19
Yii leŋke yes kooɗ
(Saame Marka 10.1-12)
1 Wocaꞌ Yéesú wona ra, ɗi kolohte Galile, saañce deyi Yúdée di hatni yíníi laahi Yurdeŋ. 2 I ow caak ñeyute tala ; ɗi paƴce jéríɗ caak daaha. 3 Lahte fariseŋŋi ayute na saamu olsohi, meelute ri nda ow waɗtee mín yes ɓeleɓi biti wa mínlíih, a yii mín tah wa powaꞌ ɓéeɓ. 4 Ɗi won wa tih : « Ɗon yúhú yee bíníyú Téerëe rë maan ? Dalaana, Koo fa sak ɓéeɓ rë “sak ow ƴaal a ow ɓeleɓ”✡19.4 Saame Dalaana 1.27, 5 ɗi won tih : “Yii baa daa tah ow ƴaal ay ɓísëh a boffi a yaafi, pokoh ɓeleɓi na, wa hen yínë.”✡19.5 Saame Dalaana 2.24 6 Ɗaaha, wa henluy ana, wa tasu yínë. Kon iñi Koo daa boollaꞌ wa, ow ɓanan waa ɗaralsaꞌ ! » 7 Fariseŋŋa tahute wonu tih : « Ƴaha ɗaaha raa, yi tah Mëyíis won biti ow mín yes ɓeleɓi biti ri saam kéedí mín teeɓaꞌ biti ɗi yesse kooda ? » 8 Ɗi won wa tih : « Súhí ron keeñ daa tah Mëyíis on ɗon yii bah, ndaa húmú lahay dalaana. 9 Te mee ron won ra ee : ɓëyí yes ɓeleɓi te ɗeefa ɓelaa habuuy a ƴaal, kooɗ ɓeleɓ kay, njaaliyohte. » 10 Taalibe ya wonu ri tih : « Hanndal ki ƴaal a ɓeleɓ ƴaha ɗaa raa, ɓanti kooɗ daa gén ! » 11 Ɗi won wa tih : « Ɓëewë ɓéeɓ neh daa mínú tah yii baaha, hém henay ɓëewë Koope on wa ri ra. 12 Kaah biti lahte ɓëewí míníh kooɗ, ndah tasaꞌi wa ƴaal te wa límúu ɗaa límëe ; lahte ƴi yéŋké biti pagaɗ ow daa tah wa tasaꞌ ƴaal ; lahte ƴi ii kooɗ ɓal ndah légéyírí Nguur ki sun-Koo. Ɓëyí mín tah yii baaha taha ri ! »
Yéesú a tuŋka
(Saame Marka 10.13-16 ; Lúkkë 18.15-17)
13 Filoon fi baaha, lahte ɓëewí homu komi Yéesú i kúkëy, fahuu biti ɗi tík yaꞌ yi sun fi wa ɗagiɗ wa, ndaa taalibe ya na wonu affi wa. 14 Yéesú won wa tih : « Yéɗɗí tuŋka ac soo na, ngënë këddíi wë ! Yúhí biti Nguur ki sun-Koo saamɗu mani wa. » 15 Ɗi antee tík yaꞌ yi sun fi tuŋka barkelte wa, ɓeyaatte waali na saañ.
Ɓëewë caaku alal ra a Nguur ki sun-Koo
(Saame Marka 10.17-31 ; Lúkkë 18.18-30)
16 Yéesú hom saaña, lahte kúkëyí wahambaanii leɓohte ri, won ɗi tih : « Ɓahaa, mi waɗti paga yii wuni bi níi mi lah pesa na ɗúméh rë ? » 17 Yéesú won ɗi tih : « Fu meel soꞌ yi sun fi yii wunte ? Koope kut daa na paŋ wun. Fu fahaꞌ haal pesa na ɗúméh rë rëe, lah page iña túuƴëꞌ Koope ra. » 18 Kúkëyí wahambaanaa meelte ri won tih : « Túuƴëꞌ yí ƴih ? » Tígí daaha, Yéesú won ɗi tih : « Ngënë mësíi bëem ow ; ngënë mësíi njaaliyoh ; ngënë mësíi loh ; ngënë mësíi feliɗ ow ; 19 lah tëeppítíi baappon a yaayyon ; te di fahuu ron affon, lah fëhíi moroommon ɗaaha. »✡19.19 Saame Kolohi koyyi Israyel Ésíp 20.12-16 ; Tali Léwí 19.18 20 Ɗi won Yéesú tih : « Yii waɗ soꞌ iñƴaa ɓéeɓ mi paŋke wa, kon mi talliil yih ? » 21 Yéesú won ɗi tih : « Fu fahaꞌ biti fu júɓ níi júɓ rëe, paye fu yaay iña lahaꞌ fu ra ɓéeɓ, fu woraꞌ cadum fa ñëkíɗɗë. Hen ɗaaha raa, fay lah alal sun-Koo. Fu woc raa, fu ac fu ñee tal soꞌ. » 22 Kelaꞌ kúkëyí wahambaanaa unni ƴah, bi caak ri alal níi caak, yaa misikke ri keeñi níi misik. Ɗi kolohte na saañ.
23 Yéesú won taalibe yi tígí daaha tih : « Mee ron won kaaf ka ra ee : haal Nguur ki sun-Koo kofeelte yíkëe alal na ! 24 Ahaŋkay ! Mi won tee ɓal : géléem haal gúl kúuc, daa lukki yooɓ biti yíkëe alal haal Nguur ki Koope. » 25 Keluu taalibe ya unni ƴah, affi wa kúnëhté, wa meelute Yéesú wonu tih : « Kon daa míntí múc ? » 26 Ɗi yeelte wa, won tih : « Ow mínéh múcël afi, Koope kut daa mín ríi múcël. Lahay yii wooñ Koope ! » 27 Peer won ɗi tígí daaha tih : « Ɓahaa ole ! Fun helute iña ɓéeɓ, fun ñeyute talu. Yi na seh fun na nék ? » 28 Yéesú won wa tih : « Mee ron won kaaf ka ra ee : filiɓ pesi hasa na ac fíi rë, soꞌ mi Koy-ɓëeꞌ may took ñaani Nguur ki soꞌ. Yiin fin fa, ɗon fa ñeyu tal soꞌ ra, ɗon ɓal ɗon ay took ñaan Nguur sabboo a ñaan Nguur ana, ɗon ílíf talli sabboo a ana yi Israyel. 29 Ɓëyí af soꞌ tah ɗi hel faami, koy-yaayyi, boffi, yaafi, koyyi mbée feeyyi, ɗi ay lah ƴi luk ƴaa caak fap, te ɗi ay lah pesa na ɗúméh rë. 30 Ow caak di ɓëewë këllúu woteh ra ay míllëꞌ fayu, te ow caak di ɓëewë míllúu woteh ra ay këllëh fayu. »