17
Teeɓaꞌi Yéesú ndami
(Saame Marka 9.2-13 ; Lúkkë 9.28-36)
1 Waal pëenë filoon fe, Yéesú dëekké Peer, Saak a Saŋ, hécëhté a wa, kúɗté wë sun fi daŋi utte. 2 Lahuu wa ra, Yéesú lofisohte fíi wë : kanama man naꞌ nen, búuɓɓí naaꞌ naaꞌo níi na tak. 3 Ɗee a ɗeh, wa olute Mëyíis a yonente Éelí feeñiyuute na gonlu a ri. 4 Peer tahte won Yéesú tih : « Yíkëe, neɓpe biti yen homun tígí deh. Fu tah raa, mi yíp dút éeyë : fu lah yínë, Mëyíis yínë, Éelí yínë. » 5 Peer hom wona, lahte nérí niiñce saw acce húunté wë ; un ɗofohte filiɓ nérë won tih : « Bee daa Koy soꞌ. Mi fahaꞌte ri níi fahaꞌ, keeñ soꞌ sosse ɗii na níi sos. Síkíríi rí ! » 6 Keluu taalibe ya uni bah, wa tíitú tíitë níi lasuute feey, líhúuté. 7 Yéesú leɓohte wa, leɓpe faanni wa, won wa tih : « Këlíi, ngënë tíití ! » 8 Tígí daaha, ɓéyrúu wë affi wa, wa olliluy ow, henay Yéesú a afi kut.
9 Wa koluu daaha na cépú daŋa. Wa homu cébë, Yéesú kaddaꞌte wa ɓíllí yee olu wa ra níi bín këllúun ɗi fi Koy-ɓëeꞌ ɓúudé rë. 10 Taalibe ya meelute ri tígí daaha wonu ri tih : « Yi tah yëeddëh yí kootii Mëyíis na wonu biti Éelí waɗtee nimil paaƴ ?✡17.10 Saame Malasi 3.23 » 11 Ɗi tahte won wa tih : « Ahaŋkay ! Éelí waɗtee nimil paaƴ yugusaꞌ iña ɓéeɓ. 12 Te soꞌ mi beh, mee ron won ra ee biti Éelí nimilte, ndaa wa yúhsúuy rí, wa pagute ri yii neɓaꞌ wa. Te yee pagu wa ri ra, wa ay rii pagee soꞌ mi Koy-ɓëeꞌ ɗaaha. » 13 Tígí daaha, taalibe ya na anuu yúh biti ɗi wonaꞌ wa Saŋ Batis.
Paƴi kúkëyë yin na ham ɗi ra
(Saame Marka 9.14-29 ; Lúkkë 9.37-43)
14 Tílúu wë níi wa lahute ɓëewë në rë, lahte ɓëyí leɓohte Yéesú, yeɗɗohte ƴekke fíyí 15 na ɗaŋ ri won tih : « Yíkëe, yérmé koy soꞌ : ɗi lahaꞌ yébítëh fí daa na ham ri, te ri mokke níi mok. Ɗi hoñ ɗii kéenɗëꞌ kíi mbée muluɓ. 16 Mi kompe ri taalibe yu paƴi, ndaa wa míníh yin na. » 17 Tígí daaha, Yéesú tahte won ɓëewë tih : « Ɗon fi ɓëy jamanii beh, ɗon fi ɓossi ƴee gémúy Koope ƴee ra, may home ɗon na mi mújdé ron níi kirih ? Këmí sëꞌ kúkëyë deh ! » 18 Yéesú komute kúkëyë, ɗi digiɗte uni túuƴcé yébítëh fë ɗúh ; yébítëh fë yíppée yeris kúkëyë, kúkëyë wahte. 19 Filoon fi baaha, taalibe ya hécúuté a Yéesú, meelute ri wonu tih : « Yi tah lígí yébítëh fë wooñ fun ? » 20 Yéesú won wa tih : « Néewë néewú ron ngém rë daa komaꞌ ri ! Mee ron won kaaf ka ra ee : ɗon lah ngém wuti ƴaha ƴutuuɗ koon sah, ɗon nah daŋi bee koloh laay dín, ɗi ay ñee wonon. Daa mi won ɗon ɗi ee : yin ii ron wooñ ! » [ 21 *17.21 Ɓëewë húmú ñeyaatu unni ƴee bín fë woraꞌi wa ɓëewë rë, lahte na ƴi húmú bíníyú yii beh : Yébítëh yë madu ɗee ra, oor a ɗaŋ Koope na doŋ daa mín wëe lík.]
Waali ana fa wonaꞌ Yéesú biti ɗi ay húl, ɗi këllú ɓúudé rë
(Saame Marka 9.30-32 ; Lúkkë 9.43-45)
22 Lahte bis, Yéesú a taalibe yi ɓéeɓ homu ílíƴ yínë Galile, ɗi won wa tih : « Soꞌ mi Koy-ɓëeꞌ, may yaayu ɓëewë, 23 wa hap soꞌ húl, te waali éeyë fë filoon fi húlí sëꞌ, may këllú ɓúudé. » Keluu taalibe ya unni ƴah, keeññi wa ɗúmpé.
Túmí Faam fi gaani Koope
24 Tílúu wë níi wa lahute Kafarnawum ra, ɓëewë na yeeku túmí Faam fi gaani Koope ra ayute Peer na, meelute ri wonu tih : « Yëeddëhën na yeraꞌ túmí Faam fi gaana a ? » 25 Peer won wa tih : « Ɗi na yeraꞌ kay ! »
Lahaꞌ Peer faam ra, Yéesú jëltëhté rí won tih : « Simoŋ, caa mi meel ro yin yínë : i wa daa na yeru buurra feey fa túm ? Ɓëy ginni wa mbée ɓëy ginni kayya daa wa ílífú wë rë ? » 26 Peer won ɗi tih : « Ɓëewí ginni kayya daa na yeruu. » Yéesú tahte won tih : « Kon ɓëewí wë nëníh në ! 27 Ɗee mín rii man ra ɓéeɓ, yen ɓanuy haayil keeññi wa. Kon paye laahin fu yees caasu ; jénë nay roo ɗéɓée jah ra, habe ri fu kúnís ɓúgë : fay naa ɗeef hanjar hélíis. Lah nísé rí, fu yeɗ ɗi yeekoh yi túmë, hen túmí yen ana. »