7
Ow waray heef moroomi
(Saame Lúkkë 6.37-38, 41-42)
1 Yéesú ɓaatte wonil tih : « Ngënë héefí ow toñeh Koope ay ron heefe. 2 Ɗon ay heefuu ti ɗee na heefuu ron ow ra. Ɗee na natɗuu ron ɓëewë rë, Koope ay ron natɗee ɗaaha. 3 Fu olsoh yi losa íl koy-yaafu te fu kénsëey dúuñë ílú ? 4 Ɗo fa olay sah dúuñë ílú rë, fu mínëꞌ won koy-yaafu biti fay rii nísíɗ losa ílí ɗíh ? 5 Wonu teem ɓúkú ! Nísé dúuñë ílú níi íllú lan paaƴ, fanti mín nís losa íl koy-yaafu.
6 « Ngënë ëní ɓuh yii selate, toñeh ɗi ay wëlbítée sun fon ɗoɓisaꞌ ron. Ngënë bétí feme yon kot mbaam-túgël, toñeh ɗi ay waa togisee.
Ɓëyí ɗaŋ Koo, ɗi ay rii on yin wun
(Saame Lúkkë 11.9-13)
7 « Ɗëgí ɗon ay onu, sëemí ɗon ay ot, lëɓí ílë ɗon ay kúnsírú. 8 Ahaŋkay ! Ɓëyí ɗaŋ ay onu, ɓëyí saam ay ot, te ɓëyí laɓ íl ay kúnsírú. 9 Wa di ɗon na nay yere koohi laꞌ biti ri ɗaga ri ñam, 10 mbée koy ka ɗaga ri jén rëe ɗi yeɗ ri goŋ ? 11 Ɓosuu ron níi, ɗon mínú pagiɗ koyyon yin wun. Kon ɗon mínú yii baaha raa, ɗeef lukaꞌ Boffee ke ron sunaa-sun neh : ɓëyí ɗaŋ ri, ɗi ay rii on yin wun.
12 « Iña fahuu ron biti ɓëewë pagiɗ ron wa ra ɓéeɓ, lah pëgíríi wë ɓëewí kayya ɗaaha : yee yëeddëꞌ Kootaa a yonente ya ra ɓéeɓ daa ri bah.
Ílí ƴutuuda
(Saame Lúkkë 13.24)
13 « Lah hëelíi ílí ƴutuuda. Ílí gaana, waali haŋa hom yullaꞌ ow saŋku te ow caak ñeyuu na. 14 Ílí ƴutuuda a waali hada nék yullu pesa na ɗúméh rë, te ow caak oluy wa.
Yonente yi paɗɗah ya
(Saame Lúkkë 6.43-44)
15 « Lah mëytíi yonente yi paɗɗah ya ! Wa ayuu ɗon na sos ndaa wa madu gúmú nen ɓos nuf. 16 Ɗon ay waa yúhsée pagaɗɗi wa. Daa ëlíɗ ñoltok límpé koy sún, mbée tal hak lím koy ɓaꞌ ? 17-18 Ti ɗaaha nen, tal kilki lahte njiriñ na líméh koy ki lahay njiriñ : ɗi ay mínée lím bi lahte njiriñ kay ! Te tal kilki lahay njiriñ na líméh koy ki lahte njiriñ : ɗi ay mínée lím bi lahay njiriñ kay ! 19 Tal kilki na líméh koy ki lahte njiriñ ɓéeɓ ay lecu betu kíi. 20 Mi won ɗon tee ɓal : ɗon ay yúhsée yonente yi paɗɗah ya pagaɗɗi wa.
Taalibe yi kah-kah ya
(Saame Lúkkë 13.25-27)
21 « Ɗon dékée dëekëꞌí sëꞌ Yíkëe, ɓekeh ron Nguur ki sun-Koo. Ɓëyí fahaꞌ naa haal raa, fay page yee fahaꞌ Boffee ke soꞌ sunaa-sun ɗa. 22 Ɓëewë ƴahti aattiyuu fayu raa, i ow caak ay hom daa wone soꞌ tih : “Yíkëe, fun húmú ƴahti léhín unni kolaꞌ Koope na raa, fun këllírúu tiyu neh a ? Fun húmú ƴahti lík yébítëh rëe ɓal, fun këllírúu tiyu neh a ? Fun húmú këllírúu tiyu neh ɓal, biti fun ƴahti paŋ i kimtaan a ?” 23 Tígí daaha may waa wone tih : “Yen neh ! Mi mësëy rën yúh ! Wúlíi sëꞌ, ɗon fa na ñéyíh woni Koope ra !”
Ɓëyí hoffe
(Saame Lúkkë 6.47-49)
24 « Ɓëyí síkírëh unna won mi ƴaa ra te pagaa wa ɗaaha raa, ɓëyí baa madaꞌ a ɓëeꞌ hof baa yíp faami ngaŋa ra. 25 Koo lasse bacal, húlúɓɓë hútté níi mulaa basse, ñéerëꞌté a ngilaaw gaan, wa baɓuute faam fa, ndaa faam fa keenay af biti ri yípú ngaŋ. 26 Ndaa ɓëyí síkírëh unni soꞌ te pageeh wa ɗaaha raa, ɗi madaꞌ a ɓëeꞌ hofay baa yíp faami koloñ ra. 27 Lasaꞌ bacala ra, húlúɓɓë hútté níi mulaa basse, ñéerëꞌté a ngilaaw gaan wa baɓuute faam fa, faam fa bëppé yahsaꞌte ɓéeɓ. »
Sañ-sañi Yéesú
(Saame Marka 1.22 ; Lúkkë 4.32)
28 Wocaꞌ Yéesú wona ra, ɓëewë ɓéeɓ éemúté ɗee na waariyaꞌ ri ra, 29 ndah di na yëeddëꞌ rí maday a di na paguu ri yëeddëh yí wë na yëeddúu kootii Mëyíis rë, bi na yëeddëꞌ rí a sañ-sañ.