Uni Neba bíní Maccëe rë
Kúnsëe
Di ɓaahi jaŋaa Maccëe daa bíní téeríi Uni Nebi beh, ndaa biti daa ri bíní rí wonuy filiɓ. Ɗi fi Maccëe nék, húmú yeekoh túm, ndaa Yéesú míllëꞌté ríi dëek ɗi hente taalibeyi (9.9) (Saame Marka 2.14). Ɗi non apootarra Yéesú wol wa waarii Uni Neba ra.
Iña bíníyú téeríi bee ra, daa tah ɓëewë habaꞌ biti Maccëe bíní wë koy-yaayyi, wa fi ɓëy Israyel, teeɓi wa biti Yéesú daa Buura Koo fal ri ra (2.4 ; 16.16), bee na húmú wonuu yonente ya filiɓ Téerëe bín fë rë. Te iña húmú wonu sun fi balaa ɗi ac feey fi bee ra ɓéeɓ míllëꞌtée lah kah-kah.
Yéesú mëllëꞌté Nguur ki sun-Koo a yin caak teeɓi ɓëy Israyel, ndaa kaaꞌeeh njíittí wë wonuy dara ɗii na, wa pagute ɓéeɓ níi wa hawute ri húl.
Filiɓ téeríi beh, Maccëe wonte :
- yii leŋke límí Yéesú (1.18 níi 2.12),
- yii leŋke kimtaanni caakka paŋ ɗi ra (4.24 ; 8.16),
- yii leŋke iña yëedíɗ ɗí ɓëewë rë (5.1 níi 7.29),
- yii leŋke húlí (27.31-54),
- a yii leŋke kolohi ɓúudé (28.1-10).
Ɓëyí fí jaŋi téeríi bee ɓéeɓ ay yúh biti Yéesú daa Buura Koo fal ri ra.
1
Coosaani Yéesú
(Saame Lúkkë 3.23-28)
1 Bee daa coosaani Yéesú-Kiristaa sédí buura hínú Dawit ra, sédí Abraham. 2 Abraham daa boffi Isaak, Isaak límpé Yakop, Yakop límpé Yudaa a koy-baappi. 3 Yudaa daa boffi Peres a Seraah, Tamaar daa yaafi wa ; Peres daa lím Hesron, Hesron límpé Ram. 4 Ram daa boffi Aminadap, Aminadap límpé Nahson, Nahson límpé Salma. 5 Salma daa boffi Búus fí Rahap, Búus daa boffi Obet fi Rút, Obet límpé Yéssée, 6 Yéssée límpé buura hínú Dawit ra.
Dawit daa lím Salomoo fi ɓeleɓ Úrí koon. 7 Salomoo daa boffi Robowam, Robowam límpé Abiyaa, Abiyaa límpé Asaa. 8 Asaa daa boffi Yosafat, Yosafat límpé Yoram, Yoram límpé Osiyas. 9 Osiyas daa boffi Yotam, Yotam límpé Ahaas, Ahaas límpé Esekiyas. 10 Esekiyas daa boffi Manase, Manase límpé Amon, Amon límpé Yosiyas. 11 Jamanaa habuu yëwúɗɗë kúrúté Babilon ra, Yosiyas límpé Yekoñas a koy-baappi.
12 Filoon fi kúrí wë Babilon, Yekoñas límpé Salasiyel, Salasiyel límpé Sorobabel. 13 Sorobabel daa boffi Abiyut, Abiyut límpé Eliyakim, Eliyakim límpé Asoor. 14 Asoor daa boffi Sadok, Sadok límpé Ahim, Ahim límpé Élíyút. 15 Élíyút daa boffi Eleyasaar, Eleyasaar límpé Matan, Matan límpé Yakop. 16 Yakop*1.16 Yakop : Bee na wonuu dee ra bokaay a Yakop fa wonu sun lím ɓëy tali Israyel ra. daa boffi Suseef, ƴaali Maryaama fa lím Yéesú fë na wonuu Kiristaa ra.
17 Hente jamanu sabboo a jamanu iniil dalaꞌte Abraham na níi Dawit na, jamanu sabboo a jamanu iniil Dawit na níi bee habuu yëwúɗɗë kúrúté Babilon ra, jamanu sabboo a jamanu iniil kúrí yëwúɗɗë Babilon níi límí Buura Koo fal ri ra.
Ɗee ayaꞌ Yéesú ëldúnë rë
18 Yéesú-Kiristaa ayaꞌ ëldúnë ɗeh : Maryaama yaafi Yéesú húmú onu Suseef ɓeleɓ ; na liiluu waa dék níi wa ñéerëꞌ rë nék, pagaɗɗi Ruuh-Peseŋ tahte Maryaama pokke loo. 19 Suseef fa na fahaꞌ koodi ra húmú ɓëyí júɓpé te ɗi fahaay yíiñí, daa tah ɗi caŋ kotti yeɗɗi koon di filiɓ sútúrë. 20 Ɗi hom níɓí yii baaha, malaaka di malaaka yi Koo-Yíkëe feeñiyohte ri filiɓ heeƴ, won ri tih : « Suseef sédí Dawit, ngana sídëꞌ ɓeyi Maryaama ɓeleɓ, pagaɗɗi Ruuh-Peseŋ daa tah ɗi pok loo. 21 Ɗi ay lahee koy ƴaal fu dëekëꞌ rí Yéesú†1.21 Tii Yéesú di ébrë daa Yosuwe. Yosuwe daa ri : Yahwee daa Sëmlëhë. : daa ri nay sëmlée ɓëewí di bakaaɗɗi wa. »
22 Iñƴaa ɓéeɓ daa yee húmú won Koo-Yíkëe ñeyaꞌte ri yonentaa, na won ri bitih : 23 « Ay lah kúkëyí cafaƴ ki yéeh ƴaal ay pok loo, ɗi ay lah koy ki ƴaali ay hínú Emanuwel. »✡1.23 Saame Isayii 7.14 Tii baa daa ri : Koope ee yen na.
24 Yúunëꞌ Suseef ra, ɗi paŋke yee nah ri malaakii Koo-Yíkëe rë, ɓeɓpe Maryaama ɓeleɓ. 25 Ndaa ri ñéerëey a ri níi bee lahaꞌ Maryaama koy ƴaal ra, Suseef yeɗte ri tii Yéesú.