɗ ra, ɗon ñakute yin a ? » Wa wonu ri tih : « Fun ñakuy yin. » 36 Ɗi won wa tígí daaha tih : « Iña lofisohte ! Dalaˈte woteh, ɓëyí lah hélíis kúrë, ɓëyí lah nafa kúrë ; te ɓëyí lahay ganaay waɗtee yaay sabidoori lom yínë. 37 Yúhí biti Téerëe won sun fi soˈ tih : “Ɗi kídëelúuté ɓëewí ɓossa na.”✡22.37 Saame Isayii 53.12 Mee ron won ɗa ee biti yii baa waɗti laha laho, te ri lahte níi wocce. » 38 Taalibe ya wonu tih : « Yíkëe, jépíl ana aƴee ee ! » Yéesú won wa tih : « Wona ɗúmpé ! »
Ɗaŋi Yéesú sun fi daŋi Ëlíiffë
(Saame Maccëe 26.36-46 ; Marka 14.32-42)
39 Yéesú antee koloh saañce daŋi Ëlíiffë ti merees nen, taalibe yi ñeyute tali. 40 Lahuu wa dín fë rë, ɗi won wa tih : « Ɗëgí Koope toñeh ɗon ay keene fíirí Seytaane ! » 41 Ɗi helte wa daaha hécëhté ƴutuuɗ, ƴekke na ɗaŋ Koope 42 won tih : « Baap, hém neɓaˈ ro, éccíré gulii coono fi bee wuloh soˈ ! Ndaa di mín ɗíi man ɓéeɓ, yee nay lahe ra ɓanan hen yee fahaˈ mi ra, ndaa bee fahaˈ fu ra. » 43 [Tígí daaha, malaaka di malaaka yi Koope céppé hílíbí. 44 Keeña ɗúmpé ces, ɗi na ɓaatti ɗaŋ. Ɗi opaˈ opoo níi opaˈa man ñif nen, na síit feey.] 45 Wocaˈ ri ɗaŋa ra, ɗi kolohte, nimilte taalibe yi na. Ɗi ɗeef wa súfúñú súfúñë níi wa na neeˈu, 46 ɗi won wa tih : « Ɗon neeˈu yih ? Këlíi ɗon ɗaŋ toñeh ɗon ay keene fíirí Seytaane ! »
Hami Yéesú
(Saame Maccëe 26.47-56 ; Marka 14.43-50 ; Saŋ 18.3-11)
47 Yéesú hom wona, lahte dúukëlí ɓëewí ayute, ñéerúuté a Yudaas fa non taalibe yi sabboo a ana ya ra. Yudaas leɓohte Yéesú, na fahaˈ fëení. 48 Yéesú won ɗi tih : « Yudaas, fu ƴahti ac yaayi soˈ mi Koy-ɓëeˈ rëe, fay soo fëené fëenë ë ? » 49 Ɓëewë ñéerúu a Yéesú rë, oluu wa yee na saañ lahe ra, wonu ri tih : « Yíkëe, fun ɓeɓ jépíllí fun, fun yejoh wa haaˈ a ? » 50 Tígí daaha, ow yínë waa na paaŋke súrgíi seeƴohi gaana jépíl, lecce nufi ñamaa fa. 51 Yéesú won wa tih : « Yéɗɗí ! Topaa baaha ! » Ɗi leɓpe nuf ɓëeˈ, nufa wahte. 52 Ɗi na anti won a kélfë yí seeƴoh ya, kélfë yí wohoh yi Faam fi gaani Koope, a ɓaha ya gina ayu hami ra tih : « Ɗon ayuu yi ɗeeha a jépíl a i duuɗ hami soˈ man mi banndi nen ? 53 Mi húmú homaˈ ɗon na faraah filiɓ Faam fi gaani Koope, te ɗon kaañuy soo ham. Ndaa wahtoon daa lah, elga onuu Seytaane doole sun fi soˈ ra. »
Taasaˈi Peer yúhí Yéesú
(Saame Maccëe 26.57-58, 69-75 ; Marka 14.53-54, 66-72 ; Saŋ 18.12-18, 25-27)
54 Wa habute Yéesú, kúrúté rí faam seeƴohi gaana. Peer húmú filoonaa filoon, ñeete talli wa. 55 Lahte ɓëewí këɗɗúté kíi filiɓ faam fa, tookute na yoonnduu. Peer acce, tookke waa na. 56 Lahte ɓelii légéyëˈ faam fa otte Peer niiñi kíi kë, ƴíiɗté rí níi won tih : « Ɓëyí bee ɓal non ɓëewí. » 57 Ndaa Peer taasaˈte won tih : « Mi yéeh ɓëeˈ na wonaˈ fu ra yaa ow ! » 58 Tíkëh ƴutuuɗ, ow kay otte ri, won tih : « Ɗo ɓal fu non ɓëewí. » Peer won ɗi tih : « Mi noneh na déˈ ! » 59 Hente kiis, ow kay ayilte, digiɗte uni won tih : « Lahte íl ɓal ! Ɓëyí bee non ɓëewí ; ndah ɗi ɓëy Galile. » 60 Ndaa Peer won ɗi tih : « Mi yéeh yee na won fu ra ɗo ! » Ɗi hom wona, na mín ríi lúsíɗ ɗë paan fiisohte. 61 Yíkëe yíssëhté Peer na, yeelte ri. Tígí daaha, Peer nérsëhté yee húmú won ɗi Yíkëe rë biti fiisiin ki paan, ɗi ay taasaˈ biti ɗi yúh rí níi hen waal éeyë. 62 Ɗi antee ɗúh ëssín na looy looyi misikke.
Dalaani mogi Yéesú
(Saame Maccëe 26.67-68 ; Marka 14.65)
63-64 Ɓëewë në húmú wohu Yéesú rë pokute íllë, na laɓisuu ri, na ñaawlu ri, meelute ri wonu tih : « Fu yonente saa ɓal ? Wone ɓëeˈ laɓ ɗo ra ! » 65 Wa wonute ri i won ɓos kay caak.
Tëekrí Yéesú këemí yëwúɗɗë
(Saame Maccëe 26.59-66 ; Marka 14.55-64 ; Saŋ 18.19-24)
66 Yíilëˈ Koo ra, ɓaha yi yëwúɗɗë, kélfë yí seeƴoh ya a yëeddëh yí kootii Mëyíis teeˈuute, tëekrúté Yéesú këem, 67 meelute ri wonu tih : « Won fun nda daa fu Buura Koo fal ri ra raa. » Ɗi won wa tih : « Mi won ɗon biti daa mi, ɗon ii soo gém, 68 te mi meel ɗon, ɗon ii soo tiil. 69 Ndaa, kolaˈte woteh, soˈ mi Koy-ɓëeˈ, may took hëbís Koope fa mín ɓéeɓ rë, mi hom yaˈi ñamaa fi. » 70 Wa ɓéeɓ wonu tih : « Kon fu Koy Koope a ? » Ɗi won wa tih : « Ɗon wonute ri, daa mi ! » 71 Wa wonu tígí daaha tih : « Yen ay pagilee seede yih ? Ɗi ɗúhíɗté rí ɓúkí níi wocce ! »